March 9 – 11, 2018 chhung khan Tuikual Kohhran Biak Inah Mizoram Presbyterian Kohhran Hmeichhe Rorel Inkhawm vawi 9-na tluang taka neih a ni. a, thupui atan ‘Ram chu Lalpa ta a ni’ (Sam 22:28) tih hman a ni a, Rev. Dr. K. Lallawmzuala, ATC chu Speaker a ni.
March 9, 2018 (Zirtawpni) kha Palai thlen kim ni a ni a, zanah Inlawmna leh Report Inkhawm neih a ni. Inkhawm hi Pi K. Lalliantluangi, Central Kohhran Hmeichhe Chairman in a kaihruai a, General Secretary Report leh Bial Report khaikhawm ngaihthlak a ni a, Synod Moderator Rev. F. Lalrinnunga’n Pathian thuchah a sawi a, Sihphir Vengthar Bial Zaipawl an zai bawk.
March 10, 2018 (Inrinni) khan nilengin Rorel a ni a. Tun tumah hian General Agenda 17 an nei a, Bial atanga thu lut, floor-a kal zel lo tura Central Committee-in a hrilhfiah engemaw zat a awm bawk. Zan inkhawmah Rev. P.C. Pachhunga, Executive Secretary i/c Kohhran Hmeichhia in thuchah a sawi a, Aibawk Bial Kohhran Hmeichhe Zaipawl te an zai.
March 11, 2018 (Pathianni) chawhma inkhawmah Speaker Rev. Dr. K. lallawmzualan ‘Ram chu Lalpa ta a ni’ tih thupui hmangin thuchah a sawi a, Kristian Chhungkaw Dinhmun Tehna Trophy leh certificate hlanna hun hman a ni a, Synod Moderator Rev. F. Lalrinnungan Phainuam Bial hnenah lawmman hi a hlan a ni. Luangmual Bial Kohhran Hmeichhe Zaipawl an zai bawk. Chawhnu inkhawmah Speaker hnen atangin thuchah ngaihthlak leh a ni a, Bethlehem Venglai Bial Kohhran Hmeichhe Zaipawl an zai. Inkhawm banah hian Zaikhawm neih leh a ni. Zan inkhawmah Speaker hnen atangin Pathian thuchah ngaihthlak leh a ni a, Tuikual Kohhran Hmeichhia leh Tuikual Pastor Bial Zaipawlte an zai bawk.
January – December 2017 Bial Chanchin Report Khaikhawmna :- Kum 2017-ah Mizoram chhung leh pawn a mi, Mizoram Synod hnuaia awm Kristian Chhungkaw dinhmun tehnaa tel Bial 199 an awm a, report a lut kim vek thei a ni. Report khaikhawmna hetiang a ni.
1. Report lut zat : 199
2. Kohhran zat : 845
3. Branch Church zat : 95
Total : 940
4. Presbyterian hlang chhungkaw zat : 1,05,168
5. Inawm pawlh chhungkaw zat : 4,626
6. Chhungkua zawng zawng zat : 1,09,794
7. Nitin chhung inkhawm nei zat : 72,183 = 65.74%
8. Buhfaitham tham ziah zat : 1,07,761 = 98.15%
9. Hmeichhe member zat : 1,76,449
10. Member tam berna Bial : Ramhlun North Bial
11. Member zat : 2,901
12. Member tlem berna Bial : PCI Kolkata
13. Member zat : 31
14. Hmeichhe inkhawm nei thei vek Bial 178 an awm a, Bial 21 atangin inkhawm thei lo Kohhran/Branch Church 48 an awm.
15. Kum 2017 chhunga buhfaitham hmuh zat belh khawm chu Kg. 1,10,64,515.34grams a ni.
Ni tin chhung inkhawmah nikum khan 1.02% in kum hmasa an khum a, kuminah chuan 1.58% in nikum an khum thung a. Buhfaithamah nikum khan 0.51% in kum hmasa an khum a. Kuminah erawh chuan 0.26% in nikum an pha lo thung. Hei hi a chhan chu report hi a luh kim loh chang a awm thin vang a ni.
Kristian Chhungkaw dinhmun tehnaah Phainuam Bial an sang ber a, tun tumah hian kum 14 zet a zawna a sang ber nihna hauh thei N.E. Khawdungsei Bial an khum ta a ni. Kristian Chhungkaw dinhmun tehna hi kum 1970 atang khan neih tan a ni a, a sang ber hnenah Certificate leh Trophy hlan thin an ni. Kum 1970 hma lak kha chuan Buhfaithamah chauh intehna an siam thin a, a sang ber hnenah chawimawi nan Shield an pe thin a ni.
Thurel tlangpuite :
Rorel Inkhawmah hian palai 458 (Bial Palai = 393, Central Commt. Member = 41, Synod Puipate = 2, Central KTP Palai = 2, ATTWI = 7, Pastor = 1, Women Centre Superintendent =1, Hmangaihna In Superintendent = 1 & Chhimtu = 10) an kal a ni. 1) Kum 2019 Kohhran Hmeichhe Inkhawmpui Lian chu March 8 – 10, 2019 chhungin Kolasib Kohhranah nghah a ni ang a, Kolasib Diakkawn, Kolasib Venglai, Kolasib Hmar Veng leh Kolasib Vengthar Bial ten an thlen tawm ang. Kum 2020 Mizoram Presbyterian Kohhran Hmeichhe Rorel Inkhawm chu March 6 – 8, 2020 chhungin Ramhlun North Kohhran Biak Inah nghah a ni ang a, Ramhlun North Pastor Bialin an thleng ang.
2) Kum 2018-19 Inkhawmpui Lian Budget atan hetiang hian pawm a ni Central Budget : Rs. 14,00,000.00 Women Centre : Rs. 25,00,000.00 Total : Rs. 39,00,000.00
3) Central Committee atanga thu lut, thla thar tawngtai rual thupui hman mek chu tlem siam danglam a ni.
4) Kristian Chhungkaw tehna a lawmman pakhatna hi a dawngtu ten an kawl hlen tawh avangin avangin ‘No mawi’ thu ziak awm hi pek thin ni se, Citation erawh chu tel tawh lo se tih Central Committee atanga lut chu pawm a ni a, hei hi kum 2019 Kristian Chhungkaw tehna ah hman nghal ni se an ti.
5) Health Care Awareness chungchang Campaign ram pum huapin neih tha tih a ni a, Central Committee lo bawhzui tura dah a ni.
6) Ram pum huapin awmni khama sual thupha chawi twangtai, Kum 2018 MLA General Election lo awm tur atan ram pum huapin tawngtai rualna leh Kohhran min nuaitu zirtirna dik lo, insawithaihna a lo reh theih nan tawngtai rualna ram pum nuapin neih ni rawh se, tih chu la khawmin neih tha tih a ni a, Central Committee ten ruahmanna an siam turin dah a ni.
7) Synod Hospital Charity Fund atana ram pum huap thawhlehni zan inkhawm tum khat thawhlawm pek tha tih a ni a, a lak khawm hun tur Central Committee an siam tura dah a ni.
8) John Williams Hospital, Lunglei tan ram pum huap thawhlehni zan inkhawm vawi khat thawhlawm pek ni se tih a ni a, Central Committee in ruahmanna an siam tura dah a ni.
9) Kum 2018 ah ram pum huapa ruihhlo ngaite enkawl dan inzirtirna neih tha tih a ni a, Central Committee in hla lo la se an ti.
10) Zirtirna dik lo laka inven nan Apostol te thurin (Apostle’s Creed) Kristian Hlabu No. 551-na hi ram pum huapin uar zawka hman ni se tih a ni a, Central Committee kutah dah a ni.
11) Ram pum huapin fa neih tam inzirtirna neih leh ni rawh se tih chu tha tih a ni a, Central Committee ten a tul angin hma lo la rawh se an ti.
12) Thusawm pek khai khawmna Kristian Hlabu Hlui No. 420-na a mi kha ram pum huapin inzirtir thar leh ni rawh se tih chu Bial leh Kohhranah thahnem ngai taka zir ni se tih a ni.
13) Ram pum huap tawngtai tlaivar programme kan neih thin hi a hming thlakin ‘Ram pum huap tawngtai zan’ ti a thlak a ni.
14) Kohhran Dan Thianghlima inneite mo incheina kawrfual hak thin chu puan bih tura zirtir ni rawh se, tih chu tha tih a ni a, Central Committee kutah dah a ni.
15) Zoram chhungah zu zawrh tih tawp a nih theih nan Central Kohhran Hmeichhiain sawrkarah zu zawrh kan duh loh zia lehkhaa thlen ni se tih a ni a. Mahni Kohhran leh Bialah pawh theihtawpa tan lak thar zel ni se tih a ni a, Awmni kham tawngtai thupuiah pawh telh tura rel a ni.