Khawvel history-a kan kohhran lo zîk chhuah dan hi han chhui kîr ila, hun leh hmun leh remchânna kan neih dan azirin bulfûk zawk leh zau tak pawha sawi theih a ni ang. Lehkhabu lian vak lovin article a ken engemaw zât zinga pakhat a nih dawn avangin tlangpui deuhin kan thlir ang a. Kan tobul tlem azawng te enin, Pathian thu kan pawm dan tlangpui, kan invawn dan leh biak dan te kan thlir dawn a ni.

KAN TOBUL Kanhriat angin keini hi chu Presbyterian kohhran hmasate atanga inhring chhuak ve rêng ni lovin, kum zabi 18 lai Sap ram Methodist harhna atanga lo zichhuak kan ni a. Hei vang hian kan kohhran nihphung(identity)sawifiah hi a harsa hle a ni. Mihring ni ta ila ‘thlah pawlh’ tih tur kan ni ang. England Kohhran hnuaia Methodist harhna hrin kan han ni phawt a. Methodist harhnaah chuan an hruaitu lian pahnih, Wesley-a leh Whitefield-a te chu Pathian thu pawm danah an han inthen a. An intawh khawmna hmasa ber, 1743 te khan John Wesley-a chuan Calvin-a zirtirna zepui, Whitefield-an duh em ema a hril thin chu chiang takin a hnâwl tawh. Chung hun lai Wales ram harhna hruaitu Daniel Rowlands leh Howel Harris te chu Whitefield-a te nen an lungrual a, sawi danah ‘methodist’ tih ni mah se Calvina zirtirna pawmtu an nih avangin ‘Calvinistic Methodist’ tih an ni bîk a. Chungho chu min hringtu Wales ram kohhran dintu bulpui berte an ni.

Welsh Kohhran ding tîrin pawl hrang zia chi hrang a put hnem theih turzia chu Rev John Roberts-an tihian a sawi: Calvinistic Methodist Kohhran indin tirha mi leh sa lokal khawmte chu huang hrang hrang –

(1)Methodist harhna kengtu ber Church of England atang te,
(2) Pawlchhuak tia sawi – Independents, Baptists leh Presbyterians atang te,
(3)Wesleyans, Methodist hlâwmpui leh,
(4)Presbyterian ziding, Methodist harhna changtuho lung dumtu pawl te an ni a.

Chutiang kara lo zi chhuak Kohhran kal zel chu Anglican Kohhran atangin a inla hrang hret hret a, 1811 ah in-mual vawm hrangin Wales ram Calvinistic Methodist Kohhran dintute an lo ni ta. A hnu rei vak lo 1823 ah an kohhran tan thurin bu The Welsh Confession an tih chu an siam a. Pathian thu pawm danah an dinna an tichiang hle. Reformed thurin vuantu an ni. A hun lai kohhran pawl dang zia leh nunphung dang seng luh awm bawk mah se Presbyterian-ho thurin leh kalphung an zui ber a, Wales ram Presbyterian Kohhran tih an ni hlen ta a. Kan sawi angin Pathian thu an pawm dan chu Calvinistic tak mai a ni. A theih chin chinah Calvinistic Methodist-ho chuan Presbyterian ho rin dan leh inhruai dan an zui a, Methodist-ho zia leh nunphung chhawm an nei hle bawk. An kohhran kal zel chuan ze bil mawi leh duhawm tak an rawn chhuah a. Kohhran lian leh ropui ni hauh lo mah se harhna hrin leh hruai kohhran, khawvel huap revival history pawha chapter pawimawh luah phâk, chanchin tha puan darh hna pawha chhuanawm tak an ni. Keini an malchunga sei lianten tun hnua kan han thlir lêt leh hian Reformed Kohhran duhawm tak hrin kan lo ni tih han hriat te hi a nuam ngawt a ni. 

THEOLOGY
(1) Bible pawm dan (Doctrine of Scripture). Martin Luthera thuchâng, vawiin thlenga protestant kristiante beng thlâa la châm reng kha engnge ni: “Lehkha thianghlimin emaw, rilru fîmin emaw min hneh a nih ngawt loh chuan ka thu kha ka sût thei lo. Ka chhia leh tha hriatna hi Pathian Thuin a phuar tlat a, chumi kalh zawnga chêt chu a dik lo va, a him hek lo”, tih a nih kha. Pope leh Bishop rualten a thu sût turin nawr mah se Luthera chu Bible thuneihnaah a ding tlat a, a tawlh thei lo. John Calvin-a phei chuan Bible pianhmang leh thuneihna hi a zir fîp lehzual a. Bible hi Pathian thu a ni tih tuin nge hrilh che? tih zawhna hi Calvina chuan, “Thlarau Thianghlimin thinlungah min hriattir”, tiin a chhang. Chu pawmdan chu reformed thurin hrang hrangah hian a lang vek mai. Kan kohhran hnahthlâkin Bible kan pawm dan ziding ber sawi dawn ila, kan en hmasak ber tur chu Westminster Confession(‘reformation rah thlum ber’ an tih) kha a ni nghe nghe a. Chutah chuan kan sawi takte kha heti hian khaikhâwm a ni: “Kohhran zirtirna hian Pathian Lehkhabu Thianghlim bu hi min ngaihsantirin min zahtir a ni thei e; van lam thil a nihzia te, a thu zirtirin hna a thawh theihzia te, a thu kalhmang mawizia te, a bung hrang zawng zawng inremzia te, a pumpui hian Pathian ropuina a tihlan dan te, mihring tana chhandamna kawng awmchhun a tihlan dan te, tehkhin rual lohva a thatna kawng tam tak te, a famkimna te zawng zawng hi Pathian thu ngei a ni tih tilangtu fiah tak a ni a; amaherawh chu thutak dik lo thei lo, van lam thuneihna kengtu a ni tih hriat fiahna leh pawmna chu rilru lama Thlarau Thianghlim hnathawh atangin a ni a, kan thinlungah thutak chu min rawn hriattir a ni”(1.5). Welsh Presbyterian Kohhran pawh he thurinah hian an ding tih kan hmu leh a, hetiangin: “Pathian Lehkhabu zawng zawng – Thuthlung Hlui leh Thuthlung Thar lehkhabute hi Pathian thu a ni a. Amah atanga lo chhuak,…..Pathian rilru leh duhzawng kimchang tihlanna…..Rinna leh thuawihna tehna dik lo thei lo awmchhun a ni….”tiin(Art.2). Heng kan bulpuite rindan chiah la hian PCI Thurin No.1-naah, “Thuthlung Hlui leh Thuthlung Thar bute hi Pathian thu a ni a, heng chauh hi rinna leh thiltih tehna dik lo thei lo a ni” tiin kan pawm a. Kan puteho dinna lungpuiah vawiin thlenga kan la ding tlat hi a lawmawm hle. Tun hnaiah he thu hi hluihlâwn duhna leh tihdanglam duhna a lo awm a, inkhawmpuiin pawm dan hlui a la hum thei a, a lawmawm a ni. Chang tlawhchhan lar ber II Tim 3:16 hi en ngun ila, a thâwkkhuma hi a concept ni lovin a lehkha thu graphe ngei kha a ni e. Pathian thu bu pawm dan hi a sân loh veleh rindan mak leh huaisâr pui pui hi a rawn inhmûr nghal a, chung thil lakah chuan fing taka invên a nih loh chuan kâr lovah kohhran kalphung a hnawk zo vek thei. Hemi kawngah hian kan la Presbyterian zel a, a lawmawm theihtâwp e.

(2) Pathian chungnunna (Sovereignty of God) Presbyterian hnahthlâkho hian engkim chunga Pathian lalna leh thuneihna hi rin dan leh pawm dan khai felna hnukpuiah an neih a, an ngai pawimawh hle. John Calvin-a theology laimu anga sawi thin a ni a; thurin puanchhuah leh thuinchhâng(catechism)ah he thu hian a lailum a chang zel thin. He thutak hi thilsiamah leh enkawlnaah te, chhandamnaah te a lang chiang a. A kutchhuak pumpui chungah ro relin Pathian chuan van leh khawvel thil thleng tinrengah a tum tihlawhtling turin a thawk a. A kohhran pawh a thilsiamte enkawl leh venhim kawnga mawhphurtu a ni. Khawvel hi Pathian in leh lo, a hming ropui nana a din a nih avangin chumi tichhe zawnga chêtna reng reng chu hmasang atangin kan kohhran hnahthlâk chuan Pathian donaah kan ngai thin.

(3) Chhandamna (Soteriology). Chhandamna chungchangah Presbyterian pawm dan a awm deuh em? tih zawhna hi “Awm teh reng e” tiin kan chhang. Presbyterian kohhrana rawngbawltu tam takin mahni kohhran kalphung hre lovin, thenkhatin hre reng chunga pawisa lovin, thenkhatin hriat loh vangin rindan hrang an zui vak thin. Chung mite chuan Presbyterian leh Reformed hovin chhandamna kalpui dan han sawi hran tur kan nei lo e, an ti sam mai ang. Kan rilru hi a tai darh nasat (pluralistic)tawh avangin reformed soteriology ngei pawh kan bosal tawh a ni zawk. Chhandama awm turin mihring chu mahni intanpui thei lo leh inbuatsaih thei lo khawpa suala sawngnawi tlat a nih thu hi Reformed thurin laimu a ni. Mihring hi engnge a nih tih zawhna kan chhan dan, mihring kan thlir dan leh pawm dan hian chhandamna thua kan thurin a siam a. Hmasâng British puithiam Pelagius-a te ang, tlûkna thu pawm ve lo, mihringin thlarau puih loh pawhin Pathian thu kan awih thei tih ring mite chuan kan thurin hi an hrethiam reng reng lo vang. Mihring chuan Thlarau puihna avang chauhvin a kotu kohna a chhâng thei tih hi Calvina zirtir dan a ni a, Thlarau Thianghlim tanpuina a ngaih pawimawh em avanga ‘theologian of the Holy Spirit’ tih a ni âchâng reng a. Chu chu Calvinist-ho, Reformed kristian leh Presbyterian hnahthlâk zawng zawngte kawng hlun a ni. Tlu hnu mihring zingah chanchin tha kohna a lo ri a, chu aw chu nung tura ruat apiangten an lo ring a(TT 13:48), a ringtute chu thiamchantir an ni a, thiam a chantirte chu a tâwp thlenga humhimin a tâwpah a la chawimawi dawn a ni(Rom 8:29,30). Westminster Confession leh Welsh Confession kan en chuan, Calvina theology zung hrual panga Five Points of Calvinism an tih kha an thukphûm vek tih kan hmu ang. Chung thil panga te chu engte nge a nih lo sawi den den ila: - Chhiat Pumhlûmna(Total Depravity).‘Puma khawlohna’ ti ila a fiah zawk em?Scotland Presbyterian theologian Donald Macleod-a chuan 1990 khan lehkhabu Behold Your God tih bu a ziak a. Chutah chuan suala mihring tlûk thu hi a sawi pan deuh a, America lama reformed theologian pakhat Dr.Engelsma chuan a lo ngaimawh hle.

Scotland Presbyterian Kohhran chuan an Confessional Presbyterianism an kalsan ta em ni, tiin a rawn au chhuak a. Macleod-an total depravity a sawi mâm dan chu reformed thurin pangngai pênsan-naah a ngai a ni. Presbyterian hnahthlâkho thurin zawng zawngah tlu hnu mihring dinhmun hi sualin chiah chhuak vek anga pawm theuh a ni a. Pathian pan tura mahni inbuatsaih theihna pawh nei lo khawpa chau a nih avangin Pathian khawngaihna a mamawh ngawih ngawih a. Thlarau Thianghlimin a puih loh chuan a hriatna a thimin a duhna a chak lo va, a dinhmun chu a beidawnthlâk tawpkhâwk a ni. Chu dinhmun hniam tak chu Enlightenment rilru atangin lainatna leh chhe lutuka hriatna a lo chhuak a, siamthatuten mihring an thlir dan(reformed anthropology) chu kawng hrang hrangin miten an rawn do ta a. Sual saa piang han intih te chu tun lai Pathian thu zirtu tam tak chuan an pawm hlei thei ta lo a nih hi. Heng thuah hian kan thurin hlui kha kan la vuan zel em? Kawng tha awmna kawng hlun kha pensan kan duh ve tawh mai em? - Khawngaihnaa Thlanlâwkna(Unconditional Election). Westminster Confession emaw, Welsh Confession emaw en ila, ruatlâwk thu leh thlanlâwk thu hi a tel chiang hle. Eng vang nge kan tih chuan Bible thurin a ni miau a(Rom 8:29; Eph 1:4,5,11 etc), thurin pêng dang sawifiah nan a tangkai bawk si avangin reformed thurinah hmasang atangin pawimawh taka telh thin a ni. He thutak pawm tlat thintute lamtluang kha kan la chhui zel em? - Chinnei Tlanna(Limited Atonement).

Reformed thurin phuah chhuaktu Pathian thu thiamho chuan Krista thihna sâwtna chuan chin a nei lo tih leh, chanchin tha hril dawngtute chu tihtak zetin Pathianin amah pan turin a sawm tih pawm chungin, Krista thihna hian Pathian mi thlante sual lâk bo va, chung mite chu siamtharna hmanga rinna pêk a, ropuina chang tura a tâwp thlenga humhim hi a tum ber niin an hre theuh mai. Chu thurinah chuan dingin kan la Presbyterian zel em? - Hnar zawh loh Khawngaihna(Irresistible Grace). Pathian chuan chatuan ata a mi ni tura a ruat leh a hriatlâwkte a kohna reng reng a hlawhchham ve lo. Lal fapa inneihna ruai chungchanga Lal Isua sawi, lawichaw kîl tura sawmna tluangtlam ang kha a ni lo va, heta kohna hi chu mihring thinlung chhunga Thlarau hnathawh chungnung(sovereign call), piantharna hial thlentu a ni a, hnial zawh rual loh kohna a ni(Jh 10:3,4; cf.6:44; Rom 8:7). Kan kohhran thurin hlui chhuanawm tak tak kha kan hnuchhawn tawh em? - Mithianghlimte Beihhlen theihna(Perseverance of the Saints).Pathian mi thlanten an rinna nun kawng an zawh khawchhuah theihna hi anmahni theihna a ni hauh lo va, a kotu Pathianin kawng tluana a venhimna vang zawk a ni. Chu venhimna avang chuan dona leh hnualna karah pawh chhel takin an kal hram hram zel ang. Hei pawh hi Presbyterian kristianho rinna kawng bel tak pakhat a ni a, kan kawng a la ni ve zel em?

(4) Thlarau Thianghlim thurin(Pneumatology).John Calvin-a kha eng vanga ‘theologian of the Holy Spirit’ ti nge an nih le? ‘Thlarau Thianghlim theologian’ han tih ngawt mai chu a mak viauin a hriat a. Thil dangah a dik theihna sawi tur awm mah se a chhan bulpui berah chuan mihring chhandamna thuah Thlarau Thianghlim hnathawh a dah bulpui em vang a ni. Kan PCI thurin No.6-nain, ‘Thlarau Thianghlim, Pa leh Fapa ata lo chhuak chuan mite chhandamna changtuah a siam a…’ a tih kha.

He thuah hian B.B. Warfield-an, “Hmasang mi Augustina hnen atangin sual thu leh khawngaihna chungchang thurin kan dawng a, St.Anselm-a hnen atangin tihlungawina thurin kan dawng a, Martin Luthera hnen atangin rinna avanga thiamchanna thu kan dawng a, John Calvina hnen atangin Thlarau Thianghlim thurin kan dawng”, a ti mathlâwn lovin he thurin hmang hian John Calvin-a khan kohhran thurin a rawn tiphuisui a ni. Tlu hnu mihringte duhthlanna chu a chak lovin a sawngnawi zo tawh a, Thlarau Thianghlim tanpuina lo chuan mi tumahin Isua hi Lalpa atan an rawn pan phâk tawh lo. ‘Piantharna’ kan tih fo hi chung mitena ‘ka duh’ ‘ka duh leh lo’ an tih kawi mai mai thil aia chungnung, Pathian Thlarau hnathawh avang chauha thleng thei, mihring nihphung(nature)khawih danglamna lehsiamtharna a ni a, chu aia pawnlawi leh awlsam zawk chu presbyterian-ho hian an duh ngai lo. Chungnung atanga Thlarau Thianghlimin mihring chhûngnung lama a thawh, mihring nun rawn tidanglama rawn siamthar thin chhandamna hi Reformed thurin pawimawh elkhên mai a ni e. ‘Thu-tlûkna’ tha siam hi kawng tam taka a pawimawh laiin, hleihluak taka kalpuituten piantharna tluk hiala an chawisânnaah ‘decisional regeneration’ a lo chhuak a, chu thil chuan keini pawh telin kohhran khawvel hi a rawn tihnawk zau hle. Khang te khan min la chîm em?

(5) Hun Hnuhnûng thurin(Eschatology).Kohhran Siamthatute khan hmasang kohhran hun hnuhnung thurin, Augustine-a ten an tuaihnûm kha an tidanglam lo va, belhchhah chuang lovin an pawm thei. Chuta an dinngheh avang chuan an hun lai Anabaptist-hovin kum sâng rorêl thurin an han tharthawh te pawh chu an ûksak lem lo. An pawm dan chu Belgic Confession Article 37-na en la, Westminster Confession Article 32-na leh 33-na en bawk la, a tâwkfang chuan hun hnuhnung thurin an puang tih i hmu ang. PCI Thurin No.10- na nen zai khatah a luang a ni. Heng bâkchhama sawichian tumtuten lungrualna an neih theih lohzia chu kum zabi 20-na kohhran chanchin ringawt pawh hian min hrilhfiah tâwk a ni.

(6)Thuthlung fa nihna(We are Covenantal).Kristian thenkhat leh kohhran thenkhat anga Bible history leh chhandamna chanchin emaw, Pathian inlârna leh thuthlunte reng reng hun hrang hranga sem darh thliah thluah lovin, Presbyterian-ho chu Pathian chhandamna thuthlun pakhat pawmtu an ni. Adama hnenah, Noa hnenah, Abrahama hnenah, Davida hnenah te thu a lo thlung a nih pawhin, chung chu Pathian khawngaih-chhandamna thutiam pakhat puan chhuahna kawng hrang chauhah an ngai a, chung zawng zawng chu ropui takin a Fapa Isua Kristaah a hlen chhuak a, a la tifamkim dawn tih an ring. Chhandamtu atan Isua chauh an pawm a, chu chhandamna chang tur chuan rinna chauh an hmachhuan a, an chan theihna bul chu khawngaihna chauh a ni tih an puang. Bible chauh hi Pathian aw dik lo thei loah an pawm a, engkim hi Pathian ropui nana din leh siam a ni tih an ring. Soli Deo Gloria! Chu lungpuiah chuan kan la ding zel em? POLITY Presbyterian Kohhran chuan rawngbawl hna nghet pahnih(two offices) a nei. Presbyterian hming tobul hla zawk chu Grik tawng presbuteros(elder =upa)tih a ni a. A awmze bul chu kum thua upa, mi puitling leh rintlâk, Mizovin ‘vâl upa’ kan tih ang hi a ni.

Hman lai Juda hovin sunagogue hotua an hmante an ni a. Juda sakhaw invawn dan chu kohhran hmasaten an chhawm a, chu chu entawnin Presbyterian kohhran chu an inkaihruai a ni. A tobul hnaivai zawk chu Kohhran siamthatute hun kha a ni a. Zurich khuaa Zwingli-a leh Bullinger-a te, Basel khuaa Oecolampadius-a te, Strasbourg khuaa Martin Bucer-a te, Geneva-a John Calvin-a te khan mahni hmun theuhvah tirhkohte hun laia kohhran invawn dan kha hriat tumin an bei theuh a, a tâwpa an lungrualnaah Calvina hming a lang ta bîk deuh chungin an beihho leh an zaa sualchhuah a ni a, fak an phu theuh. Tin heng hun lai hian tuna Presbyterian kalhmang tak tak hi harsatna hrang hrang avangin an tipuitling thei rih lo. ‘Ram tha lehzual châka rûm’ ang an ni. Calvina zirtirna an put darhna ram hrang hrangah an lungkham thil ti theia zalênna an hmuh ang zelin siamthat kohhran hmêl chu a chiang ta deuh deuh a. Sap tawng hmangho chuan Scotland rama John Knox-a hova an tih dan an zui ta deuh ber. Tunlai khawvelah chuan American Presbyterian-ho hi an lo ropui ta a, kawng tinrengah hmahruaitu leh mi entawn an lo ni ta. American-ho chuan Presbyterian Kohhrana hotu nghet chi hnihte chu Upa ve vea sawiin Pastor-ho kha Zirtir Upa(teaching elder)an vuah a, Kohhran Upaho kha Rorel Upa(ruling elder)an vuah leh mai a, thunei zawk leh chungnung zawk an awm lo.

Presbyterian kohhran chu upate rorelna kohhran a ni, tih hi a dik chiah a. Chutih ruala kan chhinchhiah tur chu ‘Upa’ tih hian a elder-ho leh minister-ho kha a huap vek tih hi a ni. Upa chi hnih kan nei a, sakramen chungchang bîkah Kohhran Upate khan Pastorte puitu anga sawi an hlawh deuh thin. John Knox-an tirhkohte hun liam hnua Krista sikul tha ber tia a sawi Geneva Kohhran a din laia Calvin-a fimkhur em emna chu, kohhran inthunun zo lo, kohhran chhangchhia leh sawngnawi din palh a hlau a ni. Chuti a nih loh nan kohhran rorelna kengkawh thei tur, thuneihna rintlak thei ang ber tur duan chhuah a tum a, chutah chuan upaho mawhphurhna a rip ta hle a ni.Presbyterian Kohhran reng reng chu hotu pakhat thua kal lovin, tualkhat kohhran mahni thu thua kal hek lovin, committee leh inkhawmpui thu ang zelin a kal a. Tlûkna avanga sualin mihring a chiah hnehzia(total depravity)pawmtu an nih avangin kohhran pawl thenkhat anga rorelna mimal kuta dah mai mai him lohzia an hria. Engkim relho thin kohhran an nih avangin an awmna ram tinah kalphung chhuanawm tak an nei thin a ni. Chutiang kalphung tha chu la chhawm zelin kan inhria em?

WORSHIP 
Tun lai America ram Protestant kristian chhuantharho khuan reformed faith an âwn thar a. Khu khuan siamthat kohhran Pathian biak dan lamah a hruai zel dawn em tih an thlir mêk a ni. Chung thil pahnih, reformed faith leh reformed worship chu Terry Johnson-a chuan kal dûn lo thei lo, then theih loh niin a hria a, a lehkhabu ziah Reformed Worship:That is According to Scripture,( Reformed Academic Press,2008)ah chuan, “Calvinist-hovin thlaraua zah taka Pathian an biak dan mawl leh tluang pangngai chiah khan siamthat thurin leh nunphung tha kha a chhawm chhuakin a châwm lian thei a, khatah khan kan kîr leh a tûl a ni”, a ti a(p.59).

Calvinist-ho biak dan pangngai chu engnge ni, kan tih chuan Westminster Confession of Faith 21.1 ah tihian ziak a ni: “Pathian tak biak dan pawm tlâk chu amah Pathian ngeiin a duhzawng a puan chhuah milin a siam a; chuvangin chu Pathian chu mihring suangtuahna leh phuahchawp emaw, Setana remruatna zuia hmuh theih aiawh siam emaw, Pathian Lehkhabu Thianghlimin a sawi loh thil dang reng reng emaw hmanga biak tur a ni lo” tiin.

Reformed Worship, tih chu Presbyterian Worship tihna chiah a ni a, Presbyterian kohhran hnahthlâkhoten Pathian an biak dan kha a ni. Chutah chuan Pathian thu(Bible) dinhmun a pawimawh a, biak dan chu Pathian thuin a sawi ang zelin a ni tur a ni. He thuah hian Luthera chuan a pawm zau deuh a, Bible thu nen a inkalh loh chuan, a ti mai thin. Chutih laiin Calvin-a chu a fîr hle thung a, Bible-in a sawi ang tak zelin, tih hi a duh dan a ni reng. Tun lai biak dan, talent show-na ang ziazâng hi ni lovin Pathian biakna dikah chuan zahawm taka Bible chhiar te, sawifiah te, hril te, sak te, tawngtai te a ni tur a ni. Johana 4:24-a kan hmuh angin ‘thutaka Pathian biak’ leh ‘Thlaraua Pathian biak’ a ni tur a ni a. Thutaka Pathian biak, tih chu “Pathian thu buin a sawi ang taka Pathian biak’ a ni a, sawi thin dan chuan Regulative Principle of Worship tih a ni. Kan biak danah Pathian Lehkhabuin ro a rel(tur a ni) tihna a ni. ‘Thlaraua Pathian biak’ tih pawh Johnson-an a sawi angin ‘thinlunga Pathian pawlna’ ‘chhung rila Pathian biakna’ a ni a, Pathian chu Thlarauvin a tihthar thinlung puin, khawvel leh tisa duhzawng ngaihtuah lovin, tihdan tinreng Bible chang tlawhchhan fel tak neiin biak tur a ni.

He biak dan kawngpui sir tawnah hian, duhthu tling lo biak dan chi hnih a awm thei. Chu chu Low Church biak dan leh High Church biak dan tiin then ila. Low Church Charismatics or Revivalistic Worship ah hian Pathian thutaka din tlat aiin miten nuam an tih dan leh an phûrna an zui chiam thei. Chuti zawng chuan hotu thenkhatin an mite an hruai vak thin. Chutiang hmunah chuan Spurgeon-an, “Berâm an châwm nge kêl an chawk phûr?” a tih kha kan fimkhurna tur a ni ang. Chutah chuan miten nun an hmu emaw, Pathian ropuizia an hmu emaw a nih chuan a lawmawm a, fimkhur chu a pawimawh reng a ni. High Church, phuahsa ringho zingah rilru tel lova biak, rilru tel lo a ni tih hriat theih si loh biak dan khawro, puithûna suak mai mai a hnai reng a. Bible chang tlawhchhan nei mang lo biak dan phuahchawp laka fimkhur a tul ve reng. Hetia han sawi takah hian kan Biak Dan Bu thara ‘Rawngbawltu Hlan’ tih vel lo lang ta hian rilru chawh thawh a nei. He biak dan hian ringtute puithiamna thurin pawimawh kha a hluihlâwn em? Nge a rawn kalh hial zawk? Ringtu puitling theuh theuh, Pathian hnena mi dangte hlântu inruat emaw, a hlântu tur chu mipuite an ni kan ti emaw pawh ni se, eng bung leh châng tlawhchhanin nge he thil hi kan phuah? En ngun a ngai zel a ni. Presbyterian Kohhran chu a tir atang rengin thu phuah sa ringa Pathian be thin Kohhran(liturgical church) kan ni lo hrim hrim a. Westminster thurin siamtuho khan chutiang kohhran nih chu an duh ve lo. Kaihhruaina bu, a duhin an hman theih tur(Directory for Public Worship)erawhchu an siam ve.

Kum 1952 Dawrpui Assembly(tuna Synod)in Pathian Biak Inkhawm Hruaina Bu siam a rawt anga Rev Saiaithangan a buatsaih tak, 1953-a chhuahah khan thuhmahruaiah tihian a ziak a: “He Inkhawm Hruaina Bu hi Assembly thua lo chhuak chu a ni ngei a, mahse Assembly(tuna Synod)hian tumah hman luihtir a tum lo ve. Hmang thei lo leh duh lote chu an thu thu a ni ang. A then chauh hi hmang duh an awm pawhin, an duh ang ang chauh an hmang zel tur a ni” tiin (p.8). Bu hmasa hian kan kohhran hnahthlâkho zinga Inkhawm Hruaina bu dinhmun pangngai, a duhin hman, duh lovin hman loh kha a rawn luah chiah a, tu tan mah a hnawksak lo. Bu thar ber (2010 Edition) thurâwn chu a khauh tawh deuh: “Pathian biak inkhawm kaihruai ngun ber Pastor-te leh Kohhran Upate pawhin Pathian Biak Inkhawm Hruaina Bu thar hi zawm tum hram ni sela,….mahni duh thua phuahchawp ai chuan a awm sa hman mai hi a tha zawk a….” a rawn ti ta a ni(Thuhmahruai, p.viii). Thil awm dan en hian 2020 velah chuan, “Hman theuh tur….”kan ti tawh mai ang em?

Khawvel zau zawk thlirin kohhran hawiher hian, ‘the priesthood of all believers’(ringtu zawng zawng puithiamna)kha hnuchhawn hret hretin, a aiah ‘the priesthood of ordained ministry(nemngheh mite puithiamna) lam a hawi deuh deuhin a hriat a. Kan biak dan bu thar hian ‘Reformed Worship’ rim aiin ‘Episcopal Worship’ rim a nam zawk em? Chuti ni se Presbyterian nih zel aiin hnuchhawn hret hret hi kan kalphung tur a ni mai ang em? Kan berampute zingah puithiam kawr ha châk awm tanin kan hria em? Châwmtu(pastor)nih aia hlântu(puithiam)nih tum? Kan Presbyterianism en chian a tulna pakhat chu holiday chungchang hi a ni. Ni serh(holy day)kan ngah ta hle mai. Kan kohhran calendar en ila, kum khat chhungin ni serh sawm chuang kan nei ta. Hengah hian Bible chang tlawhchhan fel tak kan nei zel em? Nge kohhran inkhawmpuiin kan rel chu him em em turah kan ngai mai? Presbyterian hmasaho chu heng thilah hian an fîr em em thin.

Thuthlung Hlui sabbath chu thuthlung thara ‘Lalpa Ni’ hian a thlâk tih pawmin tuna Sunday kan hman hi kohhran hmasate hun ata pawimawh taka hman a ni a. He ni serh hi Presbyterianho chuan an ngai pawimawh em em thin. Bible thu tlawhchhan tur tha tâwka an hriat vang a ni ber a. Ni dang reng reng chu Presbyterian hmasahovin an serh duh ngai lo. Tun hma deuha American Presbyterian theologian hmingthang Dr. Samuel Miller-a, Princeton Theological Seminary-a Professor chu a hun lai thu har tinreng chhâng fiahtu ber a ni thin. Chu pa chuan, “Presbyterian hovin ni serh an hmang ve ngai lo” a ti thlâwt a(Presbyterianism, Philadelphia, Presbyterian Board of Publication, 1835, p.73). Dik tak chuan an regulative principle of worship-in a phût ang taka serh tur chu Sunday chiah hi a ni reng a. Ni serh leh ni bîk neih dêm dûm hi hmasang atang rengin Presbyterian kohhran zia a ni ngai lo.

Heng bâkah hian dan leh kalhmang fel tak nei kohhran(constitutional church)kan nihna te, Bible zirtirna pawimawh khai khawmna, thurin puan chhuah nei (confessional church)kan nihna te pawh sawi tur a awm zel. Heng thil tinrengah hian Presbyterian kohhran zia kan pu zelin kan hria em? Kan inkhawmpui te pawh hian a ropuina phênah dikna leh takna a chhawm zel em? Siamthatute khan mipui aw hi Pathian aw-ah an pawm ngawt lo va, mipuite chu Pathian aw ngaithla turin an fuih zawk thin. A tam lam duh dan hi Pathian thu nên a inrem em tih en zel chungin kal i siam ang u.

Bibliography
1. Assam rama Presbyterian Kohhran Dan Bu chu, Loch Printing Press, Aijal, 1925
2. Paul Carlson, Our Presbyterian Heritage, David C.Cook Publishing Company,Elgin,IL, 1976
3. Dr Peter A.Lillback(Ed), The Practical Calvinist(An Introduction to the Presbyterian &Reformed Heritage), Essays in Honour of Dr.D.Clair Davis,Christian Focus Publications, 2002
4. G.D.Henderson, Presbyterianism, The University Press, Aberdeen, 1955
5. Charles Hodge, What Is Presbyterianism? Presbyterian Board of Publications, Philadelphia, 1855
6. The History, Constitution, Rules, of Discipline and Confession of Faith of the Calvinistic Methodists or Presbyterians of Wales, Carnarvon, 1900
7. Donald K. McKim, Presbyterian Questions, Presbyterian Answers, Geneva Press, Louisville,Kentucky, 2003
8. Dr.Samuel Miller, Presbyterianism, Presbyterian Board of Publication, Philadelphia, 1835
9. D.E.Jones, Kohhran Thunun Dan leh Thurin Thlan Khawm, Welsh Calvinistic Mission Press, Sylhet, 1912
10. Joan Gray & Joyce C.Tucker, Presbyterian Polity for Church Officers, Westminster John Knox Press, 1998
11. Rev. John Roberts MA, The Calvinistic Methodism of Wales, The Calvinistic Methodist Book Agency, Caernarvon, 1934
12. Rev. Saiaithanga,Presbyterian Kohhran, The Synod Bookroom,Aijal, 1965
13. _____________,Pathian Biak Inkhawm Hruaina(Approved by The Lushai Presbyterian Church),The Welsh Mission Bookroom, Aijal, 1953
14. R.C. Sproul, Grace Unknown(The Heart of Reformed Theology),Baker Books, 1997
15. The Book of Order and Rules of the Presbyterian Church of Wales, Caernarfon, 1978
16. C. Sangzuala,Kohhran Upa, Synod Press, Aizawl, 1985
17. ‘Presbyterianism’ Lungphum (Mission Veng Kohhran Centenary Souvenir) Muka Press, Aizawl, 1998.
18. Mizoram Presbyterian Kohhran Pathian Biak Inkhawm Hruaina Bu, Synod Worship Committee, 2010
19. Jean-Jacques Bauswein and Lukas Vischer, The Reformed Family Worldwide, William B. Eerdman Publishing Company, 1999 Seminar Papers, Lectures & Online Articles
20. R.Lalthanmawia, Presbyterian Kohhran(Pastors’ Retreat Paper,1994)
21. H.Remthanga, Mizoram Presbyterian Kohhran Kalhmang Tlangpui(Aizawl Chhim Presbytery Rawngbawltute Retreat Paper, 2009)
22. Identity for the Presbyterian Church of America(PCA Position Paper, 1998).
23. Andrew Webb, Why Do Presbyterian Observe Holidays? December 2009
24. Prof.T.F.Torrance, Eldership in the Reformed Church, 1984
25. Iain H.Murray, The Problem of the Eldership and Its Wider Implications, 1995
26. Dr.Mark Sidwell, The Presbyterians:History, Controversies, and Trends, 2009
27. Jack B.Rogers & Donald K.McKim,Pluralism and Policy in Presbyterian Views of Scriptures, 1992
28. Dr.Michael Horton, What is the Reformed Faith? 1993
29. ______________, Reformation Essentials(Five Pillars of the Reformation),2010
30. Kevin Reed, Presbyterian Worship:Old and New, 1996
31. Charles J. Terpstra, Reformed Eschatology, 1999