HINDI BIBLE SCHOOL 49th BATCH GRADUATION SERVICE
Vawiin (June 13) chawhnu dar 1:00 khan Presbyterian Hindi Bible School Chapel-ah Batch 49-na pualin Graduation Service hman a ni.
Graduation programme hi Rev. Lalchhuanmawia, Synod Mission Board Secretary-in a kaihruai a, Atmaram Laxman-in Bible chhiar leh tawngtaina hun a hmang. B. Kananmawii, Instructor-in Inhmelhriattirna hun hmangin reports a pe a. Zirlaiten thurin puanchhuahna hun an hmang a, Nl Lalruatthangi, Instructor-in result a puang a, Upa R. Lalmalsawma, Synod Mission Board Coordinator-in certificate semin thusawina hun a hmang bawk. Bawngkawn Kohhran Masihi Sangati zaipawl an zai a, Rev. John Sharma, Principal-in zirchhuakte fuihna thu a sawi bawk. Rev Darkhuman zirlai zirchhuakte tana tawngtaisakna hun a hmang a, Pi Zirnuntluangi, Office Assistant-in lawmthu a sawi a, chairman-in malsawmna sawiin a tin a ni. Programme hman zawhah hian inthlahna ruai kilho nghal a ni.
Presbyterian Hindi Bible School (PHBS) hi Mizoram chhunga hnam dang ringtharte tihchakna atan August 24, 1990 khan hawn tan a ni a, batch hmasa berah mi 20-in an zir nghal a ni. A hawn kum atanga tun thleng hian zir chhuak mi 1175 an awm tawh a, vawiina Batch 49-na zirlai thlah takte hi mi 18, mipa 16 leh hmeichhia 2 an ni a, Assam, Arunachal, Tripura, Madhya Pradesh (TBZ Mission Field), Jharkhand, Bhutan, Orissa leh Mizoram atanga lo kalte an ni.
PHBS-ah hian kum khatah Batch hnih zir chhuahtir thin a ni a, a zir duh tan kum tinin January thla tirah leh June thla tirah Admission hawn thin a ni a, tum khatah hian mi 30 training tura lak theih a ni. Kum 2009 atangin Synod in a rel angin Certificate in Theology (C.Th.)-ah upgrade a ni a, helai atanga zirchhuakte hi C.Th. Certificate pek thin an ni a, subject hrang hrang 10 zirtir thin an ni.
PHBS atanga zirchhuakte hi Mission Field Pastor te, Field Evangelist-te, Kohhran leh khawtlanga mi tangkai, Missionary te lo puitu tha tak tak an ni hlawm a ni.
| Share | Tweet |