Thuhmahruai
Kohhranho Thunun Dân (Rules of Discipline) kan Kohhranin kan hman hi Welsh Kohhranho hman thin atanga buatsaih a ni a. Welsh Kohhran chuan kum 1801 atangin an hmang tan a. Kum 1823-ah kimchang zâwkin Thurin leh Dân dangte nen inkawpin an chhuah a; chu chu Sâptawngin an letling a, kum 1900 khân an chhuah leh a. Rev. D.E. Jones-an (Zosaphluia) Mizo tawnga a lehlin chu kum 1912-ah chhuah a ni a. Kum 1953 khân Rev. Saiaithangan uluk takin a ennawn a, thu hlâwm hrang hranga then darhin, a awmze chiang tâwk lote a tichiang a.
Kum 50 zet kan hman hnuin kum 2007 Synod Inkhâwmpuiah Kohhranho Thunun Dân chu ennawn rawtna a lo lût thar a. Synod chuan ennawn chu tha a ti a, Synod Executive Committee kutah bawh zui tûrin a dah a. Tichuan SEC chuan bawh zuiin rawtna a siam chu 2008 Synod-ah a thlen leh a (SEC 217:7; 218:28; 219:40). Synod chuan, “SEC-in rawn entha leh se, Synod-ah rawn thlen leh rawh se,” a ti leh a (2008 Synod, Gen. 89). SEC chuan ruahmanna siam tûrin mi 4 (pali) a ruat a. Chûng mite chuan an ruahmanna chu SEC-ah an thlen a, SEC chuan Synod-ah a rawn thlen leh a ni. Kum 2009 Synod chuan ngun taka a ngaihtuah hnûah, ‘SEC-in hman nghâl tûrin rawn zût mâm rawh se,’ a ti a (2009 Synod Gen. 65). Chutiang taka zût mâm hnûah hman theih tûrin peih fel a lo ni ta a ni.
A chhûng thu han en hian Kristian nun dân kaihhruaina lam thu a tam zâwk avângin a bu hmingah ‘Kohhranho Thunun Dân tih thin chu ‘Kristian Nun Kaihhruaina’ tih a ni ta a ni.
Kan Kohhran kal zêl dân tur leh hruai zêl dân tûr tihlan chian nân Kristian Nun Kaihhruaina chiang tak neih a tûl a, chumi atân hêng dânte hi siam a ni. Thurin lam leh hruaina lam atân hian Bible hi kan rinpui ber a ni a; hêng inkaihhruaina te hi Bible rinchhana siam vek a ni. Chuvângin hêng kaihhruainate hi pawisa lo mi leh zawm lo mi chu, dik takin kan Kohhran mi an ni lo. Amaherawhchu, hêng inkaihhruaina thenkhatte hi chu Kohhranin an chungchâng ngaihtuah nân a hmang kher lo; mahse a vai hian Kohhranin a pawm leh a tum chu a ni vek e. Bible zirtîrna kan hmuh, kan Kohhranin a pawm leh a tum pum pui hi, dân tlêm têa ziak chhuah rual a ni lo vang; he inkaihhruaina dân tlêm tê hi kan Kohhranin a pawm leh a tum tilang chiangtu chauh a ni.
1. Kohhrana Tel Tûr Mite
Mi tu pawhin Kohhrana luh dil sela, hmanhmawh taka lawm luh tûr a ni lo. Fimkhur takin fiah tûr a ni a, hêng enna tûr thu târ chhuahte ang hi ni ngeia hriat emaw, a tâwk a fang chuan ni ngeia rin emaw te chauh lawm luh tûr a ni.
(1) Thlarau Thianghlim hnathawh azâra mi sual an nih inhre mi, an sual pawitia, lungngaia, chhanchhuahna zawng mi an ni tûr a ni (Tirh 2:37-38; 16:30).
(2) Chhanchhuahna chu Krista hnênah chauh zawng a, Chhandamtu ropui leh Palai tha famkim anga pawm mi an ni tûr a ni (Jn 16:8-9; Phil 3:7-9).
(3) Krista leh a felnaa riltâma tuihâl mi an ni tûr a ni; chu lama sâwtna kawng dik Pathian thu ngaihthlâk te, Chanchin Tha zirtîrna te, Pathian biak inkhâwm te, tawngtai te an ngaihsak tûr a ni (Mt 5:6; Heb 10:25; Rom 12:12).
(4) Kristian thurin pawimawhte nêna inkalh ngaih dân eng mah an pawm tûr a ni lo; hêng – Pa leh Fapa leh Thlarau Thianghlim thu leh thurin pawimawh dangte hi an phat tûr a ni lo va, pawm tlat mi an ni tûr a ni (Jak 1:6-8).
(5) Kohhran hi Krista Kohhran, Krista phun, Chanchin Tha ‘Thutak ban leh innghahna’ ni ngeia ngai mi an ni tûr a ni (Mt 16:18; 1 Tim 3:15)
2. Kristian Nun - Sakhaw Lam
(1) Pathian biak hi Kristiante tih tûr pawimawh ber leh hmasa ber a ni a, an thlahthlam tûr a ni lo va, an ngai pawimawh reng tûr a ni (Jn 4:23-24; Heb 2:3; Mk 12:29-30).
(2) Ringtu zawng zawngten Pathianni an serh tûr a ni. Khawvêl hna tih lâwk theih leh ni danga tih theih– lei leh zawrh te, thu pawimawh dang sawi te tih loh tûr a ni. Hahchawlh nân hmanga mut bo nân leh mahni châkkhai lam nâna hmang lovin, Pathian biak nân leh a thu ngaihthlâk nân te, an thlarau tâna sâwt tûr apiang tih nân te an hmang tûr a ni (Ex 20:8-11; Is 58:13-14).
(3) Pathian thu nêna inrem lo leh Kristian rilru tichhe thei apiang – khaw thim thiltih nawmna te, fiamthu bawlhhlawh te, khawvêl lâm te, zu in leh ruihhlo leh damdawi hman sual te, hlimhlawpna fel lo te kalsan tûr a ni (2 Kor 6:17; Rom 12:2; Eph 5:11).
(4) Inngaihna leh hurna lam thil sual eng mah an ti tûr a ni lo va, sual anga lang leh sual lama min hruai thei– milem tha lo leh film tha lo en te an chîng tûr a ni lo (1 Kor 6:9; Eph 5:3).
(5) Inthâwina lam thil rêng rêng an ti tûr a ni lo, Puithiamna lam thil eng pawh - aisân te, aien leh kutze en lam chi rêng rêng tih loh tûr a ni. Kawng engkimah Pathian an ring tûr a ni (Lev 19:31; Deut 18:10-11; Ex 20:3; Lk 4:8).
(6) Pathian thuin min zirtîr dân ang chiaha Pathian kan rinna rilru kai pêng thei apiang – milem biakna lam thil te, khawvêl mite ni serh leh thla serh te, hapta ni tha bik neih te an pawm tûr a ni lo. Khawvêl miten thiang lova an ngaih, rin dân âtthlâk - pangên te leh puithuna âtthlâk thil dangte pawh pawisak tûr a ni lo. Hêng zawng zawng hi Pathian tak leh khawvêl pathian pawm kawpna a ni (Lk 4:8).
(7) Pathian ram tâna pawimawh thawhlâwm, Pathian thua langte hi theih ang tâwkin an ngai pawimawh tûr a ni. Krista lâk khâwmpui lo chuan a tidarh a ni (Lev 27:30-34; Mt 12:30).
3. Kristian Nun - Mahni Lam
(1) Mihring tikhawlo thei leh Pathian rawngbâwl tûra tlâk lohtîr thei, ei leh in leh zûk leh hmuam insûm tûr a ni (Lk 21:34; 1 Kor 6:10).
(2) Mi tin mahni phû tâwkin fai tak leh fel takin inchei tûr a ni. Chapona tur leh tlakranna tur lam emaw, sual lama min hruai thei tûr lam emawa incheina chu pumpelh tûr a ni. Thuthlung Tharin Kristian nun dân zînga a ngaih pawimawh tak chu thiltih thata inthuam hi a ni (1 Tim 2:10; 1 Pet 3:2-4).
(3) Mi tin mahni hnathawhah an rinawm tûr a ni. Thawh theihna leh thawhna hun an neih kha an thatchhiat bosan tûr a ni lo. Chutiang mi Lalpan a dem nasatzia kha an hre reng tûr a ni (Mt 25:26).
4. Kristian Nun - Chhûngkaw Lam
(1) Chhûngkaw thu an rêl fel tûr a ni a, an fate Lalpa hriatna leh zahnaah an kaihruai tûr a ni. Chhûng inkhâwm an theih ang angin an nei tûr a ni. Chuti lo chuan an fate Lalpa thua kaihhruaina remchâng an nei lo vang (1 Tim 3:4; Eph 6:4).
(2) Mihring inlaichinna kawng hrang hrang chungchâng, Bible-in a sawite hi tha takin an zâwm tûr a ni (Eph 5:22-6:3; Kol 3:18-22; 4:1).
(3) Ringlo mi nên an innei tûr a ni lo va, Kristian Thurin tlângpui phat mite leh rinna hrang pawm mite an nei tûr a ni hek lo. Inneih hmâ leh inneih laiin khawvêl dân tha lo an zâwm tûr a ni hek lo. Innei tûr apiangin an thlarau thatna an ngaihtuah tûr a ni (2 Kor 6:14).
(4) Kohhran mite chu Kohhran dân lovin an innei tûr a ni lo va, chutianga inneite chu lawmpui tûr pawh a ni lo, a mâwi lo a ni (2 Kor 6:14-15).
5. Kristian Nun - Kohhran Invawn Lam
(1) Unauvin a unau thil tisual hmu sela, Krista zirtîrna ang ngeiin zilh that tum sela a tha. Zilh that theih a nih loh chuan thunun tûr a ni (Mt 18:15-17).
(2) Kristian inhêk sela, Kohhranhovin fîmkhur tak leh tan lam nei lovin zâwt chhuak rawh se. A chungthu an tihtlûk hmain hretute thu fel takin ngaihtuah rawh se. Kohhran thununna tuar tûr a nih chuan, khawngaihna neiin thunun rawh se (Deut 19:15-18; Gal 6:1).
(3) Thunun ngai khawpa thil sual titute chu an sim nân leh, Kohhrana tih chîng mêkte vên nân thunun tûr a ni. A sim hunah lâk luh leh tûr a ni. Lâk luh a nih hmain Kohhran rawngbâwlnaah chanvo eng mah neihtîr tûr a ni lo. A sim leh sim loh en nân thla ruk a tâwk ang (1 Kor 5:1-5); (Nupa Chung-châng Dân, Bung 5:1).
(4) Kohhranhovah inhnialna leh inrem lohna lo chhuak sela, Kohhranhovin ngaihtuah sela, an theih chuan thu tlûkna fel tak siam rawh se. Thu tlûkna an siam theih loh chuan Kohhran rorêlna sâng zâwkah thlen tûr a ni (Ex 18:21-26).
(5) Kohhran Pathian Biak Inkhâwmte chu fel tak leh urhsûn taka vawn tûr a ni. Bible chhiar te, tawngtai te, hla sak te, thuhril te a tel tûr a ni. Inkhâwm chhûng chu a rei lutuk tûr a ni lo va, inkhâwmnaa tih apiang chu inkhâwmhote sâwt tlânpui tûr ngaihtuaha tih ni vek rawh se (1 Kor 12:7; 14:40; 1 Thes 5:11).
(6) Kohhran Pathian Biak Inkhâwmte chu Kohhranho thlan leh Inkhâwmpui nemngheh miten an ho tûr a ni (1 Tim 3:1-13; 4:14-16).
(7) Kohhran Upa atân Pathian ngaihsak mi leh Kohhran Thurin nghet taka vuan mi lo chu thlan tûr a ni lo. Hêng Chanchin Tha bu lite leh Kristian Nun Kaihhruaina te, Sakramen thute leh Kohhran Thurin te an hre tûr a ni (2 Tim 3:14-17).
6. Kristian Nun - Khawtlâng Lam
(1) Miin an chunga an tiha an duh tûr ang chu mi chungah tih an tum tûr a ni (Mt 7:12; Lk 10:33-37).
(2) Mihring leh pâwlho tâna tha tûr tanpuina lam thil tih honaah chuan theih ang tâwka lo tang ve a, thawhlâwm lo pe ve mi an ni tûr a ni. “Mi zawng zawng chungah thil tha an ti tûr a ni a, rinna chhûngte zînga mi chungah an ti deuh ber tûr a ni” (Gal 6:10; Eph 2:10).
(3) Rorêlna te, tehna te, bûkna te dik taka tih vek tûr a ni (Lev 19:35; Thuf 20:10).
(4) Thil rûk te, hlêp rûk te, duhâm taka mi nêk retheih te, sum lama thum vâwr leh pawisa khelhte tih loh tûr a ni (Eph 4:28; 5:5).
(5) Bat leh rulh thuah an rinawm tur a ni; a hun tak leh dik taka rulh tum loh chuan eng mah pûk tur a ni lo, inbumna a ni (Sam 37:21).
(6) Ringtu chu sum deh ralah a fîmkhur tûr a ni. Fîmkhur lo taka sum tlak rala mi ta fel lo taka batsak teuh hi thil sual tak a ni (Lk 16:2).
(7) Leibat rûl thei lo nangei chu ngaihdam tûr a ni (Mt 18:23-25).
(8) Thutiam leh thuthlung pawimawh chu an bawhchhe tûr a ni lo va, theih ang tâwka hlen mi an ni tûr a ni. Pathian hminga thutiam lek phei chu Pathianin a hriatpui avângin an bawhchhe tûr a ni lo (Rom 1:31; Sam 15:4; Ex 20:7; Thuh 5:4).
(9) Lei leh zawrhah rinawm tûr a ni; lei tûr sawichhiat lutuk tûr a ni lo va, hralh tûr sawi mawi lutuk tûr a ni hek lo. A hre lote bum mai tûr a ni lo va, a man tak leh bazara hralhna an hriat ang chen chenin a tâwk dil leh pêk tûr a ni. (Lev 25:14-17; Thuf 20:10, 14).
(10) An tawngka chhuak a thianghlim tûr a ni a, dik tâwk leh mawi tâwkin an sawi tûr a ni. Ânchhe lawh te, chhechham te, Pathian hming a narana chhâl te, hrâm tlâkhawlh te, tûl lo taka zahmawh lam thu sawite an chîng tûr a ni lo. Mi sawichhiat leh rêl an chîng tûr a ni hek lo (Eph 5:3-4; Mt 12:37).
(11) Buluk takin an hnialhrât tûr a ni lo va, vân ni chhâl leh chhe inchham hnan ang ziazânga tawng te an chîng tûr a ni lo. Fel tak leh tluangtlam takin an tanna an sawi tûr a ni (1 Tim 6:5).
(12) Mi zawng zawng nên inrema awm an tum tûr a ni. An vêngte leh Lalpaa an unaute haw reng leh ngeih lo renga tihchhiat duh mi chu Pathian ram mi a ni lo (Rom 12:18; 1 Kor 6:9).
7. Kristian Nun - Sawrkâr Lam
(1) Rorêltu leh hotute apâwng ataka sawichhiat tûr a ni lo. Sawrkâr lû ber leh a hnuaia mite thu âwiha zah tûr a ni (2 Pet 2:10; Ex 22:28; Rom 13:1-7; 1 Pet 2:17).
(2) Khua leh tui tha an ni tûr a ni. Inthlannaa vote thlâk te an ngai pawimawh tûr a ni a; lei man te, chhiah te dik takin pêk tûr a ni (Rom 13:7).
(3) Ram dânin lei leh hralh te, neih leh tih te a phal loh chu a rûka tih tûr a ni lo (Rom 13:7).
(4) Unau kâra thubuai chu rorêltu hnênah thlen lovin Kohhranah thlen sela, Kohhran rorêl chu pawm thei sela a tha (Mt 18:15-17).