COUNSELLING TRAINING VAWI 17-NA KHAR A NI
Mizoram Synod, Family Guidance & Counselling Centre-in September 5 atanga Kohhran Upa te puala Pastoral Care & Counselling Training vawi 17-na, Synod Multipurpose Training Centre (SMTC)-a a buatsaih chu nizan (Sept. 18) khan ‘Final Evaluation & Graduation Service’ neiin khar a ni.
He Training-ah hian Aizawl khawpui chhunga Bial 6 atangin Kohhran Upa 20 an tel a, Synod Moderator Rev. Thangzauva'n Training kharna hun hi a hmanpui a ni.
Training kharna inkhawm hi FG&CC Director, Rev. R. Lalhmingthanga'n a kaihruai a, Synod Moderator, Rev. Thangzauva'n Training chhuakte hnenah Certificate hlanin thuchah a sawi a. Training chhuakte hian training an hlawkpui dan a lema an ziak chu hrilhfiahin hun an hmang a, Upa Dr. P.C. Biaksiama’n trainee-te aiawha thu sawiin, Rev. Lalrinnunga, Programme Director, SMTC-in tawngtaisakna hun a hmang a, SMTC Hosteller Zaipawl te an zai bawk.
Thuchah sawitu Synod Moderator chuan training chhuakte fuihna thu sawiin, 'Upa chu Pathian rawngbawltu, A kohhran hote enkawltu a nih avangin Kohhran mite hmangaih tak leh duhsak takin a enkawl tur a ni a, Kohhrana harsatna tawk leh mi hnuaihnung zawkte ban phaka awm tur an ni,' a ti a. Kohhran vei tlat tur te, midangte tana thawhpui nuam ni tur leh mi dangte tanpui thei tura mahni intat hriam reng turin a fuih bawk.
FG&CC hian 1991 atang khan Pastor-te pualin Pastoral Care & Counselling Training hi a buatsaih thin a, kum 2002 atang khan Lay Leader-te pualin a buatsaih thin bawk. Tun a mi nen hian Pastor 359 leh Lay Leaders 315 hnenah Training pek an ni tawh a ni.
| Share | Tweet |