SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Synod Puipate – Moderator, Secretary te, Finance Officer-te, Statistician leh Executive Secretary te tan

Damlo leh harsatna chi hrang hrang tawkte tan

Wales rama Presbyterian Kohhran tan – Pathian Thlarau Thianghlim tihharhna leh tihchakna an dawn zel theih nan


 

CNI, DIOCESE OF CALCUTTA TLAWH THU - Upa Zonunmawia

August 14 (Thawhtanni)-ah Lengpui Airport atangin Kolkata kan pan a, Upa C. Hmingthanga chu chhungkaw programme engemaw avangin kan ruala kal lovin a tukah a lo kal ve thung a. Independence Day dawn hnaih a nih bakah Al Qaida Sucide Squad ten thlawhna bomb chhiat an tum tih thawm awm lai a ni a, Security Check an uluk hle a, Passengers’ baggage an en ulukin ken phal loh pawh an ngah hle. Ka tootpaste, eyedrop leh sahbon ka chan phah nghe nghe. Chawhnu dar 2:30 velah Kolkata Airport-ah kan tum a, CNI leh Synod House lam miten min lo hmuak a. St. James Church (AJC Bose Road) hungchhunga Monica Guest House-ah min thlentir a. Pindan 2 min lo zuahsak a, amaherawhchu pindan pakhat zawkah bathroom a awm ve loh avangin bathroom 1 kan intawm a, a buaithlak khawp mai. 

August 15 (Thawhlehni):

Zingah kan thlenna bul St. James Church-ah kan inkhawm nghal a. He Biak Inah hian tuk tin zing dar 6:30-ah Holy Communion an nei ziah a. August 15 hi India Independence Day a nih avangin an inkhawm hun dar 7:00-ah an lo sawn a, ni dang zawng aiin inkhawm pawh an thahnem zual a ni. Zing karah Lalpa Zanriah Sakramen kan kil a, ram tan leh ram hruaitute tana tawngtaina te kan nei a. Inkhawm banah Biak In tualah an Pastor-in India hnam puanzar a pawt pharh a, Jana gana mana kan sa rual a, Pastor vekin malsawmnain min tin a, keini tan chuan thil thar mak tak a ni.

Hemi ni vek hian St. John’s Diocesan Girls’ Higher Secondary School Independence Day lawmnaah kan tel a. An State Assembly Speaker chu Chief Guest a ni. Keiniho chu Enclosure chhung tlar hmasa berah min thuttir ve a, min lo lawm thiam hle a, kan tel ve thu pawh vawi 2 lai an sawi lang nghe nghe. Zirlaiten zai, lam leh thil hmuhnawm chi hrang hrang an entir a, an programme a fel faiin mit leh beng a tlai kher mai. Hemi zawh hian an Principal Office-ah inkawmhona kan nei a, kan duh duh kan zawt a, tha takin min chhang zel a, an school building leh hmun hrang hrang chipchiar takin min fanpui bawk. Hetah hian chhun chaw min lo buatsaihsak a, kan ei nghal a ni.

Tlai lamah Holy Trinity Church-ah an Independence Day lawmna programme bawk kan hmanpui leh a, Bengali Service a ni a, Sunday School naupang leh Thalai lamin hun an hmang a. An Kohhran an ropui vak lo. A hun takah an tan thei lo va, Sound System vel a tha lo hle bawk.. Vande Mataram hla rema tleirawl 4 ten Indian Classical Dance an bei erawh a hmuhnawm nangiang mai. Kan Dinner eina tur lamah kan tlai dawn avangin an programme zawh hmain kan hawsan ta a. An programme changkang lutuk lo mah se, an inbuatsaihna atana an buai ve dan tur te ngaihtuah chuan lawmawm tak a ni. Tin, Kolkata khawpui daifem, mi tin mi tang chen khawmna hmunah khatianga an tlin ang tawk tawka Kohhran thahnemngai an lo awm ve kha a ropui ve hrim hrim bawk.  

August 16 (Nilaini):

Serampore College kan tlawh a. Serampore hi chu CNI ho enkawl a ni lo va, Kolkata thlen takah chuan a enkawltu Principal ber Mizo a nih lai a lo ni bawk nen kan tlawh tel duh ngei ringin programme-ah an lo telh a ni. Principal Rev. Dr. Lalchungnunga chennaah kan lut phawt a, inhmelhriattirna te kan neih zawhah College kan fang a, William Carey-a Museum & Library kan tlawh a, a hmuhnawmin a bengvarthlak hle. Kan thil en apiang Rev. Lalchungnungan a hrilhfiah zel a, uluk takin video-in thla kan la a, Library leh Hostel te kan tlawh bawk a, Rev. Lalchungnunga thiannuin chhun chaw min buatsaihsak a, chaw ei khamah an College Prayer Meeting kan telpui bawk. Hemi zawhah hian thil dang tam tak kan fan chhunzawm leh a, William Carey-a thlanah kan tawp a. Bishop’s College tlawh turin kan tlan kir leh ngar ngar a. Tlai dar 4 velah kan thleng a, meeting an lo nei a, kan tel zui a. Hemi zawh hian an Principal leh staff thenkhatte nen kan inkawm a, an Library leh Archives te min tlawhpui. Mizo zirlai chhungkuaa chengte kan tlawh a, thingpui tui tak min lo lum a, kan hlim tlang hle. 

August 17 (Ningani):

St. James’ School kan tlawh a, hei hi mipa sikul a ni a. Kan thlenna bul St. James Church sir chiaha awm a ni a, a leh lamah Pratt Memorial School a awm bawk a, hei hi hmeichhia chauh kalna a ni thung. St. James’ School hi an Office atanga Classroom hrang hrang leh an Library leh IT Room te min fanpui a. Thil an nei changtlung hle a. Zirtirtute hawiher leh sikul naupangte chetla a hmuhnawm khawp mai. Thil engpawh zawt ila, phur tak leh hlim hmel pu sarhin min chhang thei vek mai a, tlangnel lutuk palh pawh hlauhawm tak zawk a ni. An Classroom leh corridor sei tak tak chu naupangte kutchhuak lemziak leh thuziak mawi tak taka chei a ni a, a hmuhnawm tham kher mai. 

Chawhnu lamah Scottish Church College kan tlawh a. Hei hi Scottish Presbyterian Church ho din a ni nghe nghe a. Presbyterian Kohhran din a nih vang nge min lo dawnsawn dan a danglam zar mai. An Principal Office-ah dawhkan bial lianpui kilin kan thuho a. A tir atang phatin kan tlangnel a, a nuam kan ti em em ringawt. A hnua kan sawikhawm leh pawhin kan hrethiam bik lo, hmun dangah khan min lo dawngsawng tha em em vek a, he Scottish Church College-ah hian hmun danga an tih loh dan thil danglam tak an tih bik pawh kan hre chuang lo. Thil chiang em em pakhat chu – an hotupa ber leh a thawhpuite hawihhawmna bakah an inngaihtlawmna hmuh theiha lang khan min hneh ni berin ka hria. An College hian Post Graduate zirna te an lo nei tawh lehnghal a, an Staff room, Chapel, Library, Science Laboratory leh Auditorium te min tlawhpui a, phur takin a chanchin min hrilh bawrh bawrh bawk a. An Library-a an roh em em Subash Chandra Bose-a signature dik tak leh Alexander Duff-a kutziakte min hmuhtir a, thlalak te min phalsak vek bawk a. An Botany Department hotute phei chuan an zirlaite Mizorama rawn hruai a, Medicinal Plants chanchin rawn zir chian an chak thu min hrilh mawlh mawlh mai. 

Hemi zawh hian Rev. Zobiaktluanga te chenna kan tlawh zawk a, thingpui kan in a, chumi hnuah Alexander Duff-a Biak In min tlawhpui a. Biak In lian vak lo hlui tawh tak, thing rap tawh mai hi a ni a, a chhung chu an tifai hle tho va. Hetah hian hla 2 kan sa a, tawngtaina hun te kan hmang a. A lunglenthlak a, a lungchhiatthlak lek lek bawk. Alexander Duff-a hi a chanchin kan hriat fo Scottish Presbyterin Church Missionary a ni a. Kum upa tak a nih hnuah Scotland-ah a kir a. Biak Ina a thusawinaah India rama hnathawh tur a tam zia sawiin Missionary Challenge a siam a, chhangtu tumah an awm lo va, sawmna a siam zui mek laiin nikhaw hre lovin a tlu ta a. An han bawihsawm a, a lo harh leh chuan, “ka sawi tur ka la sawi zo lo” tiin pulpit-ah a lawn chho leh a, “India rama kal tur mi dang kan awm loh chuan kei putar hi ka han kal leh ang a, chutah chuan ka lu ka phum mai a ni ang chu”, a han tih meuh chuan mi tam takin a challenge siam chu an chhang ta a ni. 

Tlai lamah Kestopur Child Development Centre min tlawhpui a. Hetah hian naupang rethei engemaw zat special tution an neihpui thin a. Chhunah sikul pangngaiah an kal a, tlai tin an sikul ban atangin class hi an neihpui a, ei leh in tur an pe bawk thin. Hemi remchanga hmang hian Pathian thu leh hlate an zirtir a, Chanchin Tha an hrilh thei a ni. Heta lut tur hian mirethei tak tak chauh an thlang a, an chhungkaw eizawnna te an enfiah vek hnuah chhungkaw khat atangin naupang pakhat kal an phal chauh a ni. An sikul hman lai building chu a la chhe hle a, a bul lawkah building thar lian tak an sa mek bawk a ni. Mizoram Synod hmingin tanpuina (donation) tlem a zawng pek kan tum chu an la duh der lo. ‘Foreign lam atanga tanpuina dawng kan ni a, min hrethiam ula, hetiang hi kan dawng thiang lo. Kan lawm khawp mai’, an ti mai. 

August 18 (Zirtawpni):

Hemi ni hian Behala-ah Oxford Mission rawngbawlna min tlawhpui a. An library kan tlawh hmasa ber a, thingpui kan inho a. An lehkhabu hrang hrang kan enkual laiin Pu Malsawmdawnglianan Pu Buanga & Sap Upa te A Grammar and Dictionary of the Lushai Language (Duhlien Dialect), kum 1898-a chhut original copy a hmu fuh hlauh mai a. Hawh chhuah a, a copy siam ve kan dil a, ihe lovin min phalsak ta mai a, a mak kan ti hle mai. HIV & AIDS veite enkawlna tur hmun an siam thar kan fang a, an inpeih thawkhat hle tawh a, mahse dam lo an la awm chiah lo a ni. Hemi  bul lawkah hian tar enkawlna a awm a, chhungte nei tawh lo leh la neite pawh an awm nual a, mipa 3 leh hmeichhia 24 an awm a. Kan be nual a, an hlim ve hmel khawp mai. A bul chiaha Florence Nursing School kan tlawh nghal a, an hotunu chu a tui lutuk a, min chelh rei dawn lutukin kan hria a, chhuanlam eng eng emaw siamin kan kalsan thei ta hram a. Ani hi Mizoram RIPANS-ah pawh tum engemaw zat a lo kal tawh a ni awm e. Heta tang hian Bengali Medium School kan tlawh leh a, zirlai an thahnem hle. A piah deuhah Fahrah Enkawlna kan tlawh bawk a, heta awmte hi nu leh pa nei tawh lo chauh ni lovin nu chauh nei te, pa chauh neite pawh an ni nual a, zirna lam timite chu Class XII thleng an zirtir a, zirna lam tui lote chu an tuina zawng Training engemaw an dappui thin. Helai bula St. Peter’s Church Hall-ah chhun chaw kan ei a, kan chaw ei laiin nu pakhatin harmonium nen zaiin min awi. 

Mizoram House kan tlawh zawk a, thingpui kan in a. Tlai lamah Howrah lamah kan kal a, TB Hospital kan tlawh a. Hetah hian mirethei TB vei, inenkawlna nei lo tam tak an awm a. A thente chu an pasal ten an tlabosante an ni nawk a. Tin, hmeichhe naupang kum 14 mi nausen pawm, nau pai leh mek, TB vei pawh a awm a, nufa HIV Positive, TB vei te pawh an awm bawk. An damdawi in a nuamin a thianghlim hle a. Fimkhur thu hlaah kan luh hmain hmaituamna (mask) min pe vek a, hmai kan tuam far vek a. Kan han lut chu min lo lawm em em mai a, vai chibai inbuk ang hian chibai min lo buk dial dial hlawm a, an lainatawm kher mai. 

Hemi zawh hian St. Thomas’ School kan tlawh a. An Principal Office-ah kan inkawm a, thil tam tak kan zawt a, min chhang tha kher mai. St. Thomas’ School hi St. Thomas Church hungchhunga awm a ni a, an Biak In hi kan tlawh nghal a, a ropui khawp mai. Hetah hian zanriah min buatsaihsak nghal a ni. 

August 19 (Inrinni):

Chhunah thenkhatin Pratt Memorial School an tlawh a, tlai lamah Bishop’s House-ah Kohhran hruaitute nen inkawm hona kan nei a, an lo kal tha hle a, thil tam tak kan inzawt tawn a. Tlai dar 5 atang zan dar 8 thleng rawk kan inkawm a, kan kham lo tlang viau niin a lang a, an Kohhran Hmeichhe hruaitu lamin thil hriat chak an la ngah zual. 

August 20 (Pathianni):

Group 3-ah kan inthen a. Rev. Dr. R. Lalbiakmawia Group te Union Church-ah an inkhawm a, Pu Malsawmdawngliana Group St. Mary’s Church-ah an inkhawm a, Upa C. Hmingthanga Group te St. Paul’s Cathedral-ah kan inkhawm bawk a. St. Paul’s Cathedral hi an Biak In Pui ber a ni a, member pawh an ngah ber a, Bishop thutchilhna hmun a ni bawk a. CNI Bishop hi hmun dangah programme a neih loh chuan St. Paul’s Cathedral-ah hian a lawi thin a ni. An biak in hrang hrangah hian Bishop a rawn inkhawm tuma a thutna tur an siam hran deuh vek bawk. St. Paul’s Cathedral-a an organ ri hi a puiin zai min hruai tha hle a, hla 5 lai kan sa a, sakramen kan theh nghal a. Hla hnuhnungah ‘Nangma thil ropuite an sawi’ tih kan han sa mai chu nawn awn awn a chakawm ve kher mai. Tin, he biak inah hian a pawn lam leh chhung lamah video thlalak an remti lo va. Inkhawm ban hnuah an Puithiamin special permission min pe a, biak in ruak thla kan la ta ringawt a ni. Inkhawm banah hian Cathedral bul lawka Rev. Simick-a te inah chhun chaw kan ei a, a nupui hi Kohhran hmeichhe ziaktu a ni a, Sawmi nen khun khan takin an inkawm a, keinin (Upa C. Hmingthanga & Rev. Lianhmingthanga Sailo nen) a pasal leh an Australian mikhual kan kawm thung. 

Tlai dar 4 ah Mizo Service-ah kan inkhawm a. Mizo Service hi St. John’s Biak Inah an nei a, mi 100 vel zet an kalkhawm thei a, ‘kan tlem lai’ an ti. Sunday School an khaikhawm a, Petera Lehkhathawn an zir a, Rev. Dr. R. Lalbiakmawian thuchah tawi a sawi bawk. Inkhawm banah thingpui kan inho a. St. John’s Biak In bul chiah hi Bishop chenna in a ni a, hetah hian Bishop zanriah hnuhnung min buatsaihsak ei turin kan kal nghal a. Inkawmhona hun tha tak kan nei a, inleng dang a nei deuh reng bawk a. Puar taka chaw kan eikham hnuah kan thlenna hmun lam panin kan haw ta a ni. 

August 21 (Thawhtanni):

CNI hotu Rev. Biswas, Rev. Adhikari leh Mr. Argo ten Airport thleng min thlah a. Kolkata atangin 11:25 am. ah kan thlawk chhuak a, 12:30 pm. ah dam takin Lengpui Airport kan thleng. 

CNI, Calcutta Diocese tlawh atanga rilrua thil lo langte: 

1.      CNI ho hi khawtlang tana rawngbawlna (social work) leh zirna in enkawlah chuan an bei tha hle a, an Kohhran erawh a nung vak lo. Thlarau lamah an pachhia, a tih theih awm e. An Bishop pawhin, mi tam zawk, thalaite pawh an rawngbawlna tlawha hun neihpui turin min chah nasa a, ‘spiritual lama kaihharh kan ngai a ni’ a ti ve tawp mai.

2.      Building tha tak tak, Biak In ropui tak tak, kum 1800 chho vela din tawh deuh hlir an nei a, hma thar lakna hmuh tur a tam lo khawp mai. Mihuai hmasate liam hnuah thangthar ten eng nge an tih ve aw? tih zawhna min siam nasa hle.

3.      An sikul a tha a, fee pawh a sang a, an intodelh bakah kum tin nuai tam tak Kohhranah an chhung lut thei hlawm a. Foreign leh State sawrkar atanga tanpuina an dawng ngai lo va, beisei enah pawh an en lo niin a lang.

4.      Zirna hotute an dah lal hle a, Board hnuaia awm tho ni mah se thuneihna sang tak an nei niin a lang. School Building (Block) thenkhat chu an Principal thawk lai hming chawia sakte a ni a, an building thenkhat chu an Principal-in a hawn (inaugurate) a awm nual bawk.

5.      Kohhran thenkhatah chuan member inkhawm an tlem thei khawp mai a. Mahse, inkhawm tlem avangin an service an la zam mai chuang lo va, urhsun takin, an tih dan pangngaiin an kalpui thlap tho.

6.      Lalpa Zanriah Sakramen theh an uar hle a, tuk tina theh Kohhran te pawh an awm bawk. Sakramen kil turin maicham hmaah kan va thingthi a, Puithiamin chhang a rawn sem a, kan chalah dawmin a tawngtai zel a, a hnuah Wine min rawn tulh leh thin. Wine hi no pakhata mi kan indut tawm vek a ni.

7.      Independence Day hi Kohhranin an ngai pawimawh hle a. A puala inkhawmna hial te an buatsaih a. Hnam inpumkhatna te, ram leh ram hruaitute tana tawngtai te an bei urhsun hle a ni.

8.      CNI Kohhran hi United Church of Northern India, Anglican Church of India, British and Australian Methodist Churches, Council of Baptist Churches in Northern India, Church of Brethren leh Disciples of Jesus Christ te inzawmkhawmin kum 1970-a an din kha a ni a. Kohhran hrang hrang inchawhpawlh leh inzawmkhawm an ni a. Kohhran tinin an tih dan phung an chhawm nung zel a, an inpawmpui tlang a, an rawngbawlnain a chhiat phah lem lo niin a lang.

Upa Zonunmawia

Coordinator

Synod Information & Publicity Deparment

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2530824


Synfo © 2006 : All rights reserved. Mizoram Presbyterian Church Synod : Best @ 1024x768