SLWF-TEN LAY DAY 2012 AN HMANG
Mizoram Presbyterian Church Synod hnuaia ordained Minister ni lo zawng zawng, thawk mek leh pensioner-te inthlunzawmna Synod Lay Workers Fellowship (SLWF) chuan vawiin (May 25) nilengin P.C. Girls’ School-ah Lay Day vawi 38-na an hmang a, thupuiah ‘Simna’ (Matthaia 3:2) tih an hmang.
Lay Day programme hi hun thumah then a ni a, chawhma lamah hun urhsun hman a ni a, Upa F. Lalremthanga, Superintendent, Synod Office-in a kaihruai a, inchhiarnate neiin Lay Workers Fellowship Secretary leh Treasurer report-te ngaihthak a ni. Synod Moderator Rev. Thangzauvan Lay Day address a pe a, Synod Moderator chuan, Mi tam takin, ‘Pathian rawngbawl hi a hlawk lo, channa a ni’, an tih laia Lay workers 800 chuang zet kan nei hi a lawmawm a, Lay rawngbawltute hi Synod leh Kohhran hmel lanna an ni a, keimahniin rawngbawltua kan inngaih bakah mi ten Krista thuhretuah leh a rawngbawltuah min ngai rawh se, a ti. Lay workers te chu Pathian lakah, mihringpuite lakah leh mahni lakah rinawm turin a fuih a, department tina thawktute hi, kan hna inang lo mah se, kan pawimawh ber theuh a ni, a ti bawk.
Chawhma inkhawmah hian kum 2011 -2012 Lay Day inkara Lay member thite mi paruk sunna hun urhsun taka hman a ni a, member thite chu :
1. Vanlalhruaia Chinzah, Recording Assistant, Synod Office (July 9, 2011)
2. Pi P.C. Famkimi, Evangelist Teacher, Synod Office (August 25, 2011)
3. Pi Lianchhungi, Sister, Durtlang (October 18, 2011)
4. Upa Zalawma, PRESCOM (October 28, 2011)
5. Pu R. Laltholiana, Evangelist Teacher (November 13, 2011)
6. Upa D. Vanlallawma, Pensioner (January 16, 2012)
Heng bakah hian pension-a chhuak lay member 6 chawimawina leh thlahna neih a ni a, chungte chu :
1. Pu C. Lalrinmawia
2. Pi C. Lalrokimi
3. Pu Lalbiakthanga
4. Upa B. Bawlkhuma
5. Nl. H. Lalngurliani
6. Pu T. Zachhunga
7. Pu B. Lalngheta
Lay Workers Fellowship inkaihruaina bu tlangzarh a ni a, Upa Dr. H. Lallungmuana, Salem Vengin Lay Day 2012 thupui ‘Simna’ (Matthaia 3:2) tih thupui hmangin Pathian Thuchah a sawi a. Upa Lungmuana chuan, Baptistu Johana leh Lal Isua thupui tlangaupui ber kha Simna thu a ni a, an huaisen a, a takin sual an do a. Tumah hmai zah bik nei lovin an hmaichhanah an dik lohna an hrilh ngam a ni. Baptistu Johana khan Israel fate chu an thlahtu Abrahama a nih vang maia ngaihtha mai tur an nih loh thu a sawi angin, Mizorama Kohhran lian ber Presbyterian Synod hnuaia rawngbawltu nih ringawt hi ngaihthatna tur a awm lo. Ni tin, thla tin keimahniah sim tur kan nei. Hnah hlui hnah tharin a thlak thin ang hian Thlarau lam thil thar, zik thar chhuah zel tura beisei kan ni, a ti a. “Kan sum hnar hi Pathian mi ten malsawmna an dawn ang zela an thawhkhawm chauh hi a ni a, sum hnar dang kan nei lo. Pathian sum enkawltu kan nih angin kan rinawm tur a ni. Mi ten kan rawngbawlna an dem lohna turin kan fimkhur a ngai a, kan tawngka aiin kan nunin thu sawi tam rawh se”, a ti bawk
Chawhnu dar 1:00 atangin ‘Hun Zangkhai’ hman a ni a, Pi Lalropuii, Headmistress, P.C. Girls’ School-in hunserh a hman zawhah Items hrang hrang hmangin inelna neih a ni. Tlai dar 3:00 atangin ‘Hun hlimawm em em’ hmang lehin intihhlimna hun neih leh a ni. Tlaiah ruai an theh nghal bawk.
Synod Lay Workers Fellowship Day hi kum tinin May thla Zirtawpni hnuhnung berah hman thin a ni a, Synod Calendar-ah pawh ni pawimawh zingah tarlan a ni. Tunah hian Synod hnruaia thawk Lay Member 861 an awm a. Kumin Lay Day hi Synod Office leh P.C. Girls’ School-in P.C. Girls’ Sikulah an thleng a, member 550 vel an tel thei a ni. Lay Day pualin tanpui ngaite chhawmdawlna lakkhawm thin a ni a. Kuminah hian buhfai leh pawisa thawhkhawm a ni a, a semchhuahna tur chu la ngaihtuah a ni ang. Nikum Lay Day pual khan Synod Hospital-ah thisen unit 156 pek a ni a, sum thawhkhawm Rs. 12,400/- leh thawmhnaw engemaw zat Tawngtai Bethel Camping Centre, Chawnpui leh Samaritan Riangvai Run, Selingah pek a ni bawk. Lay Day pual hian Synod Hospitalah thisen pek thin a ni a, Department remchan dan ang zelin a inchhawkin thisen hi pek thin a ni.
For more Pics Click Here
| Share | Tweet |