SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
News Tawi
Comm./Dept./Boards/Profiles
Periodicals
Audio/Visual
Synod Choir
Links
Booklets
FM Radio Hruaina Eng
 
 

 

Kan rama sikul leh college bakah zirna hmun hrang hranga thawktute leh zirlaite tan

Hindi Bible School, Bawngkawn leh Mission Development Training Centre, Bualpui North-a thawktute leh Training mekte tan

Indiarama Theological College hrang hrangte leh Senate of Serampore College (University) tan


 

ISUA A NGAWI RENG (Good Friday Sermon) - By Upa Bonny Lalrindika

                                                                     ISUA A NGAWI RENG
                                                                          (Isaia 53:7; Marka 14:53-61)


                                                                                                                        -   Upa Bonny Lalrindika

Good Friday hi history-a thil thleng pawimawh ber leh nghawng na ber, khawvela sakhaw lian ber hring chhuaktu Pathian Fapa Isua Krista inpekna azara mi zawng zawngin Pathian hnen thlen leh theihna kawng kan lo neih theihna ni a ni a, kan tan ni ropui leh urhsun em em a ni. Kan Synod-in he ni chawhma inkhawma thupui a siam leh a then sawm dan a ngai ngaia ringin he thuchah hi ka han buatsaih a, a chhiartu zawng zawngten Isua Kristaa Pathian hmangaihna ropui tak hi an hmuh chhuah phah theih nan Pathian ropuina atan ka hlan a ni.

ISUA CHU KAWNG HRANG HRANGIN AN HEK
Isua phiartute hi Rev. Chuauthuaman a ziak dan chuan pawl lian pui pui pathum an ni a, pakhat chu Mosia Dan chawisang pawl Pharisaite an ni a, anni hi lehkhaziaktute kan tihte nen khan inthlawp leh inchawm tawn tlat an ni. Pakhat leh chu Juda mitha chhungkaw pawl Sadukaiho an ni a puithiam lalber Kaiapha kha an hotu ber a ni. A dang leh chu Heroda pawlte an ni. An vai hian Isua hi hnawk tiin dah bo an duh theuh a ni.
    
Isua chu man a nih velleh nizan lamah khan puithiam Lalber hnenah an hruai a, chhin khat lek pawh chhing hman miah lovin a chungthu rel turin an hnuk kawi zankhua thak a ni. Chutah chuan puithiam lalte, Upate leh lehkhaziaktute zawng zawng pawh Amah hek tura inthurualin an lo kal khawm bawk a. Dawt thu phuahchawpin a hekna an thawh khawm a ni.
    
An zinga thenkhatte chuan, “He mi hian, ‘He Pathian biak in kuta sak hi ka thiat ang a, ni thum chhungin biak in dang, kuta sak loh mi, ka sa ang,’ a tih kan hria,” te an ti a. Johana 2:19-a Isuan, “He in hi tichhia ulang, ni thum chhungin ka tungding leh ang,” a tih kha an behchhan niin a lang. Mahse ama taksa thu a sawi tih an hrethiam lo a ni.
    
A thenin ramhuai zawlah an puh a, a thenin Pathian sawichhiaah an puh a, a thenin Mosia Dan bawhchhiaa chawlhni serh lovah an puh bawk a. Mahse Juda hnama mi fing filawr, mi phiar ruk thiam thalh pung khawm ho khan Isua thih phah tham thu tling an thawh khawm thei lo. Juda danah thihna tham khawp thupawi chu hretu pakhat aia tam an awm ngei a ngai a, an hekna thu a inan chiah a ngai bawk. Isua hektute hi pawl hrang hrang an ni a, an huat chhan a inan tlat loh avangin an hekna thu a inang thei lo a nih hmel.

AN HEKNATE A CHHANG LET LO
Thiamna inhre ran chunga ngawih reng harsatzia hi kan hre chiang vekin a rinawm. Amah hektute khan a thihna khawp turin hekna inang thawh khawm thei lo mahsela, a thihna avanga lo dam turte tana mahni inphatsanin Isua chuan a thihna khawp tur thu pawi chu amah leh amah a insiam chawp ta zawk a. An huat ber thu "Lal ka ni" tih a puan khum a ni.
    
Kaisara lo lal dang nei lote hnenah khan Lal a nih thu thudik chu a puang ta a, chu thudik avang chuan a thi dawn ta zawk a nih chu. Itsikna chu a chawh thawh zual tak avangin. Puithiam Lalber, Isua ertute zinga phusa bera ngaih Kaiapha chu a laiah a ding chhuak a, Isua hnenah, “Engmahin i chhang lo maw? Heng hian an hekna che hi engtizia nge ni?” tiin a zawt a. Ani erawh chu a ngawi reng a, engmahin a chhang lo.
    
Puithiam Lalber chuan a hnenah, “Krista, Engthawla Fapa chu i ni em?” tiin a zawt leh a, Isuan, “Ni e; Mihring Fapa hi Thiltihtheihna ding lama thu a, van chhum zinga lo kal in la hmu dawn a ni,” a han ti ta a. Chu velleh puithiam Lalber chuan a duh nghak chhuak taah inngaiin a silhfente a pawtthler a, “Hretu dang enge kan ngaih tawh ang? Pathian a sawichhiat zia in hre tawh a; engtin nge in ngaih?” a ti a. An zain ani chu thi tlakah an ruat ta hlawm a nih kha. Vawiin thleng pawh hian mi tam tak nunah Isua chu khenbeh a la ni reng a, Kohhranhote zingah ngei pawh hian tidamtu atana pawm duh, tihlimtu atana pawm duh (Min tiharh leh rawh ti a au au reng), Harsatna chinfelsaktu atana pawm duh, Lal atana pawm duh si lote hian kan khengbet mek reng a ni.
    
Dawt phuahchawp hlira hektute hmaah khan Isua khan Beramno ti a koh a va inhmeh em! Beram chu a pu hruaina lam apianga kal thin, a thihna tur hmun ngei pawh ngawi renga pan mai thin, a saruak khuhna hmul ngei an mehsak lai pawha aw chhuah ngai lo a ni. Zing lama Pilata hnena an hruai leh pawh khan Pilata khan Isua kha chhan a duh ru hle a, Judaten an heknaah chuan a fihlim tih a hmu chiang si a. A nupui ngeiin a mumang avangin chhuah turin a lo tur ve reng bawk si a. Mahse Kaisara laka a dinhmun leh a hnain a tuar a hlauh avangin ama thu ngawt chuan a chhuah ngam bik si lo.
    
Isua kha han tawng ve hlek sela chuan a insawi fihlim thei tih pawh a hmu chiang a ni. An hekna zozai che hi engtizia nge a han ti thin a, Isua a ngawi tlat mai si khan Pilata kha a timangang letling a ni. Zawlnei Isaia ka hmanga Pathianin Khawvel sual chhandamtu tur Pathian Beram No a sawi kha Isua hi a ni ngei tih an hriat nan, Beramno a hmul mettu hmaa a ngawi reng ang maiin a ka a ang lo tih ama chungchanga hrilhlawkna chu, Rorelna inah Isuan a rawn nunpui ta a ni. Isaia hrilhlawkna chu a hnu kum zabi 7 zet liam hnuah a lo thleng ta.
    
Pilata chuan Isua chhuah turin kawng dang a zawng leh a, duhthlanna awlsam lutuk tur nia a ngaih hmangin Isua leh suamhmang rawva zet mai Barabba chu a tu zawk nge a chhuahsak ang tih duhthlanna a pe leh ta a. Pilata ngaihdan chuan Osama Bin Laden nge in duh Billy Graham tih tluka chiangah a ngai a ni. Chutah pawh chuan mipuite chuan Barabba an thlang leh ta tlat mai. Pilata khan mak a va ti dawn em!
    
Mahse Isua kha Barabba ai pawhin a tenawm zawk tlat a ni. Eng vangin maw? Barabba sualna te, Nang leh keia sual, Khawvel sual zawng zawng kha a phur vek tawh a lawm. Chu chu Pilata khan a hre ve lo a ni. Isua khan a thihna kha nang leh keia chunga Pathian thinurna mei alh tidaitu tur a ni tih a hre reng a, chu chu min duhsak zawk avangin insawi fihlim turin a ka a ang thei lo a ni.

THIAM THU A SAWI LO
Rorelna a hmachhawn lai khan mi dang sual mawh phurhtir mai a nih thu sawi ve sela, mahni inhlih fai theihna chu a nei a ni. Mahse kan sualnate chu a sualnaah a pawm tak avangin thiam thu sawi thei lovin keini hian kan siam a ni. Khawvel damna tura mahni a inphat faina hmunah kha chuan damlo tidam thei hmel a pu tawh lo va, thilmak ti thei hmel leh Lal hmel reng reng a hmelah a lang tawh lo. Thunei taka zirtir thintu kha tlawm leh zak taka siam a ni a, nunna Lal chu thi turin an hruai ta a ni.
    
A thihna chauh lo chuan Pathian nena inpawlna hmun thianghlim ber chu engmahin min hawnsak theih tawh loh avangin (Thu Puan 5:5), thihna pumpelh theihna zawng zawng chu a hnuchhawn zo ta a ni. Krista inhlanna chauh lo chu ruihhlo ngai te, zungawl vei te, Hlep ru te, den hlum tlak uire leh mihur te, chapo phah tham khawp felna neite tan ngei pawh damna kawng a awm si lo.
    
Kan thatna sang ber nen pawh hian inlan theuh ila, Pathian hmaah chuan mi bawlhhlawh, kephah hnuai atanga lu chhip thlenga dam lai reng reng awm lo (Isaia 1:6)
- Sakhaw puithiam misual, chhamdamtu mamawh, vantlang nun siamthatu misual, chhandamtu mamawh. mi rethei tanpui thintu misual, chhandamtu mamawh, mize tha leh zaidam misual, chhandamtu mamawh kan ni hlawm si a.

Krista thihna hian sual anchhe laka min tihfihlim chauh a tum lo va, min siamtu Pathian hnen ngeia kan kir leh theih nan kawng min hawnsak a tum a ni. Sual leh chin dan tha lo kan kalsan nan mai a ni lo va, Pathian hnen ngeia kan haw leh theih nan a ni. Nun sual sim ngawt hian min chhandam lo va, Pathian hnenah ngei kan kir leh tur a ni. Chutah chauh chuan siamtharna chu a awm a, chutah chauh chuan Krista inhlanna chu tihpuitlinin a awm thei. Chu chu Pathian thupek a ni a, Lalpan Israel fate hnenah "Aw Israel, i inlamlet chuan ka hnenah ngei i lo let tur a ni" (Jeremia 4:1) a tih ang khan. I zu in thin leh ruihhlo i khawih thin i nin em em ringawt hian a tidanglam lo che a, Pathian hnenah ngei i kir leh tur a ni
    
Krista inngaihtlawmna ropui tak chuan kan Bible ngei pawh hi thu nungah a siam a ni. A thiltihtheihna lekin inchhanhim duh sela chuan Bible meuh pawh hi kan tan chuan mihring nuna thim thu ziakna bu mai a ni dawn si a. Krawsa an khenbeh Isua kha kan en chuan "Hetah hian nangmah vang khan ka awm a, ka phurh hi nangma sual kha a ni a, ka tawrh hi i laka Pathian anchhia kha a ni a, ka rulh mek hi i leiba kha a ni" min ti a nih chu. Nang leh kei vanga ngawi renga kan sual hremna tuartu Lalpa chu fakin awm rawh se.
    
Tichuan Pathian Fapa thianghlim chu nangmah kal tlanga a nun tawhna turin, i nun chhe lailet der chu lain krawsah khan a thihpui ta a ni. Kan Lalpan krawsa Pathian rorelna kan aiawha a lo hmachhawn dan entawn hian, hrehawm tinrengah te, itsikna hmunah te, dawta tihmualphova kan awmna hmunah te hian ngawi rengin A kraws hi kan luah ve thei ang em?.
    
Isua krawsa hmangaihna kan hmuh hi a ropui mang e. Misual zawk fel zawk anga a lan mek lai pawha, mi fel zawkin ngawi renga sual zawk chan a channa hi a ni a, krawsah chuan mahni tan engmah a tih theih loh. Kalvari thinlung chu ani him sela, keiin tuar zawk ila tih hi a ni tlat mai. Thupawia inkhing mek kan awm em le? Nupa inrem lo inhmu peih lo mek te, thenawmte nena thupawi neia inbe peih lo mek te, thiam thu sawi tur tam tak nei zawng zawngten kan thiam thu nen Krawsa mifel Isua hi i hnaih ang u.
    
Chutah chuan Lalber meuhvin thiam thu a sawi loh laia keini chhiahhlawhten thiam thu sawi kan lo inchuh thin hi kan nihna tur a nih lohzia kan hmu ngei ang. Krawsah chuan thiam lo nih inchuhin mi an inhnial tawh zawk a; chutah chuan sual zawk nih ngamte avangin inremna a lo thleng a, sual zawk ni ngamte chu Lalpan a lo chawimawi thin a ni. Kan Committee-na hmun atan te hian kan va mamawh em.
    
Kraws Pathian thiltihtheihna kan hriat dan te pawh hi a dik tawk lo fo thin. He kraws hmang hian ropui taka hneh rup rup te kan tum thin a ni awm e. Kraws thiltihtheihna chu Pathian Fapa meuh a inphah hniamnaah khan a ni a awm ni. Upa Thangsiama chuan Petera kha Eden pasaltha a ti a, Isua chu Gethsemani pasaltha a ti. Eden huan pasaltha Peteran khandaih nen tan a khawh lai khan, Gethsemani pasaltha Isua erawh chuan "I khandaih kha a paiah khung rawh" a ti mai a ni.
    
Thiamthu khandaih te, thuneihna khandaih te, khawtlanga thiltithei nihna khandaihte hi chuan indona mai a ni a cho chhuah thin ni. Krista chuan lalthutthleng leh lei leh vana thuneihna te chu ngawi renga kraws puin a ni a hlawh chhuah ni. Rawngbawltute tana Nunna lallukhum tiam ngei pawh hi hrehawmah pawh phunchiar lova ngawi renga kraws luah peihte tan a ni.
    
Unau duh tak, i sual i hriat chhuah fote hian a tibeidawng thin che em? I sualna ngei hmanga setanan i bawlhhlawhzia a hriattir hun che apiang khan, that tumna nei thei tawh lova inngaia beidawng mai lovin, Krista chu chuti ang misual tan chuan a lo thi tawh tih hi hre chhuak thin ang che. Vawiinah hian mi dang sualna tam tak vanga te, ram bawhchhiatna avangtea tap chunga tawngtai chu kan thei a ni maithei e. Mahse mahni sualna vang ngeia tap chunga, sima a kraws pan turin Lalpan min sawm a ni.

Pathianin a thu mal sawm rawh se. Amen.

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   4733691


Synfo © 2006 : All rights reserved. Mizoram Presbyterian Church Synod : Best @ 1024x768