SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Khawvel ram hrang hranga hruaitu lian – an Lal, President leh Prime Minister ten dikna leh zalenna an ken kawh zel theih nan

Khawvelah inhuatna, tharum thawhna leh indonate a lo reha, inunauna leh inpumkhatna a lo awm theih nan. He lama hma latu UNO tan

Khawvelah remna leh muanna a thlen theih nan


 

CHHUNGKAW THA DIN TURA HMEICHHIATE THA TIHCHAK DAN TUR (Empowerment of Women in building family life) - By Rev. C. Rosiama

CHHUNGKAW THA DIN TURA HMEICHHIATE THA TIHCHAK DAN TUR

(Empowerment of Women in building family life)

Rev. C. Rosiama

Mipa leh hmeichhe inneihna hmangin chhungkua a lo awm a. Chhungkua chu engtinnge an inkungkaihtawn ang a, engtin nge an nunho zel ang tih thuah hnam hrang hrang ngaihdan a inang vek lem lo. Hnam khat ngaihdan rau rau pawh a hun azirin a inthlak fo thin. Tunah hian Mizo Kristianten chhungkaw tha zawk kan din theih nan kan hmeichhiate hi tun aia thunei leh thil ti thei lehzuala siam dan tur a awm em tih lam chhui deuh bik kan tum dawn a, mipa thupbo tumna paper a ni lo tih pawh lo hre tel ila.

1.     Chhungkua hi nu bu zawl a ni :

        Mihring benga ri rimawi ber thu pathum an sawi chu Nu, Chhungkua, Vanram tihte hi a ni an ti thin. Chu chuan chhungkua leh nu inzawm dan chu a sawifiah nghal. Chhungkuaa nu awm danin chhungkaw nun dan a hril thui hle. Nu an hlim rengna inchhung chu a nuam a, pasal leh fate tan damdawi a tling. Chuvang chuan chhungkaw tan chuan “Pastor chengkhat aiin nu pawisa pakhat a tangkai zawk” an lo ti thin a ni. Fate thlarau nun thlenga hruai thei an nih avangin nute hi Pathian nau awmtu an ni an ti bawk thin. Nu mitmei azirin in chhung a nuamin a nuam lo thei a, mi dang awm vete tan tlangnel leh tlangnel loh theihna chhan pui ber a ni thin. Pa ho tawngkam ri zing pawl tak chu “Khawnge i nu?” tih hi a ni hial awm e. Chuvangin nupui tha chu pasalte tan lallukhum an tling tak tak a ni. Na tuar mangang au chhuah theih vawrtawp pawh “Awi! Ka nu!” tih a ni fo. Nu chu chhungkaw lalnu (queen) a ni.

2.     Pasal - fanaute hmangin nuin chhungkua a uap thin :

        Nu fing chuan an pasalte chakna hmangin chhungkua an uap a. Khawthlang lama pa pakhat hian an tualah thing a ek a, a nupuiin a lo thlir a,“Mama pa, i hah tawh em mai, chawl tawh teh, khangte chu zawi zawiin ka la ek ve mai ang” a ti a. An pa chuan nui deuh sung chung hian, “Chutin min ti suh, ka inek hlum ang e!” a ti a. A chêk na tawlh tawlh mai a ni. Chu chu a ni mai a, pa chakna te, a huaisenna te, a finna te hi nu fing chuan an duh hun hunah an hmang zung zung mai a ni.

        Hmeichhe pakhat mai tan engkim a tih theih loh. Mahse a fate zawng zawng chu nu kutke leh hmanrua vek an ni. Nu â chuan an fate hi ânbûrah an hmang a, nu fing chuan an fate hi engkimah an chhawr tangkai mai a ni. Hmeithai pakhat ka hriat chian em em hian fapa pathum a nei a, a fate chu lehkha pawh a zir santir thei lo; mahse an nungchang a tha a, an fel em em vek a, an nu chu an zah thiam a, an nu pawh chuan an hmaichhanah, “Ka fate ho hi chu in va tha tak em!” a ti mawlh mawlh thin. Pasal-fanaute finna leh theihna hmang thiam nu apiangin thiltihtheihna an ngah a ni ber mai.

3.     Nu thahnemngaiin hriat thiam loh an hlawh chawk thin :

        Hmeichhiate hi mipa tanpuitu tura siam an ni a. Mi tanpui tumna hi an pianken a ni. Hmeichhiain mi dangte awm dan tur tha an tih leh tih loh an lo sawi zung zungna chhan hi Pathianin a siam anga an pianken zia a ni. An pasalte awm dan tur an lo sawi zung zung a, an fate awm dan tur an sawi bawk a, thenawmte awm dan tur thlengin an lo sawi zung zung thin. Tum khat pawh kan pafain kan tualah lei kan lo chhung a, mi lian tak nupa hi an lo kal a, an nu chuan, “Khatia in chhun chuan tui leih nghal zel rawh u aw” a ti a. An pa chuan, “Chungte chu lo sawi ve lo la, an duh leh an leih ang a, an duh loh leh an leih loh ang a....” a ti a. An nu chuan, “Aw, keini pawh kan leih lohva a that lohzia i hriat reng kha!” a ti mai a. Chu chuan mipa zia leh hmeichhe zia chu a tichiang nghal der mai. Pa chuan an nu chu chimawm kan tih a hlau. Mahse chu nu chu chimawm tum a ni lo, min puih a tum a ni.

       In chhungah hian nu thahnemngaiin a chhungte thiltih tha fak nan an hun an hmang tam hman lo, a la tha lo lai deuh, han siam that hleka tha lehzual tur hi an hmu thei em em a, siam that lehzual (improve) tur hlir hi an ngaihtuah a. John Gray-a chuan, “Hmeichhia hi amah chauh pawh hian ‘Home Improvement Committee’ a ni tawp mai a ni,” a ti. In chhung thil tha lo lai a sawi a sawi hi a âng peih, a phun chiar kan lo ti mai thin a, kan ning a, kan ngei a, kan run a, kan haw fo thin. A nihna takah chuan huat leh ngei hrim hrim atana sawi a ni hauh lova, inchhungkhur tih changtlun lehzual nan a committee a lo ni reng mai a. Mi committee lo huat em em te chu kan lo hriat sual vang mai a lo ni zawk; mi committee ve te!

       Hmeichhe Home Improvement Committee tana harsa ber chu hriatthiam an hlawh lo hi a ni. An thahnemngaih vanga an sawi leh an tih a ni tih hriatpuitu aiin nin leh ngeia latu kan tam zawk zel avangin an tum angin an hlawhtling lova. Nin satliah pawh ni lovin, min control an tum vang leh an sual vangah kan lo ngai fova, lo tawiawm chu sawi loh, a dodal leh a hnial zawngin rilru kan lo pu a, chu chu an tan a na a, a beidawnthlak bawk a. Hmeichhe rilru na leh beidawng chu a hlim theih loh va, tûm leh tawng duh lohvah an tlak a, chu chuan sawtna a la neih bawk si loh avangin ân leh tihtauh lamah an tuan leh a, chu chuan mi dangte rilru a tina zual a, a tawpah chuan in chhung boruak zawng zawngin a chhiatphah fo thin. A tira rilru tha tak leh thahnemngaih vanga an tih pawh kha a tawpah chuan an tum loh deuhvin mi sual nih an hlawh ta hlauh thin a, an khawngaih thlak hle.

4.    Chhungkuaa hmeichhiate tha tihchak lehzual dan tur :

       Mizo Kristian chhungkuaah hmeichhiate chu engtin nge an tha kan tih chak lehzual tak ang le?              

(i) Chhungkaw kalphung tur zam sa chhungah an thuneihna tur chin siam thiam a tha:

             Fiamthu-a an sawi thin chu - America ramah chuan Car thar lei te, in thar sak leh chenna sawn vel hi chu hmeichhe thu thu a ni a, paho chuan engmah an sawi ve ngai lo; paho inhmukhawmin an sawi ve ber chu, “Engtikah nge thlaah kan lawn leh ang?” “Nuclear ralthuam kan siam ve tawh mai dawn em ni?” tihte hi a ni an ti a. Mizo pa chuan, “Ka in, ka lo” tih an ching a. Chhungkaw hotu an nihzia tihlanna atan an hmang thin. Stanley-a chuan, “I in chhungah Lalpa (king) anga awm i duh chuan i nupui chu Lalnu (queen) angin en ve la, i nupui chu chaw chhum (cook) ang chauhva i en chuan nang pawh chaw chhum hotupa (Head-cook) bak i ni chuang lovang” a ti a. Chuvangin chhungkaw kalphung tur (principle) zam fel ula, ei leh in chungchang te, ei zawnna te, sakhaw lam thil te, nun ho dan tur chinte in sawifel hnuah chuan pa hriatpui hranpa ngai hauh lova nuin ama thua a lo tih ve theih chin hi siam fel a tha hle. Thil te tak te thlenga Pa ber rawn zen ngai in chhung chu a hahthlak lutuk thin. Entir nan - In chhung chei leh choka lam thilah chuan nu thu ni deuh ta se. Nu ei siam sa sawisel loh deuhte zir a hun tawh.

(ii) Chhungkaw thupui - hlapui vaiah nu tel ve se:

            Chhungkaw rorel pawimawh ah nu ngaihdan rawn ve thin ni se. Fate nupui-pasal neih dawn a rorelnaah pawh an nupuite tel vena tura ngai lo pate hi patlinga ngaihna a awm fo hi a dik ber lem em ni? Chhungkaw rorelin nu nun a nghawng a, nuin a buaipui zui ngai hauh lo chhungkaw thil a awm mang lova, a relnaa tel ve hauh lova a bawhzui lama mawh a phurh leh teuh si chuan atan a phurawm loh bakah bawhzui thiam sen pawh a ni lova, a veikhawr lo thei lo thin. “Hmeichhe vau loh leh vau vau loh chu an pawng tual tual” tih Mizo tawngkau chheh lar tak hi a hun azirin a dik theihna chu a awm mai thei e. Hmeichhiate hi hnam nun hmasain bawm chêp lutuka a khung rei avangin anmahni rilru pawh a lo dang chêp tê rei deuhva, tlema an han thawk ve theih deuhvin chin tawk an hre ta lo deuh pawh a ni ang. Hei hi chu inferiority complex avanga an tih niin a lang . Hetiang ai hian thuneihna pe tamin tizalen ta deuh ila an rilru pawh a zau tial tial ang. Kum 1986-a New Delhi-a Asia ram Pastoral Counsellor meeting-a kan kal tuma nu pakhat thusawi chuan, “I do not believe in equality of man and woman, I never tried to become equal with my husband, I rather believe in mutuality of man and woman. Therefore, we maintain mutual relationship with my husband” a ti a, inferiority complex chu a nei lo hlein kan hria.

(iii) Hmeichhe danglamna hi chawisan tur :

             Hmeichhiate hian mipa aia danglam bikna tam tak an nei a, chung chu chhungkuaah hman tangkai thiam tur a ni. Hmeichhia chuan an mit leh beng leh ka hi an hmang rual thiam bik a. TV en chungin la an phiar thei a, an ti ti mawlh mawlh thei bawk. Mipa chuan TV en laia lo tawng chu kan ngai thei tawh lo. Mipa TV en lai chu be mawlh mawlh mah ila, an hre lo fo. Hmeichhia chuan thil an zawng hmu hma bik. Pain “Khawnge ka chumi...khami chu” a ti a, nu a lo kal a, “Hei” a ti thuai thei. 

Hmeichhia chuan inngaihsak leh indawr pawh a ngaisang bik a. Chuvangin a tawng duh a, a rilrua awm ang ang sawi zel mai a duh thin. Hmeichhe thusawi lo bengkhawn nachang hre lo leh “Pip e.....pup e” lo tih nachang hre lo pa kiangah hmeichhia an hlim thei lo, “Min ngaihsak lo, bia ila mi pawh a chhang lo” an ti mai. Hmeichhe thil sawi hi ngawihsan mai lovin, “E! a ni maw?” “A lo nih tak chu” te han ti luam ila, a aia nasa an beisei lo fo, chhan lohva lunghnura kaltir chuan thil tam takah an phur loh phah a, tha taka lo um-e chuan a man tam vak lovin phur leh hlim takin an che soh soh mai a, hei hi empowerment chu a ni ve mai lom ni?

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2427063


Synfo © 2006 : All rights reserved. Mizoram Presbyterian Church Synod : Best @ 1024x768