FG&CC LAY LEADERS TRAINING VAWI 16-NA KHAR A NI

Mizoram Synod, Family Guidance & Counselling Centre-in July 18 atanga Kohhran Upa te puala Pastoral Care & Counselling Training vawi 16-na, Synod Conference Centre-a a buatsaih chu nizan (July 31) khan khar a ni.

He Training-ah hian Aizawl khawpui chhunga Bial 7 atangin Kohhran Upa 18 an tel a, Synod Moderator Rev. Thangzauva'n Training kharna hun hi a hmanpui a ni.
Training kharna inkhawm hi FG&CC Director, Rev. R. Lalhmingthanga'n a kaihruai a, Synod Moderator, Rev. Thangzauva'n Training chhuakte hnenah Certificate hlanin thuchah a sawi a, Synod Secretary (Jr.) Rev. H. Lalrinmawia'n Tawngtaisakna hun a hmang.

Thuchah sawitu Synod Moderator chuan, kawng hrang hranga harsatna tawkte ngaihsak a, anmahni tanpui thei tura Counselling Training buatsaih a ni chu lawmawm a tih thu sawiin, Training chhuakte chu thahnemngai taka mi dangte tana inpe zel turin a ngen a ni.

Synod hian 1991 atang khan Pastor-te pualin Pastoral Care & Counselling Training hi a buatsaih thin a, Pastor 359-te training a neihpui tawh a ni. Kum 2002 atang khan Lay Leader-te pualin Counselling Training hi buatsaih thin a ni bawk a, Lay Leader-te puala vawi 16 a buatsaih tawhah Upa 295-te Training pek an ni tawh a ni.

 

For more Pics Click Here

 

Share

Tweet