Nimin (February 4, 2018) Pathianni chawhnu dar 1:30 khan Chawnpui Presbyterian Kohhran Biak In-ah Synod Mission Board hnuaia thawk tur Missionary tirhchhuah inkhawm neih a ni.
Missionary tirhchhuah te hi Field Secretary tur Pastor 3, Mission Field Bial vawng tur Pastor 13, Evengelist Teacher hna thawk tur 26, Evangelist tur 35, Medical lama thawk tur 3 leh craft teacher tur 5, an vain 85 an ni a. Field Secretary tur leh Pastor bial vawng tur te chu an thawhna hmun an pan tawh avangin vawiin-a tirhchhuah tak chu mi 70 an ni ta a ni.
He hun hi Rev K Lalrinmawia, Secretary, Synod Mission Board in a kaihruai a, Dr. Robert Halliday, Co-Ordinator, Synod Mission Board in Missionary tirhchhuah tur te inhmelhriattirna a nei a, Rev F Lalrinnunga, Synod Moderator in tirhchhuahna hun hmangin thuchah a sawi nghal a. Synod Moderator chuan he rawngbawlna hna thawk tur hian mi tam tak an in pe a, chung zinga Pathianin kohhranho hmanga a thlanchhuah te in ni a, in vannei em em a ni, a ti a. Kan Lalpa, a hnung kan zui a hi he khawvela rawngbawla a rawn kal khan nuamsa turin a lo kal lova, rawngbawl tura a koh reng reng kha lo kal ula, nuamsa takin ka siam ang che u ang a, mal ka sawm ang che u ang a, hlim takin in awm ang a, in vannei em em ang, tiin tumah a koh ka hmu ve lova, tupawhin mi zui a duh chuan a kraws puin hreawm pawisa lovin mi zui rawh se, a ti a. Vawiina kohhranhoten kan missionary te kan chah duh chu kraws pua a hnung zui turin Mizoram Synod leh Pathianin kan chah che u a ni, tiin fuihna thu a sawi a ni.
Tirhchhuahte aiawhin Lalduhawma Hlondo chuan thutawi a sawi a. Rev B Sangthanga, Executive Secretary, i/c Missions, etc. chuan Missionary tirhchhuahte tawngtai sakna hun a hmang a, Rev R Lalnuntluanga, Synod Statistician in Inkhawm hi Malsawmna-in a tin ani.
He Missionary tirhchhuah Inkhawm hi Synod Puipa te, Synod Mission Board hotute, Missionary chhungte leh Kohhran ho mi 2500 chuang an inkhawm a ni. He hun-ah hian Mizoram Synod Choir leh Synod Mission Choir te’n Zaipawl rawngbawlna hlu tak an nei bawk. Tin, he inkhawm ah hian kum 2018-a Missionary pension a chhuah mi 6- te hnenah Citation hlan a ni bawk.