Nimin (February 14,2018) tlai dar 3:00 khan Central KTP Committee chu Synod Committee Room No. 1-ah an thukhawm a, KTP General Conference (March 1-4, 2018), West Phaileng-a nghah tur programme te thlir nawnin Agenda lutte an thliar fel a, Bial budget 2018 -2019 ruahmanna te an thlir nawn leh bawk. Bial 69 atangin agenda 110 a lut a, heng zingah hian – #YRC budget chungchanga rawtna 11 #YRC thawhlawm chungchanga rawtna 8 #Hospital charity fund chungchang: 5 #Chhawmdawlna chungchang: 6 #Ruihhlo leh a kaihhnawih chungchang: 4 #Kum puan rawtna: 19 #Thupui zir tur rawtna: 11 #Bible chhiar & Tawngtai chungchang: 13 #Thil dang : eng emaw zat a awm. Central KTP Committee meeting chuan heng agenda te hi thliar felin rorelna floor-a chhawpchhuah tur te, agenda inang kaihkawp chi te, chhawpchhuah kher lohva bawhzui mai theih thil te, Inhruaina dan khawih thil te leh bawhzui remchang rih lote a thliar fel a, kum 2018 -2020 CKTP Hruaitu tur Nomination, khawpui Bial 46 atanga rawtnate a thliar fel bawk. Kum 2018 KTP General Conference vawi 57-na hi West Phaileng-ah nghah a ni a, Thupui atan “ Krista chhinchhiahna put” (Gal. 6:17) hman a ni ang a, Speaker tur chu Rev. Vanlalzuata a ni ang. Feb. 19 Thawhtanni zan hian KTP General Conference 2018 a zai hruaitu tur ten Ramhlun North Kohrhan Biak tualah Final Rehearsal an nei dawn a, Ramhlun North Branch KTP ten an lo thleng ang. Hemi hunah hian General Secretary Upa Zonunmawia hnen atangin thuchah tawi ngaihthlak a ni ang. KTP General Conference-a zaihruaitu tur te hian Feb. 20 ah Aizawl Kohhranah retreat an nei anga, resourse person atan Upa C. Ngurthantluanga (Khatla) leh Upa Vanlalhruaia (Mission Vengthlang) te an ni ang.