SEC VAWI 239-NA AN THU (UPDATED)
Vawiin (June 5) chawhma dar 10:00 atang khan Synod Office-a J.M. Lloyd Hall-ah Synod Executive Committee vawi 239-na a thu tan a, June ni 7 thleng a awh ang. A ni hmasa berah hian member 141 atangin 128 an kal a ni.
SEC vawi 239-na hian thu pawimawh tak tak rel tur 67 zet a nei a. PC USA nena thawhhona chungchang, Synod Hospital-a doctor-te hlawh thar chungchang, Pastor thawk lai thite nupui fanau dawm zui dan tur, Manipur Area-a thawkte fix pay-a inrawihna rate en that, Pastor quarters foundation grant rate siamthat, Synod Office-a Security Guard leh CCTV dah thu, Karbi Anglong Administrative Area-a Assembly Officer tur dilna, Inneih hriattirna lehkha Synod Office-a dah chungchang, Pastor in luah man enthat, Vaihlo leh a kaihhnawih chungchang inzirtirna, Synod Hospital-a thawktute Provident leh Insurance fund chhun luhna tur, Thisen thliar hranna lei rawtna, Synod Hospital dinhmun en that, Mipat hmeichhiat chungchanga pawm dan puanchhuahna, Pavalai Pawl Inkaihhruaina, Pro. Pastor lak dan en that, Nupa chungchang Dan en that, Synod Service Rules en that, FG & CC tihphuisui, Pastor-a thawk lo tur ordain dan kawng zawn, NEIGRIHMS bula khualbuk siam, Maternity Leave pawh sei chungchang te hi a langsar leh ngaihven hlawh zual tura ngaihte an ni a, heng bakah hian kum kalta chhunga sum che vel audit report thlirho te, Synod sum dinhmun thlirho te a ni bawk ang.
He meeting-a secretary reports pawimawh zualte chu :
1) March 3, 2012-a Vaitin Bus accident-a thi 16 chhungte hnenah Rs. 10,000/- theuh pek a ni a, hliam tuar mi 20 te hnena tanpuina sem ral zat chu Rs. 57,000/- a ni. A vaiin Rs. 2,17,000/- sem ral a ni.
2) SEC leh OM thu angin April 3, 2012 khan OM member 8 leh Evangelical Church of Maraland Kohhran hruaitu mi 5 te chu Synod Office-ah an inkawm.
3) May 5, 2012 khan Tripura-ah Presbytery thar pahnih- Baramura Presbytery leh Longtorai Presbytery-te hawn a ni.
4) 16-20 May, 2012 chhunga neih NEICC Annual Meeting chuan 1st Vice President atan Rev. Zosangliana Colney a ruat.
5) Synod 2011 leh SEC thu angin Bawngkawna Pu Jantere-a (L) ram chu Synod ram atan Rs. 5,48,00,000/- in lei fel a ni.
6) Synod Hospital-a thawktute Pension & Provident Fund chu hun rei tak chhung Employment Provident Fund Organisation hnuaia a awm tawh hnuah Mizoram sawrkar puihna lawmawm tak avangin Relaxation pek a ni ta.
April 2011 atanga March 2012 chhunga Synod sum dinhmun hetiang hi a ni: Pastoral-ah hmuh tura ruahman Rs. 39,75,86,600/- a ni a, Rs. 52,40,74,150/- hmuh a ni a, budget khumna chu Rs. 12,64,87,550/- a ni. Budget khumna hi za zela 31.81 a ni. Mission lamah hmuh tura ruahman chu Rs. 35,58,24,700/- a ni a, Rs. 42,17,14,680/- hmuh a ni. Budget khumna chu Rs. 6,58,89,980/- a ni a, budget khumna hi za zela 18.52 a ni.
Pawisa hmuh tura ruahman zawng zawng belhkhawm hi Rs. 75,34,11,300/- a ni a, hmuh zawng zawng chu Rs. 94,57,88,830/- a ni a, khumna chu za zela 25.53 a ni. Pastoral leh Mission lama sum hman ral zat belhkhawm chu Rs. 77,26,89,357/- a ni a, hman bang Rs. 59,15,68,557/- a awm. Sum hmuh zawng zawng zatah hian kum hmasa zawk aia hmuh tamna chu Rs. 22,27,54,491/- a ni.
SEC 239 THUREL TLANGPUI :
SEC vawi 239-na thurel
June 5 - 8 chhung khan Synod Executive Committee vawi 239-na, Synod Office-a J.M. Lloyd Hall-ah an thu a, ruahman lawk dan chun June 7 thleng awh tur a ni a, thurel zawh hman loh avangin June 8 thleng an pawtsei ta a ni.
He meeting-a thurel pawimawh zualte chu :
1. PC USA leh Mizoram Presbyterian Kohhran thawhhona chu SEC 238:53-in a lo tih tawp tak avangin Pastor awm mek leh University-a zirlai te awm dan tur sawi ho a ni a, kalpui dan tur sawi fel awm lovin sawihonaah a tawp rih a ni.
2. Synod Hospital-a doctor-te hlawh en that a ni a, SEC 238:33(2)(a&b)-in mawhphurhna a pek anga OM-in a ruahman chhin chu siamthat ngaite siamthain hetiang hian pawm a ni :
a) Contract Doctor (Specialist) hlawh chu Rs. 25,000/- p.m. a ni ang a, Contract Medical Officer-te (MBBS/BDS) hlawh chu a ngaiin Rs. 23,500/- p.m. a la ni ang.
b) Medical Officer (MBBS/BDS) Regular-a thawk mekten Contract Medical Officer (MBBS/BDS) hlawh a phak hma chuan an phak lohna zat chu Special Compensatory Allowance (SCA), contract-a rawih mekte aia
Rs. 500/- a sangin thla tin pek an ni ang.
3. Presbyterian Church of Wales atangin British Library-in Endangered Archive Programme an kalpui mekah Mizoram Presbyterian Church-in sakhaw lam thil hlui leh record hlui a vawn thatte chu a thla lak a vawn that an duh thu leh Mizoram Synod-ah an rawn thlen a, Officers' Meeting lo zir chian atan dah a ni a, Synod Executive Committee-ah thlir leh a ni ang.
4. Synod Higher Secondary School Principal tang lai mek term, December 2011-a tawp tur chu kum 2012 chhung thawk zui tura tih a ni a, November SEC-ah Principal thar thlan tura tih a ni.
5. Karbi Anglong General Assembly Administrative Area (KAGAAA)-a General Assembly Officer hna thawktu tura PCI-in Mizoram Synod hnena Rev. Dr. Lalhmangaiha, Synod Finance Officer ni mek a rawn dil chu phalsak a ni a, Synod Puipate zinga mi a nih avangin tuna kal nghal mai chu thil remchang a ni lo va, January 2013-a kal tura tih a ni.
6. OM-in Ravi Tiwari, Registrar, Senate of Serampore College-in Serampore College Bi-Centenary Project atan kum hnih chhunga Rs. 20,00,000/- tum ve tura Mizoram Synod a rawn ngenna chu remtih a ni.
7. Kum 2011 Synod Gen. 2-nain Synod Hospital, Durtlanga hman tur thisen thliar hranna lei a lo rawt tawh chu SEC-in zir chiang tura a ruat Hospital Board-in a zir chianna thlirho a nih hnuah Synod Hospital dinhmun en that meka telh nghalin Budget tharah dah nghal tura tih a ni.
8. 2011 Synod Gen. 39-in Nu leh Pa Nî hman a rawt, SEC-in a ruat anga Officers' Meeting-in an hman dan tur a ruahman chu pawm a ni.
9. Mipat Hmeichhiatna chungchanga pawm dan puanchhuahna, SEC-in a lo zût mam leh chu pawm a ni a, Kohhranah hman nghal tura tih a ni.
10. 2011 Synod Gen. 55-in SEC kuta a dah Pavalai Pawl kaihhruaina chu pawm a ni.
11. 2011 Synod Gen. 59-in thuneihna a pek anga SEC-in a ruahman thar Nupa Chungchang Dan chu pawm a ni.
12. Pathian Biak Inkhawm Hruaina Bu chungchang siam that tura tih, ruahmantuten an rawn duan chu mawhphurtute kutah hlan let leh rih a ni a, November SEC-ah thlir leh tura tih a ni.
13. Pastor-a thawk lo tur ordain theih dan neih hran chungchang chu a hranpaa policy siam lovin, Synod-in a tlachawp-a a rel thin atan dah a ni.
14. North Eastern Indira Gandhi Regional Institute of Health & Medical Sciences (NEIGRIHMS) bul hnaia Mizoram Synod Khualbuk neih dan tur zir chiangtute report chu Synod-ah thlen tura tih a ni.
15. Synod Revival Camping Centre, Neihbawih-a mi chu Synod Property Committee enkawl tura tih a ni.
16. Revival Speaker Kohhran Pawl danga rawngbawl tura sawm an nihin an kal phalsak theih a ni a, kal man etc. chu a sawmtu Kohhran tum tur a ni ang.
17. Mizoram chhung District Headquarters 7 chhunga Pastor Bial 19 leh Khawpui lian deuh deuh khaw 51-ah Revival Beihpui October 15–21, 2012 chhunga neih turin ruahman a ni.
18. Central KTP-in Kum 2014-a KTP Diamond Jubilee anmahni sensova lawm an dilna chu remtih a ni.
| Share | Tweet |