SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

CHAPCHAR KUT CHUNGCHANGA SYNOD THUCHHUAH

CHAPCHAR KUT CHUNGCHANGA SYNOD THUCHHUAH

Rawngbawlpui duh takte,

 

Min Chhandamtu, kan Lalpa Isua Krista hmingin chibai ka buk a che u. In rawngbawlnaah Pathian malsawmna in dawn zel ka beiseiin ka duhsakna ka hlan a che u.

 

Kum 2006 Synod Inkhawmpui chuan “Chapchar Kût chungchanga Synod-in ngaihdan a lo siam tawhte hi Kohhranhote inhriattir thar leh ni rawh se” a tih chu kan han chhu chhuak leh a, kan han thawn leh a che u. Chapchar Kût mai bakah Mizo Culture kan han telh a. Hengah hian Kristian nun la peng a, nun hluia kir leh tura min kaihruai thei lakah ringtute fimkhur a ngai tak meuh va. Chutih laiin rinna kawnga min tanpui thei a awm bawk thei ang. Heng atang hian Kohhranhoten Synod Thuchah hi uluk taka zir leh Kohhran Inkhawmah puan tam deuh pawh a tha ang a. Remchang a awm thei a nih chuan Kohhranin a copy lo siam belh a, Kohhran In tina sem theih ni se a duhawm hle. Kohhranhote he Thuchah hi ngai pawimawh a lo zawm hram turin ka ngen a che u.

 

In rawngbawlna Lalpa’n hruaiin, tichak zel che u rawh se.

   
  Krista tana in rawngbawlpui
  
  (REV. K. LALRONGHETA)
  Secretary (Sr.)
  Mizoram Presbyterian Kohhran Synod

MIZO CULTURE HLUI CHUNGCHANG MIZORAM PRESBYTERIAN KOHHRAN THUCHAH

Kum 1992 Synod Gen. 52 thu angin Mizoram Presbyterian Kohhran Synod Executive Committee chuan Chapchar Kût leh Mizo Culture chungchanga kan Kohhran mite kaihhruaina dan kan neih lai (SEC 97:10) chu a en tha a, a hnuaia mi ang hian kaihhruaina chhuah thar a ni leh ta a ni.(SEC 135:14)

“Culture” tih hian a tawi zawngin hnam khawsak dan leh nun dan leh chungten an ken tel thil tam tak a huam a, sakhua te, eizawn dan te, in leh lo din dan te, vantlang khawsak ho dan te, inchei dan te, mipui intihhlim dan te leh thil dang tam tak a huam a ni. Culture nei lovin hnam a awm thei lo. Tin, Culture chu hnamin hma a sawnin emaw, hnam dang chin dan lak atangin emaw a danglam ve hret hret thin a. Pipu atanga lo tih dan leh thangtharte nun pawh inmil lo a awm chawk. Mizoramah pawh hnam hmasawnna leh hnam dang tih dan lak tam tak avanga nun dan thar lo awm zel avangin, culture hlui leh thar inkhakna lai a awm a, inkalh hialna lai pawh a awm a, chu chu sakhaw hluiin a ken tel thil leh Kristian sakhua kalpui danah a ni.

Mizoramah hian Kristianna a lo luha, ‘Kristian ram’ tih ngam kan han nih khan Mizo culture hlui thil tam tak chu khap leh tihbo a ni a. Chungte chu a bik takin sakhaw hlui biak laia kan hnamin sakhaw thila kan lo hman thinte leh chungin a kaihhnawih, Kût te, khawvel zai leh lam te, zu hmun hlimna te a ni. Amaherawhchu, eng emaw hun lai atang khan thangthar zingah Kût leh zai leh lam hlui chi hrang hrang chin thar duhna a lo awm a. Kût zingah chuan Chapchar Kût hi a ni deuh bik.

Chutiang chin thar tumna chuan Kohhran mite rilru a tibuai a. Chuvangin, Kum 1963 Synod chuan Presbytery tinte ngaihdan lain, Chapchar Kût etc. din thar lehna chungchangah hetiang hian ngaih dan a siam a: “Pipu nun hlui kan duh tawh lohte chawk thar leh thei ziaa din thar leh chu Kristiante tihtur a ni lo ve kan ti,” tiin (Gen. No. 1, 1961 Gen. 7). Mahse Culture hlui thil chin thar duhna chuan Kohhran mite zingah ngaih dan inanglo a siam zel avangin kum 1975 Synod-ah chuan, “Hman Culture leh Kristian nun inrem chin leh rem lo chin hrilhfiah nise,” tih thu  lo lut a (Gen 40). Chu chu bawhzuiin Synod Executive Committee chuan “Dan thar siam tulin kan hre lo va, he thil hi Kohhran mal thuneihna a ni a, a tha an tih ang zela an rel chi a ni e,” tiin a rel a (SEC 41:5(a)). Hun kal zelah Presbytery atang pawhin Chapchar Kût a Kristian zawnga hman rawtnate a lo lut ta zel a. Mahse, Synod chuan,“Hetiang Kûtah hian Kohhran anga inrawlh chu thain kan hre lo,” tiin thu a titlu leh ta a (Synod 1978 Gen 32). Amaherawhchu, Kohhran mite zingah harsatna eng eng emaw a siam zel a. Chuvangin. 1984 Synod-ah khan, “Mizo hnam chin dan thenkhat Kristianna nena inrem lo khawpa hman thin heng – Chheih lam, Chai, Salu lam, Mi lu lam, Hla do, Sarlam, Puma zai angte chungchangah Synod-in khapna thu chhuah rawh se,” tiin rawtna a lo lut a. Synod chuan, “Culture hi hnam thil pawimawh tak, Kohhran tana ngaihmawhawm lai awm thei si a nih avangin kaihhruaina chhuah tul kan ti,” tiin Executive Committee chu thuchah lo siam turin a ruat nghal a. Gen 18). Synod Executive Committee chuan thuchah a siamah chuan ‘Culture’ awmziate sawiin Mizoramah Kristiannain culture hlui thil a ngaihmawh zual te, a ching thar duhten an duhna chhante a tarlang a, a tawpah hetiang hian ngaihdan a siam a:

 

He thilah hian Kohhran dinhmun chu a la ngai reng a ni. Krista Chanchin Tha nen a inkalh tlat avangin, zu hmun hlimna tela Kût hman te, Chawngchen te, Chai te, Lâm te khap a ni a, tun thleng pawhin Krista Chanchin Tha nen inkalh zawnga hman chu Kohhranin a remti chuang lo (Thuf. 26:11). Hnam thil hlui entirna mai atana hman a nih a, a entirtute nun a hruai sual loh erawh chuan Kohhran tan ngaimawh tham a tling tawh lo ve (Rom 12:1,2) SEC 97:10).

Nimahsela, Khawmpui leh Committee thurel kan tar lan takte khi Kohhran mite tan a la fiah tawk lo a ni ang. 1992 Synod-ah chuan, Chapchar Kût leh Mizo Culture thenkhatah Kohhran mite inhnawmhnawih dan tur chin kaihhruaina neih lai chu ennawna siam that rawtna a lo lut leh a. Chu chu bawhzuiiin Synod Executive Committee chuan a hnuaia Thuchah hi Kohhran tin hnenah an mite zinga an lo puan turin a chhuah a ni.

1)

Mizo Culture hlui – Kût, Chawngchen, Chai, Zai, Lam leh Zu hmun hlimnate hi hmanlai nun hluia kir leh duh vang emaw, nuam chenna atan emawa chin thar duhna chu Pathian ring lo, khawvel mite rilru a ni a, chutiang lakah chuan ringtute chu an inthiarfihlim tur a ni.

2)

Mizo hman Culture hlui humhalh duhna chu puipun ni leh hun pawimawh entir maia hman a nih a, a entirtute nun a hruai sual loh chuan Kohhran  tan ngaih pawimawh tham a ni lo. Zu leh sa leh nuam chenna nena inkawp erawh chu Kohhran mite tan telna chi a ni lovang.

3)

Culture hlui thil tih thar leh thu-ah hian Chipchiar taka bithliah chin siam a harsa a. Nawmchenna leh zahmawh lam rawng kai thei te, tawngkam bawlhhlawh leh mawi lo, mi rilru tina theite chu Krista Chanchin Tha nen a in mil lo va, Pathian ring tute chuan kan tih ve atana mawi chin thliar thiam a tha ang.

4)

Pûma zai, Tlânglâm zai leh hmanlai hla thluk hmanga mi thenkhatin hla an siam tam tak, Kohhran epna leh ngaihnepna lamte chu Kohhran mite tan inhnamhnawihna chi-ah kan ngai lo.

5)

Mizo Culture hlui thil tihthar leh thuah hian khua leh Kohhran mal dinhmun a inan vek loh avangin hmun tinah inang thapa kal remchan lohna pawh a awm thei ang a. Chuvangin, a chunga kan tar lan takte khi ngun tak bih chungin tualchhung Kohhranten fimkhur taka kalpui tum theuh ni se a tha ang- SEC 135:14 & Appendix-2).

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2445369


Synfo © 2006 : All rights reserved. Mizoram Presbyterian Church Synod : Best @ 1024x768