February ni 19 (Tawhtan) zan khan Presbyterian Choir Lunglei, Music Video Album hmasa ber tur Hla 10 awmna “Lalpa ta” tih chu Rev. RC Lalnghakliana, Administrative Secretary, Chhim Bial chuan a tlangzarh.
He music video album tlangzarh inkhawm hi Synod Conference Hall, Synod House, Lunglei- ah neih niin Pastor C Lalduhawma, Lunglei Chanmari bialtu-in a kaihruai a. Pu Calvin Lalchawimawia, Conductor chuan Report tawi a pe a. Pu S Lalnunmawia, Lunglei Ramthar chuan music video Album preview-na hun a hmang ani. Presbyterian Choir Lunglei Music Video Album “Lalpa ta” tih chu Rev RC Lalnghakliana, Administrative Secretary,Chhim Bial chuan a tlangzarh a, Pastor Laltharzuala, Lunglei Bazar veng bialtu chuan Pathin hnena hlanna a nei bawk. He hunah hian Presbyterian Choir te hian Pathian faka zaia rawngbawlna an nei a, Dr Ramdinthara Sailo, Choir Director chuan lawmthu sawina a nei a, Pastor K Zonunsanga, Lunglei Venglai bialtu-in malsawmna in kal khawm te a tin a ni.
He Album ah hian Dr Ramdinthara Sailo hla paruk a awm a, hla thar dang pali a awm bawk. Album-a hla pahnih chu KTP General Conference Hla Bu-ah telh a ni. He Album hi Rs. 150/- man niin Aizawl KTP branch hrang hrang ten an zuar dawn a, Pro Sound, Millenium Centre Ground Floor ah te lei theih a ni bawk ang a, Lunglei lam KTP branch hrang hrang ah leh Zomawi Bakery Lunglei Chanmari ah te a lei theih bakah KTP General Conference West Phaileng ah te a leh thei bawk ang.