Mizoram Synod-in Lunglei-a Family Guidance & Counselling Centre thar a din chu January 23, 2018 chawhnu dar 1:00 khan Rev. F. Lalrinnunga, Synod Moderator chuan hawngin Pathian hnenah a hlan a; he hmuna Counsellor awm tur, Rev. Lalrintluanga Ngente a dah nghet nghal bawk. He Centre hi Lunglei Bazar Venga Synod Building (Bazar Veng Pastor Quarters sir) -ah siam a ni.
Lunglei-a Centre hawnna inkhawm hi Synod Moderator chuan kaihruaiin, Centre hawnna a neih zawhah FG&CC Director, Rev. Lalsangbera’n report a pe a. Hemi zawh hian Moderator hian Pathian hnena Centre hlanna leh Counsellor dahnghehna hun a hmang zui nghal a. Centre hawngtu Moderator Rev. F. Lalrinnunga chuan thu sawiin, SEC leh Synod Inkhawmpui thu anga Lunglei-a Counselling Centre hawn a ni ta chu lawmawm a tih thu a sawiin, “He Centre hi kawng tinrenga harsatna tawkte tana ruahman a nih avangin Presbyterian Kohhran tan chauh a ni lova, a mamawhtu apiangte tana siam leh buatsaih a ni,” a ti a. Kohhran dangte pawh inthlahrung hauh lova he Centre pan thin turin a sawm nghal bawk. He hunah hian Synod Secretary Upa Dengzikpuia leh Lunglei West Presbytery Moderator bakah Lunglei Bazar Veng Bial hruaitute, Lunglei Venglai Bial hruaitute leh kohhranho ten an telpui a, Thingpui ruai hlim takin an kilho a ni.
FG&CC Director report-in a tarlan danin, Synod hian hmun ruk (6) - Mission Veng, Bawngkawn, Vaivakawn, Champhai, Serchhip, Kolasib leh Lungleiah Counselling Centre a nei ta a. Heng hmun hrang hranga pantu (client) an neih tawh zat chu kumin 2018 bikah 114 niin, a pumpuia pantu an neih tawh zat chu mi 20,422 a ni.