February 13, 2018 khan Health Minister Pu Lal Thanzara hovin Synod Office-ah Mizoram Synod hruaitute leh Mizoram State Aids Control Society (MSACS) hotute thukhawmin Mizorama HIV/AIDS darh zel tur venna kawnga hmalak dan tur an sawiho a. Hemi hunah hian Synod OM member mi 8, Synod Social Front Executive Committee member atangin mi 5 leh MSACS lam atangin mi 6 te a tel a ni. Inkawmhona hun hi Synod Moderator Rev. F. Lalrinnunga’n kaihruaiin kum 2017 Synod Inkhawmpui General IV:3-in HIV AIDS dona kawnga chak zawka hmalak a lo rel tawh thu te a sawi a. Health Minister Pu Lal Thanzara chuan Kohhran hruaituten tha taka an lo dawngsawng thin chu lawmawm a tiin HIV/AIDS beihna kawngah Synod hma lak tawhnaah te lawmthu a sawi bawk. Synod Social Front aiawhin Rev. B. Sangthanga'n HIV/AIDS dona kawnga Synod hmalak tawhna te a tarlang a. Training Module, mipat hmeichhiatna kawnga fihlim tur leh kawppui nei tawhte tana rinawm tura intiamna "pledge card" te buatsaihin AIDS awareness drama, cartoon comic, seminar, awareness campaign-te leh AIDS chungchanga kaihhruaina bu-te anlo buatsaih tawh thu a sawi. MSACS Project Director Dr. Lalmalsawmi Sailo chuan HIV/AIDS chungchanga Mizoram dinhmun te sawifiahin presentation a pe a. Tun dimhmunah Mizoramah HIV+ zingah kum 25-34 inkar an tam ber a ti a, amaherawhchu tunlaiin drugs a hluar em avangin kum 15-24 inkarah AIDS vei an tam chak hle, a ti. MSACS Project Director chuan tun dinhmuna ART (Antiretroviral Therapy) la mek zinga 48 % chu kawppui (nupui/pasal) nei lai an nih thu a sawi a. Financial year kal mek 2017-18 ah hian HIV/AIDS vei mi 1505 hmuhchhuah thar a nih thu sawiin nitin mi 5 aia tamin an kai thar ang vel a ni, a ti bawk. Inkawmhona hunah hian HIV AIDS dona kawngah engtin nge Sawrkar leh Synod hian hma a lak dun theih ang tih te, Kohhran hi a dona kawnga mipui hrilhna hmun (platform) nei tha ber a nih thu te, HIV AIDS hi Group-age engah pawh a hluar nasa vek tawh a, mi zawng zawng tan do a tul thu hi hriattir an mamawh hle thu te, HIV AIDS hi kum khat do a reh mai chi a nih loh avangin kum tam tak, inthlahdah miah lova do a ngaih thu te, Kawng hrang hranga Data an lakkhawm atangin HIV AIDS Positive rate hi Mizoramah a sang zel a, hei vang hian Kohhran leh Sawrkar hi tanrual sauh sauh a ngaih thu te, tuna MSACS-in HIV AIDS chungchanga Data an neih hi a rem chuan thusawina kawnga tanpuitu atan Pastor leh Synod hnuaia rawngbawltute hnenah a copy pek ve ni se, tih te an sawiho a ni.