Vawiin (Feb. 21, 2018) chawhma dar 10 atang khan Mizoram Presbyterian Kohhran hnuaia Committee sang ber, Synod Executive Committee vawi 272-na chu Synod Office-a JM Lloyd Hall-ah a thu a, meeting hian February 23, 2018 thleng a awh ang. Meeting-ah hian member 133 an kal a ni. Hun hmasaah member term hmang zo leh lut thar tur inthlakna tihfel hmasak a ni a, Inneihtir theihna kawltu, Board leh Committee danga inthlak ngaite pawh tihfel zui a ni bawk. Committee hi Rev F. Lalrinnunga, Synod Moderator-in a kaihruai a, Synod Secretary-in reports a pe a, Finance Reports ngaihthlak a ni bawk. Synod Secretary Upa R. Dengzikpuia chuan Synod Executive Committee hmasa leh tun inkar-a thil thleng larsar zual report a pe a, Synod Bookroom Headquarters, Mission Veng-a mi chu kum thum chhunga sak that tura hmalak mek a nih dan te, Synod Moderator Rev. F. Lalrinnunga’n January 10, 2018 (Nilaini) zinga Nursing College lungphum a phum thu te, January 23, 2018 khan Lungleiah Counselling Centre thar a hawn thu te, February 14, 2018 a Hospital Chapel thar a hawn thu te a tarlang a, February 4, 2018 (Pathianni) chawhnuah Contract Missionary 69 lak tharte tirhchhuahna Chawnpui Kohhran Biak In a neih a nih thu te, PCI General Assembly-a Administrative Secretyary atan Rev. Dr. K.Lalrinkima chu ruat a nih thu leh Rev. P.C. Pachhunga, Executive Secretary chu NEICC Executive Committee Member atan ruat a nih thu te, February 13, 2018 chawhnu khan Synod Committee Room-ah Health Minister Pu Lal Thanzara leh Synod Puipate, Synod Social Front BEC Member leh MSACS hotuten HIV/AIDS chungchanga hmalak ho dan tur sawi ho anih thu te, Synod Inkhawmpui thurel bawhzuiin ‘Kohhran pawimawhna inzirtir uar ni se’ tia a rel tawh chu a bu-a siamin Kohhran In tina sem turin a buatsaih a nih thu te, ‘Kohhran inpumkhatna leh thawhhona chungchangah hma lak ni se’ tia a rel chu seminar paper tur buatsaih mek a nih thu leh ‘Mizoram Presbyterian Kohhran Synod Inrelbawl Dan’ a bu-a siam a nih thu leh sem chhuah mek a nih thu a report bawk. Report-a alan danin SEC-a Report hnuhnûng ber leh SEC 272-na thut inkârah Synod Relief Fund atangin Rs. 6,24,000/- sem a nih thu tarlan a ni bawk. Tun tumah hian thu ngaihtuah tur pawimawh 37 zet a awm a, chung zingah chuan PRESCOM General Manager thlanna te, Central KTP Leader leh General Secretary ruat chungchang te, India rama Kristiante tihduhdahna hluar zel chungchanga Awareness neih chungchang te, HIV/AIDS dona kawnga hma lak chungchang te, Synod hnuaia hun puma thawkte zuk leh hmuama inthiar fihlim tura rawtna te, Secular College din rawtna te, Pay Commission din chungchang te, Chhim Bial enkawl dan enthat chungchang te, Synod Mission Board Service Manual 2016 enthat chungchang te, PCI Dânpui enthatna atana rawtna te, Synod Service Rules 2018 enthatna te, MR Bill dan kalhmang enthat chungchang te, Synfo Inkaihhruaina enthat te, Synod Archives hman dan enthatna te, Synod Hospital Manual enthat rawtna te, Kohhran Pavalai Pawl Inhruaina Dân te chu a langsar zual an ni.