Vawiin (May 8, 2024) chawhma dar 10:00 khan Synod Pastoral Committee chu term kal lai meka a vawi 7-na atan J.M. Lloyd Hall, Synod Office-ah an thu khawm a, member 118 an kal thei a ni.
Meeting hi Rev. R. Vanlalnghaka, Synod Moderator-in a kaihruai a, Synod Secretary a dam loh avangin a aiawhtu Rev. C. Zorammawia, Senior Executive Secretary hnen atangin report ngaihthlak a ni.
Secretary report-ah hian January 14, 2024-ah Pastor leh Probationary Pastor-te induction tluang taka neih a nih thu te, Bial thenkhat, bialtu turin an zawm hmaa lo enkawl tur leh hmuitu tur ruat an nih thu te, 2023 Synod-in a rel anga bial thar paruk tluang taka hawn a nih thu te, January 30-February 2, 2024 chhunga Pro. Pastor Orientation neih a nih thu te ngaihthlak a ni a. Meeting leh Meeting inkarah minister paruk - Rev. T. Lalthantluanga, Rev. T.M. Thangzaliana, Rev. Dr. Chuauthuama, Rev. Alfred Lalruatfela, Rev. T. Rosangliana leh Rev. Chalhnuna ten chatuan ram an pan thu report a ni bawk.
Pastoral Committee thut khawmah hian Thembasuk Vaiphei Kohhranten Tangphai Provisional Synod zawm an duh chungchang te, Pastor thawk laiten zirna sang zawk zir leh an dilna chungchang te ngaihtuah a ni.
