SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
News Tawi
Comm./Dept./Boards/Profiles
Periodicals
Audio/Visual
Synod Choir
Links
Booklets
FM Radio Hruaina Eng
 
 

 

Khawvel ram hrang hranga hruaitu lian – an Lal, President leh Prime Minister ten dikna leh zalenna an ken kawh zel theih nan

Khawvelah inhuatna, tharum thawhna leh indonate a lo reha, inunauna leh inpumkhatna a lo awm theih nan. He lama hma latu UNO tan

Khawvelah remna leh muanna a thlen theih nan


 

KAN KOHHRAN PIANHMANG - By C. Vanlallawma, Mission Veng

Khawvel chanchina kan Kohhran lo pian chhuah dan hi tawi tein sawi dawn ta ila, min hringtu Welsh Kohhran chanchin te, India ram Presbyterian Kohhran chanchin te kan thlir let a tul ang. Kan history tlangpui chu hetiang deuh hi a ni –

Hringtu Welsh Kohhran

England Harhna :Kum zabi 18-na laihawla ‘Evangelical Awakening’ an tih mai Harhna Ropui khan Sap ram leh America khawmualpui khu a tuam chhuak a. Chuta harhna hruaitu lian pahnihte chu George Whitefield-a leh John Wesley-a te an ni. He mite hi Anglican Kohhran mi ve ve ni mah se Biak In lama an hnawn tak deuh hnu chuan an harhna kha ‘Methodist Revival’ an tihsak ta deuh mah a, an kalhmang avanga pawn lam mite phuahsak a ni. Chutih ahnu-hmanah an hotu lian pahnihte chu rei lo teah thurin lama an inrem theih loh avangin an kal hrang ta tlat mai a, a mak hle. Chutia Methodist Movement thuang hniha a kal ta chu Whitelfield-an Calvin-a pawm lam (Calvinistic Wing) a hruai a, Wesley-an Arminia pawm lam (Arminian Wing) a hruai thung a. Kum 1743 atang phei chuan heng pawl hnihte hi an inthen fithla ta law law a ni.

Wales Presbyterian : Wales Kohhran tan ‘Varparh Arsi’ an tih thin Griffith Jones (1683-1761) chuan Whitefield-a pawmin Calvinistic Methodist Church of Wales lung a phum a. Chung lai chuan Calvin-a huvang veka siam England Kohhran  Thurin ‘Trinity-nine Articles’ (1563) leh England & Scotland ram Presbyterian Kohhran Thurin bu lian ‘Westminster Confession’ (1647) te chu an tan chaw tui tak ang a ni.           

            Hun a han kal leh hlek a, Wales ram Calvinistic Methodist-ho chuan kum 1811 ah khan Presbyterian Kohhran Upa thlan dan ngei hmang tanin, England Kohhran(Church of England) atang chuan in-mual an vawm hrang ta a, rei rial lovin anmahni pual thurin tur an  puahchah zui ve ta a ni. An peih fel veleh kum 1823 khan Aberystwyth Inkhawmpui (Association)ah an thurin thar chu an pawm a. Hei hi Wales ram Presbyterian Kohhran thurin pui ber, ‘Welsh Confession’ an tih chu a ni. Thirty-nine Articles leh Westminster Confession tlawhchhanin, Wales ram kohhran rilrem turin an siamrem a, thu hlawm(articles) hrang hrang  44 lai awmna, John Calvina zirtirnaa innghat thurin sei tawk tak a ni. He thurin hi Pu Zosaphluian 1909 vel khan Mizo kohhran tan a lo letling a, kan thurin bu hmasa ber a ni ve leh a. Kum 1912 ah chhut 2-na, 1941-ah chhut 3-na thlengin sem darh a ni.

India ram Presbyterian Kohhran

KanThurin Sawm hi : Tun thlenga kan hman kan Thurin Sawm hi erawh chu min hringtu Welsh kohhran kutchhuak a ni ve lo. Tute phuah nge? Engtik huna siam nge? A siamnaah Mizo an tel ve em? Heng hi kan inzawt thin a, a neitute hian kan hre chiang ngai lo. Heng zawhna hi kan chhan theih hma hian chanchin tha kum za kan thleng a, Gospel Centenary kan lawm fel vek hman a ni.

Indiaramah hian  Presbyterian kohhran hi  hmar chhak kilah PCI tiin kan awm lêt lêt chauh tawh a, kan tlêm hle mai. India ram hun kal tawh kan thlir lêt erawh chuan missionary hun ropui, 1800 leh 1900 inkar kum za chhung khan he India-Hindu ram thimpui vei hian khawvel hmun dang atangin Presbyterian hnahthlâk missionary te an lo feh lût zung zung a1. An rawngbawlna leh an sulhnu pawh a ropui hle. Zirna leh tihdam rawngbawlna lama an hnathawh te chu vawiin India ram hian a rah a seng a, a hlâwkna a têl mêk a ni2.

India rama Presbyterian hnahthlâk mission-ho chuan tîrtu kohhran leh Board a hran miau avangin a tir lam hun engemaw chen  kha harsatna neuh neuh an tâwk a, chung avang chuan rawngbawlho theih tulzia an hre nghal  a,  thawhho dan kawng an dap ta a ni. Chutiang tulzia ziaka pamphlet 1863-a theh darhtu, Scottish Presbyterian upa J.T.MacLagan-a chuan kawng a han sial hmasa a. Thahnemngai taka bei zuitu chu Northern India Synod-a rawngbawltu, American Presbyterian missionary Rev. Dr. J.H.Morrison, a hnu lama Chief Architech of Presbyterian Union in India an tih tak chu a ni. Anni Synod chuan thawhhona kawng zawngtu Committee dinin, 1871 January thla khan Church of Scotland, Free Church of Scotland, United Presbyterian Church of Scotland, American Presbyterian Church, leh Reformed Presbyterian Church(USA) aiawhte an ko khawm a, unau anga tanho dan an ngaihtuah tan a. Chungho chuan tha  tho takin chumi kum tâwp November ah Allahabad Conference kovin zau zawkin an  ngaihtuahho leh a. Presbyterian hnahthlâkho talina thawhhona tha neih mawlh chu an lungkham a. Anni hovin an rel angin 1872 December thlaah Allahabad Convention an ko leh a, chuta Presbyterian minister leh upa 42  kal  khawm te chuan ngun  taka engkim an ngaihtuah hnuah 1873 November ni 26 khan ‘Indian Presbyterian Confederation’  an han invuah lailâwk(chhin) a. Hmathlîr tha lehzual neiin, dan bu te an duang zui a. Tichuan an Dan Bu siam thar te chu pawmin December 23-24, 1975 khan ‘Presbyterian Alliance of India’(PAI)tiin tanhona pawl an indin ta a ni.  Thiltum  pawimawh bik pali an nei a –

(1)  Thu khat vua leh inngaichâng tawna India ram Presbyterian kohhran thawhhona kawng zawn

(2)   Thawhho dan leh intanpui tawn dan kawng dap

(3)   Chanchin tha hna thawk thei tura tualchhung kohhran tihngheh leh tihchangtlun

(4)   India ram Presbyterian kohhran ding tharte inpumkhatna tur ngaihtuah3.

Kum 1877 December ah Presbyterian Alliance rorel inkhawmpui(council)  hmasa ber Allahabad ah an ko a, chutah chuan kan sawi tak Rev. Dr. John Hunter Morrison kha Moderator a ni a, ziaktu(clerk)chu James Williamson a ni. Thu tam tak an ngaihtuah a, anmahni theuh pawh inbih chiangin India ram Presbyterian  kalhmang tur te an sawiho a, phûr takin kalphung inang tlâng neih dan tur an ngaihtuahho a. Inhriat tawn nan 1888 atang khan chanchinbu Indian Standard an tih chu an chhuah ta nghe nghe.

Mahni kohhran nihna hlîp si lova mission field-a pawm tlân theih tur kalhmang leh thurin duan chhuah chu thil awlsam a ni lo. Tirtu kohhran(home church)mitmei ena indâwr a tûl thin a, chu chuan a tiharsa a ni. PAI Doctrine Sub-Committee Convener Rev K.S.Macdonald-a te chuan sawiho nikhuain inghahna thurin atan Tirhkohte Thurin emaw, Nicea Thurin emaw, England Presbyterian Thurin Article 24 emaw, India ram Scottish Kohhran Pathumte Thurin emaw zingah duh ber  thlan mai a tha  em tih te an dinpui a.  India ram kohhran tiak tir zinga mission pawl hrang hrangte inhman tâwm tur a nihna chuan ngaihtuah a ti harsa bawk. Ngun taka an ngaihtuahho hnu chuan Scot-ho thurin chu tlai deuh hnuah an thlang ta a.

Kenneth Lawrence Parker-an a ziak dan chuan he thurin hi Scotland Presbyterian Assembly  hnuaia Foreign Mission Committee-in,  1878-a a din Doctrine Sub-Committee  te kutchhuak a ni.  A tir takah chuan  India chhima Scottish Kohhran pathumten tualchhung kohhran rawngbawltu(Office Bearer)an nemngheh turte thuvawn atana an phuah a ni a,  thu hlâwm(article)sawm pakhat a awm. Chu thurin chuan an lung a dum deuh avangin PAI General Assembly 1882 chuan an thlirho a, thu pawhchah mai a harsat avangin ngaihtuah thatah an khêk a. India chhima Scottish kohhran pathumte4 erawh chuan ihê lovin an hmang.  Chutia anni’n rei fe an hman hnu chuan kohhran pawl dang nen an thawhhona, Synod of SouthernIndia chuan 1901 khan thurinah an pawm(adopt) a. Hemi hnu lawk 1904 ah,  article 11 chu 12 ah siamin India hmar lam Presbyterian kohhran,  ‘Presbyterian Church in India’ tia inzawm khawm tate chuan  thurinah an pawm ve leh a(‘Presbyterian Alliance in India’ tia an thawhho chhung khan thurinah an la hmang lo tihna a nih chu). Tichuan ‘The Synod of Southern India’ thurin 11 chu ‘Presbyterian Church in India’ thurin sawm leh pahnih(Twelve Articles of Presbyterian Church in India) a lo ni ta a. India ram Presbyterian Kohhranho(PCI) chu 1924 ah, United Church of Nothern India(UCNI)tia kohhran pawl dang nen an inzawm khawm hnu thlengin UCNI chuan thurinah an hmang zui zel a.  Keini pawhin articles 12 chu 10 ah kai tawiin 1924 atanga tun thlengin thurinah kan hmang zui ta a ni.

Thurin chhuanawm

Kanthurin hi a tein a tawi na a, hmangtu leh pawmtu an lo zau hle. Sawi tham leh chhui zel tham a ni. America chhim leh hmar atang te, Canada leh Australia atang tea Korea rama thawktu missionary ho pawhin 1905-a Korea ram National Presbyterian Church an din hlimin, he thurin hi Asia khawmualpuia Presbyterian Mission zawng zawngte thurin intâwm tlan atan tha tâwk hlea ngaiin 1907  khan an lo pawm(adopt)ve nghal a.  Hun lokal zelah Korean Presbyterian kohhran chu inthen darh nasa hle mah se a tam zawkin thurin bulpuiah an la ngai reng a, tun hnu lama inthui khawm leh nan an la hman theih an beisei hial a ni. Tun laia India Hmar Kohhran(Church of North India), mihring maktaduai 20 dawn lai awmnaah  hian UCNI kan tih khan a chhawm lut a, tun thlengin thurinah an vuan mêk a; hmangtu kohhran mipui kan lo tamin kan lo inzar zau hle a nih chu!   Tichuan he thurin hi Asia khawmualpuia Protestant mipui maktaduai tam takin thurinah an lo hmang  a, ram hrang leh kohhran pawl tam takin innghahna tlâka an ngaih a lo ni reng mai. Korea atanga China thlengin he thurin hian min lo phuar khawm a5. A pawimawh angin a neitute hian kan lo hre tâwk lo zawk a ni. Chutiang taka thurin pawimawh ni si, kristian thurin la khâwmtu(compiler) leh chhuitute hian an lo hre lo em em mai a, a mak hle6. Keini zawngin hre chiang turin i zir zel ang u.

 

References and Notes

   1  Kum 1900 hma lama Presbyterian hnahthlak mission, India rama lo lut kha sawi mawlh mawlh tham a ni a, an thawhna hmun leh thawh tan kum nen hengte hi a ni e -

    -  American Board of Commissioner for Foreign Missions, Bombay(1813), Madras Presidency(1834)

  - United Free Church of Scotland, Foreign Missions Committee, Bombay(1823), Poona(1824), Bengal(1830), Madras Presidency(1837),Central Provinces and Bengal(1846),

Ajmere-Merwara(1860)Hyderababd(1862), Rajputana(1863), Bihar and Orissa(1870), Assam(1890

    -  Church of Scotland, Foreign Missions Committee, Bengal(1830), Madras Presidency(1836), Punjab and Kashmir((1857)

  -  Presbyterian Church in the USA, Board of Foreign Missions, Punjab and Kashmir(1834), United Provinces(1836), Bombay(1853), Central India(1874), Assam(1905

    -  Presbyterian Church of Ireland Foreign Missions, Bombay(1840)

-  Church of Scotland Women’s Association for Fordeign Missions, Bengal(1840), Madras Presidency(1843), Punjab and Kashmir(1861)

-  Calvinistic Methodist Church of Wales Foreign Missions(Welsh Presbyterian), Assam(1841), Lushai Hills(1897)

-  Reformed Church in America, Board of Foreign Missions, Madras Presidency(1853)

-  United Presbyterian Church, Board of Foreign Missions(USA), Punjab and Kashmir(1855) North West Frontier(1921)

-  United Presbyterian Church, Women’s General Missionary Society(USA), Punjab and Kashmir(1855), North West Frontier(1921)

-  Presbyterian Church of England, Foreign Missions Committee(Bengal(1862)

-  Presbyterian Church in Canada, Board of Foreign Missions, Central India(1876), Rajputana(1914), United Provinces(1904)

NB: Kum 1900 hnu lamah Associate Reformed  Presbyterian Church(USA), Board of Foreign Missions, Punjab and Kashmir(1906), Presbyterian Church, New Zealand Foreign Missions Committee, Punjab and Kashmir(1910), Reformed Presbyterian Church(USA), General Synod, Board of Foreign Missions, United Provinces(1914) etc.

2  Entirnan, Kolkata khawpuia Scottish Church College(1830) te, Madras Christian College(1835) te, Voorhees College, Vellore(1898)  te, Allahabad-a Ewing Christian College(1902) te, Lahore-a Forman Christian College(1847) te, Sialkot-a Murray College(1889) te, Mumbai-a Wilson College(1832), Rawalpindi-a Gordon College(1893) te, Nagpur-a Hislop College(1883) te hi(Tuna Pakistan hi India ram a nih vek lai a ni a) Presbyterian hnahthlakho din a ni a. Hospital leh medical college ni se Agra Medical Mission Training Institute(1881), Miraj Hospital and Training Institute(1889), Vellore Christian Medical College and Hospital(1900)etc. te hi kan kohhran hnahthlakho sulhnu vek a ni.

3  K.L.Parker, The Development of the United Church of Northern India,(A Doctoral Desertation), 1935. Hei  hi kan hriatna hnar ber a ni.

4  Heng Scottish kohhran pathum hian rei tawk an thawh hnuah Congregational Mission nen infinin 1908 khan ‘South India United Church’ tiin an inzawm khawm a, tun hnuah kohhran pawl dang nen India Chhim Kohhranah an in chhung khawm ta vek a.

5  Jae-Buhm Hwang, The First Asian Ecumenical Confession of Faith: The So-called Twelve Articles of Faith of Many Asian Protestant Churches, The Ecumenical Review, July 2011

6  ‘The Creeds of Christendom’( 3 Vols)  ziaktu Philip Schaff and David S.Schaff(eds) ten an lehkhabuah an telh lo va;Indian Church Historian Stephen Neill-an kam khat pawhin sawi lanna a nei lo. Tun hnaia chhuah, ‘A Dictionary of Asian Christianity’ ah tihlan a ni lo leh a.  Jaroslav Pelikan and Valerie Hotchkiss(eds), Creeds and Confessions of Faith in the Christian Tradition,( Volume 3, Yale University Press 2003) ah telh a ni hek lo. John H.Leith-a ziak, Creeds of the Churches (1982)ah a lang na hek lo. Ziaktu pakhat William A.Curtis-a erawh chuan 1911-a a lehkhabu, ‘History of Creeds and Confessions of Faith in Christendom and Beyond’ ah  ‘the twelve Indian Presbyterian articles’ a ti a. “Kum 1890-a China ram Presbyterian mission kohhrante inpumkhatna” tiin a sawi( Curtis, p.283,284).

 

 

 

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   4814007


Synfo © 2006 : All rights reserved. Mizoram Presbyterian Church Synod : Best @ 1024x768