SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
News Tawi
Comm./Dept./Boards/Profiles
Periodicals
Audio/Visual
Synod Choir
Links
Booklets
FM Radio Hruaina Eng
 
 

 

Khawvel ram hrang hranga hruaitu lian – an Lal, President leh Prime Minister ten dikna leh zalenna an ken kawh zel theih nan

Khawvelah inhuatna, tharum thawhna leh indonate a lo reha, inunauna leh inpumkhatna a lo awm theih nan. He lama hma latu UNO tan

Khawvelah remna leh muanna a thlen theih nan


 

MODERATOR VALEDICTORY SERMON - Rev. Thangzauva, Synod Moderator, 2012

Thupui : Pathian Kohhran
Bible châng : Sam 87:1 - 3, Matt.16:18-19, Joh.19:33, Tirh.20:28

 

Thuhmahruai:

Pathian hian ka tum leh beisei lohna lamah min hruai zel a. Kan Kohhrana dinhmun leh nihna ropui chungchuang Synod Moderator hna te hial ka kova nghah a ni hi mak ka ti a. Pathian khawngaihna avang liau liau a ni tih ka hria. Ka tân chuan, ‘Khawngaih chunga khawngaih lehchhawnna’ tih hi a dik hle. Chu mawhphurhna chu Pathian hruainaa ka hlen chhuak ve thei dawn ta hi ka lawm hle.

Ka zin chhuah dawn apiangin ka nupui R. Lalnunmawiin tawngtainain min thlah ziah a. Chhûng inkhawmha ka fate pawhin min tawngtaisak thin a, ka lawm hle. Tin,  tlang tin leh hmun tina kohhran hoten min tawngtaisak nasa hle a; chu chu he rawngbawl hna rit tak leh hautak ka hlen chhuah theih chhan niin ka hria a, kohhran leh mi mal-min tawngtaisak thin zawng zawngte chungah lawmthu ka sawi a, Office leh Board/Committee-a ka rawngbawlpui – min fin chhuaha min tanpuitute chungah lawmthu ka sawi bawk e. Kohhran tlawhin vawi tam tak kan zin chhuak a, thil hman hmawh leh tul bik thilah pawh vawi khat mah tlai lova min hruai thleng zat zattu Synod Moderatoer driver Pu F. Rawntlinga hnenah lawmthu ka sawi bawk a. Hei hian Synod Moderator zahawmna a keng thui hle a ni.

Kan ram dung leh vang, ram pawn leh Mission Field-te pawh ka tlawh kual a. Chungah chuan Kohhranho thahnem ngaihzia te, rawngbawltute inpekna thukzia te, Pathian ram tana an thahnemngaihzia te ka hmuhin lawmawm ka ti takzet a ni. Mission Field-a kan Missionary leh thawktute thahnemngaihzia han hriatte hian rilru a tilawm hle a. Kan Field pakhata Fiel Secretary chuan “Kan Missionary-te hi inthlahdah pakhat mah an awm lo,” a ti. Ngaihthlak a nuam hle.

Kan Kohhran hi chu inkhawmpui leh Committee Kohhran tih mai theih khawpa Committee ngah kan ni a. Kumin hianvawi 160 ka committee a, Kohhran pawh 152 ka tlawh bawk a. Biak In hi pariat (8) ka hawng a, Chungte chu: Sailam, Zote ‘S’, Ramhlun Vengthlang, Sawleng Hmuntha, Serchhip Bazar, Maubawk West, Saikhamakawn leh Maubuang te an ni a. Biak In lungphum hi hengte hi ka phum bawk: E. Lungdar, Chuhvel, Vanbawng leh Bethani (Manipur). Hengte hi ka hawng bawk: Bethel Kohhran Golden Jubilee lungphum (29th 7,2012), Rostad Memorial high School Building (Churachandpur - 19th 10, 2012) leh Synod bookroom, Serchhip  Branch (9th 11, 2012). Kohhran Centenary te, Golden jubile leh Bial Inkhawmpui Silver Jubilee-te ka hmanpui nual bawk.

Thil dangdai leh la thleng ngai lo tawn ka nei a; chungte chu: Thutak Nunpuitu Team (TNT) Zuangtui-ah September 9th, 2012 (Sun) khan mi 204 ka baptis-a; tin, November 18th, 2012 (Sun) khan Central Jail chhunga tâng mi 6 lai Baptisma ka chantir bawk. Kum 2011 Synod khan Pro. Pastor 19 ka nemnghet a, Pro . Pastor 17 installation ka nei bawk.

Synod Moderator hian engnge an thawh ber tihin zawt ta ila, hetiangin chhâng ila a dik thui hle ang.

  •  Synod inkhawmpui leh Committee kaihhruai
  •  Kohhran tlawh
  •  Sunday School Exam lawmman Certificate hming sign
  •  Pathian sum pawisa chhiar tlemte write off
  •  Message hrang hrang ziak
  •  Office leh inleng dawnsawn
  •  Mizoram Kohhran Hruaitute (MKHC) leh Mizoram People Forum (MPF) te nena thawhhova , thiltih adt.

Kan thu sawi tur lamah lo lut dawn tawh ila. Thupui atan ‘Kohhran’ tih ka thlang a, hetiangin lo sawi ila.

Thuthlung hlui hunah khan Kohhran tih tawngkam tak chu a awm lo a ni awm e. ‘Pathian mite, Israel hnam pumpui – Amah be tura hmun bika kohkhawmte kha Thuthlung hlui Kohhran’ tiin a sawi theih awm e. (Ędhah-Qahal). Pathian hnam thlan, Pathian dang be lova, amah chauh bia a, a tâna thianghlima nung tur a ni, kei ka thianghlim si’ (Levi: 19:2) tih ziak ang khan.

Thuthlung Thar-ah chuan Kohhran hi Grik tawngin Ecclesia tih a ni a; chu chu ek- Kaleo tih atanga lak a ni a. ‘EK’  tih chu ‘chhuak’ tihna a ni a; ‘Kaleo’ chu ‘KO’ tihna a ni. Chumi awmzia chu kohchhuah Kohhran tihna a ni a. ‘Sual zing ata Kohhran’ tihna a ni, ‘An zing ata lo chhuak ula, a hrangin awm rawh u, thil bawlhhlawh reng reng pawh dek suh u, Lalpan a ti’ tih ang khan (II Kor: 6:17). Thuthlung hluia kohhran tih awmzia nen pawh a thuhmun hle.

I. Kohhran sawi fiah dan thenkhatte: Mi thenkhatin Kohhran an sawifiah dan chu-

  •  Dr. M.M. Thomas-a chuan, “Kohhran chu mi dangte tlan tura tlansate pungkhawm hi a ni” a ti.
  •  Harvey Cox-a chuan, “Kohhran chu tunlai huna mi zawng zawng hnena Pathian thiltum tihlanna ni a ni,” a ti.
  •  John Calvin-a chuan, “Kohhran chu Krista taksa, Pathian thu dik taka puang a, Sakramen dik taka theha, Kohhran inthununna dik taka hmang hi a ni, “ a ti.
  •  Vatican Council II chuan, “Kohhran chu Pathian mi van lam pana zin/kal mêkte hi an ni,” tiin a sawi.
  •  World Council of Churches (WCC) chuan, “Kohhran chu Isua Krista chauh chhandamtu atana pawma, Pa leh Fapa leh Thlarau Thianghlim ring a, Isua Krista Sakramen te hmanga dingho ho hi a ni,” tiin a sawi.

Ka rilruin Kohhran a hriatfiah ve danah chan, “Kohhran chu Pathian chatuan puma pai, Kalvari tlanga Isua Krista thisena hrin, hmuh theih loh ata hmuh theiha Penticost Ni-a lo ding chhuak ta-a kha a ni,” tiin. Thurin chuan ‘Kohhran chu pakhat (One), Thianghlim (Holy), Huapzo (Catholic) leh Apostol-te zirtirnaa innghat’ tiin a sawi (Four Credal Adjectives).

A sawifiahna atan chuan duh tawk ila, sawi zui tawh lo mai ila a tha ang e.

II. Kohhran innghahna lungphum: Sam 87:1-na thu kan chhiar khan Kohhran innghahna lungphum chu ‘tlang thianghlim-ah anih thu kan hmu. Mizote thinlungah chuan tlang thianghlim kan rih chu ‘kalvari tlang’ kha a ni a. Kalvari tlanga khenbeh – Isua Krista nâk thianghlim thisen leh tui lo luang chhuak atang khan Kohhran chu a lo ding a. Aw tlangmawi Kalvari, miten hmusit mah se, Tlang dang zawng zawng aiin kei zawng ka ngaina hle, Aw hlimna tlang, Aw hmun thianghlim, Pathian thisen a luanna chu’ kan tihna chhan pawh hi chuta Kohhran lungphum a innghah vang chu a ni. Kan hla pawhin

  •  ‘Kan Kohhranho lungphum chu a lal Krista Isua, Tui leh thisen leh thuin a thilsiam thar a ni,’ a ti.

Mimal nun, chhungkaw nun leh kohhranho nunlungphum innghahna Krista a nih chauhvin kan nun hi a nghet thei. “Harsatna a lo thlena kan nun a nghin a, a chauh fona chhan chu kan innghahna lungpuiah kan chian loh vang a ni fo. Kan thinlungah Pathian tilawm nun a awm chuan chûng hlauhna lakah chuan humhimin a awm thin. A rem vak lo naiin kan sawi duh hram chu – Kristianna leh Sakhaw dang danglamna hi a ni. Sakhaw dang zawng zawng chu mihringte hmuh chhuah a ni a, Kristianna erawh chu van atanga lo chhuk Pathian fapa Isua Kristaa innghat a ni. Chu Krista chu Kohhran innghahna lungphum chu a ni.

III. Kohhran nihnate: Kohhran nihna hi sawi kim vek sen ni lo mah se, tlem azawng lo sawi ila.

1). Kohhran chu Krista taksa a ni: Eph. 1:23-ah chuan Tirhkoh Paula chuan ‘...Kohhranho chu a taksa a ni, engkim tikhattu famkimna chu’ a i. Krista chu kohhran ho lû a ni a, Kohhran chu a taksa a ni. Lu leh taksa chu sawi hran theih a mah se, lâk hran theih a ni lo angin, Krista leh Kohhran chu lâk hran theih  loh khawpin a inzawm. A inzawmzia hetiangin lo sawi ila. Saula kha Paula a nih hma khan ringtute/Kristiante/Kohhran hote tihduhdah phalna lehkha puithiamin Lalber hnenah Jerusalem khuaah kalin a la a; Damaska khaw lamah kalin khaw luh dawnah dai a thlen chuan êngin a chhun thlu ta a, aw-in ‘Saula, Saula, engatinge nangin kei mi tihduhdah hi” a ti ta a.

Heta tanga chiang taka lang chu- Kohhran tihduhdah chuan Isua a tiduhdah a ni. Kohhran hmusit chuan Isua a hmusit a, Kohhran sawisel chuan Isua a sawisel a ni.

Taksaah hian peng hrang hrang a awm a, Pathianin a duhna apiangah, an awmna tur theuhvah a dah a, peng khat mahin engvangin nge hetah hian min dah tiin an phun ngai lo angin, kohhranho-a member hrang hrangte hi kan awmna tur theuhah Pathianin min dah a, phun nawi a thiang lo. Kan mit hi zak hnuaiah dah se – thil en dawn apiangin zak kau a ngai ang a, a buai thlâk hle dawn a ni.

Tin, taksa peng hrang hrangte hi an thawh leh tih theih a inang lo va, mahse an tih tur theuh tha taka an tih avangin taksa tan malsawmna a ni angin, kohhrana thlarau thilpek kan dawn theuhte hi tangkai takin hmang theuh ila, Pathian a ropui mai dawn a lo ni.

2). Kohhran chu Pathian Chhungkua a ni: Eph.2:19-ah chuan, ‘Tûnah zawng mikhual leh mi cham mai in ni tawh lova, mi thianghlimte nen chuan tualkhat leh Pathian chhungte in ni ta zawk a ni,’ tih kan hmu. Mi hausa leh langsar chhungkua nih te nuam kan ti. Kohhran chu Pathian chhungkua, khawvela a chénna chhungkhaw awmchhun kan ni. A va hlu em! Chu nihna dinhmun ropui tak chu hriain hla siamtu (John Newton) pawh a lawm em em a, hetiangin hlain a chhamchhuak ta a; ‘Lalpa Zion khawpuiah chuan khawngaiha mi teltîr chuan, Khawvelin min hmusit mah sela, i hming chauh ka chhuang ang e,’ tiin. Keini pawh hian John Newton-a ang hian Zion khawpui – Kohhranhova kan tel ve Pathianin a phal ve avang hian kan chhamchhuak ve thei dawn lawm ni?

Chhungkuaa pa ber chuan a chhungkaw tan a chakna leh theihna zawng zawng chhuaha a ngaihsak anih chuan kan Pa Pathian phei chuan a chhungkua Kohhran chu min va ngaihsak nasa dawn em! Engmah Pathian kohhranho tan chuan lungngaih tur a awm lo. Kan dil chuan ka mamawh tinreng min pek a tiam a, nachâng kan hriat loh thlengin min pe thin a ni. Pathian chhungkua Kohhrana kan tel ve hi a va han lawmawmina a va hlu tak em?

3). Kohhran chu Pathian In (Temple) a ni:  Pathian thu chuan “Pathian in in nih leh, Pathian Thlarau nangmahniah a awm reng tih i hre lo vem ni. Tupawhin chu in chu a tihkhawloh chuan Pathianin a tikhawlo ve a, chu in chu a thianghlim si a, chu chu nangmahni in ni e’ tiin (I Kor. 3:16). In ropuina pakhat chu a hmanrua a ni a, a pahnihna chu rem taka a inchuktuah a ni a, a pawimawh ber chu a chhunga chengte inhmangaih leh lungrual taka, inrem taka awm a ni. Kan thu tarlan khân kohhran chu Pathian in kan nihzia a sawi a. Kan taksa, Pathian in hi thianghlim taka, a chenna atana vawng tur kan ni. Mahni taksa tibawlhhlawha, tikhawlotu chu Pathianin a tikhawloh dawn avangin thianghlim taka mahni nun theuh pawh achenna tlaka vawng thianghlim turin mawh kan phur.

4). Kohhran chu Krista mo (Bride) a ni (Is. 61:10; II Kor. 11:2): Kohhran chu Krista mo a ni tih hi kan hre fo awm e. Mo chu kan hria, an pasal neih ni atangin mo an ni nghal. Mo chuan a pasal rilru tihnat a duh lo va, a duhzawng a ngaihtuah sak thin, a chawhmeh duhzawng thlengin hriat sak a tum a. A tan a invawng thianghlim a, ngaihzawng dang neih pawh a rem tawh lo.

Kohhran hi Krista mo a ni a. Hla siam tuin, “A mo thianglim hi turin vana’n a rawn zawng a,’ a tih angin, Van atanga rawn zawngtu chuan a lo la lam leh dawn a; chuvangin thianghlim taka a pasal Krista tan Kohhranho chu lawm leh tlakin a invawn thianghlim a tul.

Lawng chu tui chungah chau a kal a, a awm thei. Mahse a chhungah tui a lut tur a ni lo. Titanic lawng ropui tak pawh kha a chhungah tui a luh avangin  lawng kha tuifinriatah a pil ta angin; kohhran hi khawvelah awm mah se a chhungah khawvel politics bawlhhlawh te, sual leh thil tha lo kohhranah kan luhtir chuan khawvel mawinain min chim pil mai ang tih a hlauhawm. Nakum (2013) hi General Assembly inthlan hun a ni a, Krista leh a kohhran aia hmangaih kan neih loh nan i invawng thianghlim ang u.

Kohhran nihna hi kan sawi seng lovang. Thuthlung thara kohhran hote nihna Peteran a sawi hi a khaikhawm nan lo sawi ila; ‘Nangni zawng chi thlan (lehlin thar/hnam thlan) lal puithiamho, hnam thianghlim, Pathian mite ngei in ni si a (I Pet. 2:9).

Mahni nihna hriat chian loh hi bona a ni a, kohhranhote hian kan nihna hi hre chiang ila, tun aia awmze nei zawk hian kan awm thei ang.

IV. Kohhranin beihna a tawk:

1).Chhûng lam atanga beihna: Hei hi zirtirna dik lo tiin kan sawi thei ang. Kohhran hian a din tirh phat atangin zirtirna diklo leh harsatna namen lo a tawk a. Juda-ho lakah te, Ebionism zirtirna te (Isua hi mihring hlang a ni, Pathianna a nei lo), Docetism zirtirna (Isua hi Pathian hlang a ni a, mihrinna a nei lo) te. Kan kohhran thurin, ‘Pathian tak leh mihring tak... Pathian leh mihring zia nei a ni a tih te hi a pawimawh hle. Hla siamtu chuan, ‘Amah chu mihring leh Pathian a ni, Lal leh Chhandamtu a nih a fawm’ tiin a sawi a, thu a sawi thui hle.

Kan ram zirtirna chi hrang hrang lo chhuah tam tawh dan te hi sawi mai sen a ni lo; Pathian ka ni, Isua ka ni, Lal Isua a lokal tawh, Lal Isua a lokal leh dawn lo, Thlarau Thianghlimin kohhran a chhuahsan, Prsebyterian kohhran chu nawhchizuar kohhran a ni, Sakawlh a ni, ring thei kan ni lo, mihringin Pathian a ring thei lo etc.

Heng zawng zawng deuh thaw hi kan kohhran atanga penga chhuak an ni a, khawngaihna leh hmangaihna thinlung neiin kan kohhrana awm turin i sawm hawng leh vek ang u. Tin, heng zirtirna dik lo te hian kan mite an hruai bo loh nan i veng  him ang u, kan hna a ni.

Kan kohhran thurin leh inkaihhruaina te hi a dik a, kan rawngbawlna te hi Lal Isua hna chhunzawmna nia kan pawm a nih si chuan engah nge anmahni huikhawm tura thahnem kan ngaih lovang. Tu an nih kan hriat loh, India ram leh khawvel hmun danga mi ringtua siam nan sum leh pai tam tak sengin, Mihring te kan tir a, harsatna nasa tak an tawk a ni a; kan bul hnai maia awmte sengkhawm tur hian mahni awmna hmunah theuh thahnemngai takin i thawk teh ang. An hre lo atin ni an kalsual ni. Member-ah pawh thahnem i ngai ang u. Misual kha mi tha berah a chhuak thei si a.

2. Pawn lam atanga beihna: Hei hi sawrkar leh lalte leh sakhaw dang atanga beihna tiin kan sawi thei ang.

Lal Isua pian tirh ata Heroda leh Rom Sawrkarin an enghelh a, a tawpah an khengbet a; mahse thihna chelh hlen rual a nih loh avangin a tho leh a. Ringtu an lo pung a. Rom lalte leh Sorkar, ringtu tihduhdah tute (sakawlh) ten bei mahse an timit zo lo. Tharum thawh velo rintute chu an ral a hnehin an pung zel. ‘Hetah lo thiat mahse hmun dangah a din thar’ tih angin an lo pung zel. Tun thlengin communist sorkar te, lal leh sakhaw hrang hrang betu ten Kristiante (kohhran) chu an bei nasa hle. Mahse hla siamtuin, ‘khawiah pawh ni chhuahna apiangah Isua Lalin ro a rel dawn,... Thla thar dêt ban hma loh hi chuan, khawvelah a ram a zau ang, a tih angin a ram a azau zel.

A tiduhdah ram chu a ral zel. Judaho sala mantu Babylon ram chu a awm tawh lo. Tuna Iraq ram hi a ni. Rom ram, Kristian tiduhdah tu chu a hun laia ram  zau ber ni mah se a tawp. Russin ram, sakawlh ang hiala an hlauh chu – hmun sarih (7) laiah a phel.

Kohhran chu chung lam ta a nih avangin a ropui zual zel dawn, chûng rama underground kohhran member tam tur zia hi sawi thiam a harsa – 10% or 20% ?

Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta tiin Lal Isuan a sawi a, a hnehsa khawvelah ka cheng a ni tih hriain thlamuang takin awm ila. Heng min beitute hi thlarau ngunhnam, Pathian thua inthuam chungin hmet mit zel ila. ‘Isua hnênah hlauh tur a awm lo engkimin a thupek an awih thin tih angin, Sakawlh leh a hote hnehtu Krista -  beramno leh a hnêna awm, Kohva te, Thlana te, Rinawma te chuan an hneh bawk ang (Thup. 17:14) tih hi i chhinchhiah ang u.

V. Kohhran din chhan:

Kohhran hna pui ber chu Chanchin Tha hril hi a ni. Isuan Petera hnenah khan ‘Vanram chabi-te ka pe ang chia, lei chungah engpawh i phuar apiang vanah phuar a ni ang a, lei chungah engpawh vanah phelh a ni ang’ a ti a. Chabi kan hria ti rawh u. Thil kalh hawn theihna a ni. Thinlung sual kalh – Chanchin Tha la thleng ngai lohna thinlung te, Chanchin Tha thlen tawhna pawh nise, sualin a hneh lehna thinlung te chu – Krista Chanchin Tha kan hrilh/hriattîr chuan an thinlung sualin a kalh hnan tlat, a bawih beh tlatte chu hnehsakin an awm ang a, an nun a lo zalen dawn a ni. He hnathawh hi kohhran dinchhan kan hnapui ber  a ni.

‘Krista leh kohhran

Kan dam chhan ber ni se’.

Amen

 

 

 

 

 

 

 

 

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   4814010


Synfo © 2006 : All rights reserved. Mizoram Presbyterian Church Synod : Best @ 1024x768