Vêng pakhatah hian hmeichhe naupang pakhat fel êm êm mai Mawii hi a awm a. Nu leh pate thu a awihin, lehkha zir leh inkhâwm a taima hle bawk a. Pathianni chuan dam lo chung pawhin inkhâwm a tum hrâm thîn. Chawhnu lam leh zân lamah pawh a theih phawt chuan inkhâwm a thulh ngai lo.
Zirlai a la nih avângin lehkha zira a thiante anga Pathianni inkhâwm loh mai a châk ve thîn hle a; mahse, inkhâwm loh rikngawt chuan a rilru a tinuam thei lo a, a inkhâwm leh nge nge thîn.
A thiante chuan lehkha zir tûr a ngah chuan inkhâwm chu thulha in lama zir mai tûrin an hrilh ve thîn a. Mahse, Mawii chuan inkhâwm thulh chu a duh lo a, rei lo tê inkhâwm tûra a kal avâng khân a zirnain a tawrh phah dâwnin a hre lo a. Pathian be tûra kal a nih avângin Pathian chuan a zirnaah pawh a pui dâwn tih a ring tlat a ni.
Ni khat chu exam an neih dâwn lai a ni a, nasa takin a dam lo palh hlauh mai a. A khua te sikin, a lû a na êm êm a, a taksa chu a chauin chêt pawh a che tha peih tawh lo a.
Chutiang chuan ni li vêl zet chu khumah a mu tawp a, Pathianni a lo thlen chuan a chhûngte pawh chuan inkhâwm loa in lamah hahdam taka lehkha zir mai tûrin an hrilh a. A tûk lawk chu an exam a ni tawh a, a hmaa a dam loh bawk si avângin lehkha zir tûr lah a ngah tawh em em mai si a; mahse, inkhâwm loh tawp erawh a duh lo a. A dam lohna avângin a taksa chu la chau hle mah se che thei lo tawp a nih tawh loh avângin a tha zâwngin thil thlengte chu a thlir lui a, Pathianni chawhma tal chu inkhâwm a tum ta a. A chhûngte leh a thiante chuan tilui lo tûrin an hrilh a; mahse, Mawii erawh chuan a inkhâwm chuan Pathianin a tidam zâwk dâwna a hriat tlat avângin a kal lui ta tho a.
Biak In a thleng chiah chu a natna leh taksa chau takte chu reh duakin a hria a, inkhâwm bâna an in a thlen te pawh chuan a dam lohna zawng zawng chu a reh ta hawk mai a.
Lehkha pawh chu hahdam tak leh phûr takin a zir theih phah ta hlauh zâwk a ni.
Mawii chuan Pathianah a rinna a nghat tlat a, inkhâwm leh Pathian biak chu thil dang zawng zawng aia dah hmasa berin, a dam lohna avânga a taksa chau te pawh chu a reh phah ta zâwk a ni. Hetiang chiah hian keini Kristian naupangte pawhin thil dang zawng aia Pathian dah hmasain inkhâwm taima tlat ila, kan lehkha zirna leh thil dang kan tihna rêng rêngah Pathianin mal min sâwmin, kan buainate a la kiang zêl dâwn a ni.
Source : Kristian Naupang - September, 2023