Vawiin (Feb. 14, 2018) chawhnu dar 2:00 khan Synod Hospital Chapel, Durtlang chu Synod Moderator Rev. F. Lalrinnungan a hawng.
Dr. L.H. Thanga Singson, Synod Hospital Director in Technical Report a pe a, Pu Bualhranga, Dawrpui Veng, Aizawlin thusawina hun a hmang. Hospital Zaipawl an zai a, Synod Moderator Rev. F. Lalrinnungan Thuchah a sawi. Rev. P.C. Pachhunga, Executive Secretary in Chapel hlan tawngtaina hun a hmang a, Upa F. Lalsangliana, Coordinator in lawmthu sawina hun hmangin Rev. H. Remthanga, Synod Finance Officer in malsawmnain programme a khar a ni.
Synod Hospital Chapel thar sak nan hian Pu Bualhranga leh Pi Thanmawii te nupa Dawrpui, Aizawl ten an inneih Golden Jubilee hruai thlengtu leh malsawmna petu Pathian hnena lawmthu sawi nan Rs. 57,74,000/- (Cheng nuai sawmnga pasarih singsarih leh sangli) an pe a, chapel tha tak sak a lo ni ta a ni.
Chapel hi a dung feet 86 leh a vang feet 29 a ni a, stage zau zawng hi feet 14x29 a ni. Kawngkhar 5 leh tukverh leh ventilation 26 a awm a, mi 340 vel leng a ni. Varandah thlang lam leh kawmcharah feet 6 in a hual a, tualzawl zau zawng hi feet 70x24 a ni. Hmeichhe inthiarna toilet 3 leh mipa zunin 4 leh toilet 1 a awm a, ramp (wheel chair kalkawng) feet 40 a sei, feet 6 a zau a awm bawk. Chapel hnungah hian Chaplain Office cum Vestry feet 17x19 a zau dah a ni bawk.
Chapel hi damlo leh an chhungte tawngtai duh tan eng hun pawha hman theih turin talaa kalh lova dah tum a ni a, Chaplain Office hi a mamawh apiang ten Chaplain-te an rawn theihna turin Counselling Room atan ruahman a ni bawk. Tuna chapel thar hnuai chiah hi tun hma lama chapel atana hman thin a ni a, Auditorium atan hman zui a ni ang a, Auditorium hnuaiah hian Doctor Quarters pahnih leh Chaplain Quarters pakhat a awm a, Ground floor-ah Bachelor Quarters pasarih leh an choka a awm.
Chapel chhunga bungrua te hi mi inphalte rawn thawhkhawm a ni tlangpui a, thuthleng hi Kohhran leh pawlhoin an thawhkhawm atanga siam a ni a. Thuthleng hi la dah belh theih a ni a, a thei leh remchang chuan thawh/siam belh theih reng a ni. Chhuat rawng (Terracotta paint) hi Dr. John Malsawma te chhungin an thawh a ni a, Pulpit, Sacrament dawhkan leh Lecturn hi Upa F. Lalsangliana te chhungin an thawh a ni.