SYNOD CALENDAR | DOWNLOAD | NOTIFICATIONS | GUEST HOUSE | SYNOD BOOKROOM | ARTICLES/SERMON |COUNSELLING |  PRAYER REQUEST | PICTURE GALLERY |LETTERS


 
Latest News
Comm./Dept./Boards/Profiles
Periodicals
Audio/Visual
Synod Choir
Media Ministry
Links
Booklets
FM Radio Hruaina Eng
 
 

 

Family Guidance & Counselling Centre tan. Harsatna neiten an hlawkpui zel theih nan leh Chhungkuaa mawhphurtu nu leh pa zawng zawngte tan

Synod Literature & Publication Board (SL&PB) rawngbawlna leh thawktute tan

Kolkata Mission Field-a thawktute leh Kohhrante tan


 

MODERATOR'S VALEDICTORY SERMON - Revd. H. Lalchhanhima

Moderator's Valedictory Sermon

- Revd. H. Lalchhanhima
Synod Moderator
Thupui Kan zingah tunge ropui ber ang?
Bible chhiar Mk. 9:33-37; 10:35-45
  Lk. 14:11; IPet. 5:3

Thuhma :

0:1

Pathian khawngaihna leh Kohhranhote tawngtai­sakna leh rawngbawlpuite tawiawmna azarah Moderator hna chu ka lo thawk tlingtla ve ta a, ka lawm hle a ni.

0:2

Kohhranho Inkhawmpui Lian Synod 'Chawimawina Lallukhum' min khumtir a, zaninah 'Valedictory Sermon' sawi tura in hmaa ka lo ding ve ta mai hi Pathian khawngaihna a ni tih ka hria a, ka lawm takzet a ni.

0:3

Kumthar January 1, 2010-a pension-a chhuak mai tur ka ni a. Vawiin chawhma, Pastor nemngheh Inkhawmah khan 2009 Synod hian 'Pension Certificate' (Certificate of Apprieciation) min hlan a, ka lawm hle.

0:4

Rawngbawl hna ropui tak, pension thlenga ka thawk ve thei hi, Pathian hruaina leh malsawmna ropui tak a ni tih ka hriatin Pathian hnenah lawmthu ka sawi a.

0:5

Ka rawngbawl chhung zawng khan ka nupui PC Lalramliani'n min tawngtaisak reng a, min tanpui tha a, tun dinhmun hi min thlenpui niin ka hria a, ka lawm hle bawk a ni.

0:6

Pension-a chhuak nghal mai turin, Valedictory Sermon ka sawi dawn a ni a. Kawng lehlam ngaihtuah chuan a lunglenthlak dawn hlein ka hria.

0:7

Chu bakah, Synod min thlengtu Mission Vengthlang Kohhran hi, ATC awm reng tawhna, B.Th First Batch nia kum li lai kan lo khawsakna hmun Kohhran leh veng a ni lehnghal a. Bul ka tanna hmun ngeiah khan hun tawp ka hmang dawn a ni a. Pathian min hruai dan hi a mak/ropui hlein ka hria.

0:8 

Synod Moderator hna hi a hautak a. Synod hian, "Moderator hnathawh dan tur" ziakin kaihhruaina fel tak a nei a. Tha taka hlen chhuah vek erawh a har hle. Synod puipate (OM-in) Board leh Committee thut hun ruatsa bakah Sub-Committee, BEC thut hun thlengin kum tluan atan a ruahmansa vek a. Tel kim remchan loh tum a awm thin. Chutichung chuan Committee vawi 200 chuang kan thu a, Kohhran tlawh programme kalpui a ngai ve reng bawk a. Mizoram chhungah Kohhranm 109 (Pastor Bial 52, Presbytery 19 huam chhung) ka tlawh hman bawk a. Bial leh Kohhran hruaituten tha takin min lo dawngsawng thin a, a lawmawm hle. Kohhran tlawh programme hi Kohhranhote inpumkhatna leh thawhhona tha siamtu pawimawh tak niin ka hria.

0:9

Mizoram pawnah Mission Field 7 ka tlawh bawk a. Min hringtu Wales ram Kohhran Inkhawmpui Lian 'General Assembly' thlengin ka kal bawk a. Heng Mizoram chhung leh pawn fanna atanga thil ka hmuh chian em em chu - 'Kan Kohhran hi Pathianin min hruai a, nasa takin min hmang mek a, India ram chhung leh pawnah rawngbawlna tur kawngka zau takin min hawnsak a ni' tih hi. Kohhranhote hian harsatna leh sawichhiatna tawk thin mah ila, Pathianin min hruaia min awmpui zel a, Kohhran chak tak leh nung tak, Missionary Kohhran duhawm tak dinhmuna min dintir hi a ropui hle a ni. Pathian hnenah lawmthu i sawi ang u.

0:10

Kan Kohhran hian hmanlai atanga vawiinni thleng hian harsatna leh sawichhiatnate tawk thin mah sela, Pathianin min awmpuizia leh min kaihhruai nasatzia hi a ropui hlein ka hria. Sawichhiatna leh beihna tawk reng kan nih avang hian fimkhur a tul hle. Chutiang a nih mek lai chuan Kohhranho chhungah ngei pawh, hlauhawm, fimkhurna tur a awm a. Chu lam hawi chu Moderator thuchah hnuhnung 'Valedictory Sermon' atan sawi chhuah ka tum a ni.

 

 

Thupui keu hawnna :

01:1

Kan Bible chhiar takah khan, Lal Isua zirtir, sawm rual emaw lek, mi tlem te, inthik tham pawh awm awm lo tak zingah, "Kan zingah tunge ropui ber ang?" tia inhnial buaina a lo chhuak ta mai kha a ni a. Hei hian kan Synod chhungkuaah pawh hian dinhmun tha inchuhna, awm awl turzia leh fimkhur a tulzia min hriat chiantir a, zir tur pawimawh tak kan neiin ka hria.

01:2

Zirtirte hian hun rei tak Lal Isua an zui tawh a, Lal Isuan rawngbawl hna a hlen tep tawh. Khawvel chhandamna hna thawk tura ama nunna ngei pea Kross-a a nun a hlan tleitlak dawn mek laia, zirtirten mahni tanghma siala, lei lal ram thlir a, minister dinhmun luah tuma dinhmun tha an inchuh vel hi Lal Isua tan chuan a luhaithlak ngawt ang le! Lal Isua tana a buaithlak turzia hi kan hriatthiampui phak awm love. Zirtirte zinga hetiang buaina -

 

- dinhmun tha inchuhna,

 

- ropui inchuhna,

 

- hruaitu dinhmun inchuhna,

 

- hotu nih inchuhna

 

- thuneih inchuhna,

‘Leadership crisis’ a lo lang chhuak a, 'Kan zingah tunge ropui ber ang?" an ti ta mai hian, kan Synod huang chhungah pawh hian dinhmun tha inchuhrukna leh thuneihna inchuhrukna avanga harsatna ruk awm awl turzia min tarlansak a. Chuvangin, he thu hi 'Moderator Valedictory' sermon atan ka rawn thlang chhuak a ni.

01:3

Hun rei tak atang tawh khan he thu hi ka rilruah a awm ve tawh thin a. Kan Kohhran pumpui nun leh rawng­bawlnaah hian he thu hi kan mamawh hlein ka hria.

01:4

Chuvangin, pa berin a hun hnuhnunga a tu leh fate hnena thuchah hnuhnung 'thurochhiah' a sawi angin, kei pawhin thuchah hnuhnung atana ngaihtuahho turin ka rawn thlang chhuak ve a ni.

 

 

1.

Ropui duhna, dinhmun tha inchuhna hi mihring zia a ni :

1:1

Mihring zingah ropui duhna, dinhmun tha inchuhna, chungnun inchuhna leh thuneih inchuhna avangin indona nasa tak a thleng fo thin. Khawvel indopui I-na (1914-18) & Indopui II-na (1939 - 45) te pawh kha ropui leh thuneih inchuhna avanga lo thleng an ni.

1:2

Bible kan en pawhin, khawvela mihring chungkaw hmasa bera unau inkara tualthahna rapthlak tak lo thleng ta phut mai pawh kha, Kaina khan, a nau Abela kha dinhmun tha zawkah a ding tih a hriat khan, a thik a; a thin a lo ur ta em em a, a hmel a lo dur ta khup a. Pathian pawhin, "Engati nge i hmel a lo dur tak?" tiin 'Thil a tih that chuan lawm a hlawh dawn a ni' tih pawh a hrilh a. Mahse, a nau Abela chu loa fehpuiah a sawm te te a, loah chuan a bei thut a, a that ta mai a nih kha. A nau dinhmun tha zawka awm chu thikin a that ta a ni.

1:3

Josefa chunga a unaute thil tih dante pawh kha: An pa Jakoba khan Josefa kha a hmangaih em em a ni tih an hriat khan an thik a. Chutih nak alaiin, Josefa khan mumang danglam tak a nei lehnghal a. A mumangah chuan, ama buhphal chu a laiah a lo ding luah a,  a unaute buhphal chuan an hual a, chibai an lo buk a. A mumang pakhat zawkah pawh khan, ni leh thla leh arsi 11 te khan amah chibai an lo buk a. A mumang awmzia awm an han ngaihtuah khan, a unaute khan amah thah thu an phiar ta hial a nih kha. Khuarkhurumah an thlak a, chumi hnuah Ismael sumdawngho hnenah tangka 20-in an hralh leh ta a. Hetianga Josefa chunga a unaute thiltih zawng zawngte pawh hi Josefa dinhmun an thik vang veka thil thleng a ni a. Dinhmun thaah dingin an hria a, an phiarru a, hetiang hian a chungah an ti ta a ni.

 

 

2.

Zirtirte zingah ropui inchuhna a awm :

2:1

Lal Isua leh a zirtirten Kapernaum khua an lo thlen khan, In chhungah zawhna chhan har tak mai Lal Isuan zirtirte kha a zawt ta khauh mai, "Kawngah khan eng thu nge in inhnial le?" tiin. "Kan zingah tunge ropui ber ang?" tia an lo inhnial tawh avang khan zirtirte chu an ngawi ta thap mai a nih kha.

2:2

Jerusalem khua an pan dawn lai khan, Isuan, a vawi 3-na atan a thih tur thu a sawi leh a.

2:3

He thu a sawi hnu lawk hian Zebedaia fapa Jakoba leh Johana te unau khan Isua an rawn hnaih a. "I ropuinaah chuan, i ding lamah pakhat, i vei lamah pakhat min thuttir ang che" tiin an rawn dil a.

2:4

Zirtir dang 10-te khan chu thu chu an lo hriat chuan, Jakoba leh Johana chungah chuan an lungawilo em em a nih kha.

2:5

Lal Isua kha Messia, lal ropui tak, hnam dang zawng zawng chunga roreltu tur nia an beisei avangin, a cabinet minister nih tumin an bei a ni. Zirtirte zingah pawh khan ropui inchuhna, dinhmun tha inchuhna a awm lian hle a, ropui ber, chungnung ber, dinhmun tha bera ding nih an duh theuh ni ngeiin a lang.

 

 

3. 

Lal Isuan ropuina dik a zirtir :

3:1

Lal Isuan zirtirteho kha a kova, an hnenah, “Jentailte chunga roreltua an ruatte chu an chungah an lal em em thin a, an mi liante chuan an chungah thu an nei em em bawk thin tih in hria. Nimahsela, nangni zingah zawng chutiang a ni lo vang; tupawh in zinga mi lian nih duh apiang chu in rawngbawltuah a awm zawk tur a ni..." a ti ta daih mai.

3:2 

Ama dinhmun ngei pawh sawi langin Lal Isua chuan, "Mihring fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si a" (Mk. 10:45) tiin a sawi a.

3:3

Zirtirte kesil thuah pawh khan a fiah khawp mai. Lal Isua zirtirna hi khawvel zirtirna nen chuan a inlinglet tawp a, a inkalh tlat a, chhun leh zan ang a ni.

 

 

4.

Kan fimkhur a tul :

4:1

Lal Isua zirtir mi tlemte zinga ropui inchuhna leh dinhmun tha inchuhna lo thleng ta mai kha ngun takin ngaihtuah ila. Lal Isuan 'ropuina dik' a zirtirna kawng hi zawh lovin, keiniho zingah pawh hian dinhmun tha inchuhruknate hi a lo thleng ve palh hlauh ang e! I fimkhur ang u.

4:2

Kan Synod rawngbawlna peng hrang hrangahte pawh hian rawngbawlna chanvo pawimawhte hi kan lo inchuh ru palh thei em? Rawngbawltu hlawm hrang hrang: Pastor-ho zingah, Upa zingah, Revival Speaker ho zingah, Thalai leh Hmeichhe zingahte pawh hian mawhphurhna leh chanvo pawimawh inchuhruk theih a ni.

4:3

Synod Committee pawimawha chanvo kan intheisem viau maite pawh hi a symtom lo lang chhuak a ni palh thei mai ang em! Pastor ho leh Upa-ho zingahte hian thuneih inchuhrukna (leadership crisis) hi a lo inphum ru reng tawh em? Kan tunlai Kohhranah hian zirtirte zinga harsatna thleng kha a thleng thei reng a ni.

4:4

Kan Synod hnuaia rawngbawltu mi rawihho zingah hian 'Lay leh Lay lo inkarte hi lo tuizai khi palh sela, chu chu Kohhranhoah hian lo khi chhuak ta sela, a hlauhawm hle ang. Chutiang a lo awm palh hlauh chuan, Kohhranho tan thil hlauhawm tawp a thleng thei. Hei hi Lalpan min hmuhtir vein ka hria.

4:5

Kan fimkhur a tul takzet a ni. Amah ngei example-a inpein, rawngbawlsaka awm tura a lo kal loh thu leh, mite rawngbawl tur leh mi tam tak tlan nana lo kal a nih thu a sawi chiang nghal a (Mk. 10:45).

4:6 

Hmun dangah pawh, "Inngaihlu apiang an tlawm ang a, inngaitlawm chu chawimawiin an awm ang” (Lk. 14:11) tiin a lo sawi bawk.

4:7

Petera pawh khan, "Pathianin chapote a dodal a, inngaitlawmte erawh chu khawngaihna a pe si thin a" (I Pet. 5:56) a lo ti bawk a.

4:8

Paula pawh khan, "He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a. Tin, mihring anga lo awmin, a inngaitlawm a, thi khawp hiala thu zawmin a lo awm ta a, kraws-a thihna ngei chu." (Phil. 2:5-8) tiin a lo sawi bawk a ni.

4:9

Midangte tana malsawmna ni ve tura Lal Isua, a hniaka zuitute chu kan zinga ropui ber turte chu an ni.

 

 

Tlangkawmna :

Kan Synod-ah hian thuneih chakna, roreltu dinhmun  inchuhna, leadership crisis a awm chuan a hlauhawm ang. 'Pastor-ho hi', ‘Upa ho hi’ intihna rilru a awm chuan a pawi ang. Pastor-in ‘Pastor ka nia ka thu thu’ tih ngawt te, Upa ten, ‘Pastor te chu kan hlawhfa chhawr an nia, kan mi rawih an nia’ han in tihte hi a awm chuan a tha loang. Rawngbawltu Pastor leh Upate hian, Jentail roreltute zia, intilal zia, intihotu zia kan put chuan Kohhran ho tan a tha lo ang. Lal Isua kha a inngaitlawm a, thi khawp hiala thu zawmin a awm a. Pa Pathianin nasa takin a chawimawi a, hming zawng zawnga hming chungnung ber a pe ta. Lal Isua hi a ropui a ni. Rawngbawlsaka awm turin a lo kal lova, mi tam tak tlan nan a nun pe zawk turin a lo kal a ni si.

        "Kan zingah tunge ropui ber ang?" tia dinhmun tha inchuh rukna a awm chuan Titanic lawng lian su chhetu vur tlang hlauhawm ang kha a ni dawn a ni. Vur tlang kha tui chungah khan a lang tham mang lo a ni mai thei. Mahse, lang lo lam tui chhungah khan Titanic lawng lian pawhin a ngam rual loh vur tlang lian pui mai kha a lo awm a. Chhiatna rapthlak tak a lo thleng ta a nih kha. I fimkhur ang u. Zion lawng lian Kohhranho khawvel tuipui zauva Kohhranho chhandamna lawng lian kal mekah hian Layman leh ordain inkarah te, Pastor leh Upa inkarah te khi a awm a, chhandamna lawng chhunga tui a lo puh luh chuan khawvel tuipui zauah kan chesual thei a ni.

Lal Isuan, ropuina kawng dik min zirtir hi khawmpui palai zawng zawngte hian i ngai pawimawh ang u. Kohhranhote hian Lalpa rawng hi kan la bawl zel dawn a nih a, Chanchin Tha hi khawvelah kan hril zel dawn a nih chuan chhiahhlawh rawngbawl hna Lal Isua min zirtir ang hi kan ropuina kalkawng tur chu a ni. Lal Isuan, a hniaka zuia chhiahhlawh rawngbawl hna kan thawh a tul a ni. He ropuina dik kawng zawh theuh tur hian 2009 Synod Inkhawmpui hmang hian Lal Isuan min au va, min sawm a nih hi.

 

 

“Tupawhin hmasa ber nih a duh chuan mi zawng zawng aiin hnuhnung berah a awm tur a ni a, mi zawng zawng rawngbawltuah a awm bawk tur a ni,” (Mk. 9:35)

"Mihring Fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si,” (Mk. 10:45)

 

 

 

Lalpan a thu kan za atan mal min sawmsak theuh rawh se. Amen

 

Share
There are 0 comments to this post
 


 Register
Kids Corner
TELEPHONE DIRECTORY


  Hits:   2662544


Synfo © 2006 : All rights reserved. Mizoram Presbyterian Church Synod : Best @ 1024x768