Vawiin (April 18, 2024) khan Missionary Training College (MTC) chuan B.Miss. zir zo mi 19 te thlahna hun (Graduation Day) vawi 12-na, Golden Jubilee Hall, Mission Vengthlang Kohhranah an hmang.
Programme hi chawhnu dar 2:00-ah tan a ni a, Rev. Dr. C. Lalramchhana, Principal MTC-in inlawmna leh inhmelhriattirna hun a hmang a. Synod Moderator Rev. R. Vanlalnghaka’n College Magazine a tlangzarh bakah Graduation Day thuchah a sawi. Rev. C. Zorammawia, Senior Executive Secretary-in zirchhuakte hnenah Certificate a hlan a, Rev. Vanlalrova Khiangte, MTC Governing Board member-in MTC Praise ‘24 Music Video Album a tlangzarh bawk. Rev. Dr. K. Lallawmzuala, Executive Secretary i/c Synod Mission Board-in zirlaite hnenah lawmman chi hrang hrang a sem a, Synod Mission Choir te tum hnih an zai bawk. Rev. H. Laltlanthanga, Statistician, Mizoram Synod-in zir chhuakte tawngtaisakna hun a hmang a, Rev. Dr. Lalchawimawia, MTC Governing Board member-in malsawmnain programme a khar a ni.
Tun tumah hian zirlai titha lawmman (College Awards 2024) hetiang hian hlan an ni :
1) R. Dala Award for Biblical Studies - Augustine Lalrinmawia Royte
2) Rohmingthangi Award for Theological Studies - Lalrinawma
3) Tirhkoh Chhingtei Award for Mission & Historical Studies - Lalrinawma
4) M. Suaka Award for Religious and Cultural Studies - Lalrinawma
5) Tirhkoh Thangzawna Award for Christian Ministry - Lalrinawma
6) Rev. Dr. Lalsawma Award for Language Studies- Lalrinawma
7) Upa Thangkima Ralte Award for Field Work & Project - Lalrinawma
8) Lalbiakchhungi Award for Academic Excellence - Lalrinawma
9) Robuanga Award for Best Outgoing Student - Lalthangmawia
Missionary Training College hi kum 1978 khan Missionary Training Department tiin Aizawl Theological College-ah bul tan a ni a. Kum 1996 atang khan Aizawl Theological College (ATC), Durtlanga sawn chhoh a nih hnuin Synod Multipurpose Training Centre (SMTC) nen a kal kawp leh a, chumi hnuah chuan Synod Multipurpose Training Centre (SMTC) atangin lak hran niin Missionary Training Centre tih a lo ni ta a. Kum 2007 Synod chuan College-a hlan kai a remti a, Synod thurel angin June 4, 2010 khan Missionary Training College (MTC) chu a lo piang ta a, Senate of Serampore College hnuaiah chuan B.Miss zirna hmasa ber a ni. MTC-ah hian B. Miss zirna bakah missionary training chi hrang hrang neihpui thin a ni bawk.
For more Pics Click Here