Synod Multipurpose Training Centre (SMTC) buatsaih Lay Leaders Training vawi 201-na chu SMTC Lecture Hall-ah nizan (March 19, 2018) khan Pathian hnena hlanin hawnna hun hman a ni. Training hian March 23, 2018 (Zirtawpni) thleng a awh ang. Tun tum training-ah hian Presbytery pariat - Aizawl Hmarchhak, Aizawl West II, Hmarthlang, Teirei, Tuichangral South, Tuivawl, Tuivawlral leh Tawi atangin Kohhran Upa 35 koh an ni. Training hawnna inkhawm hi Rev. Vansawma, Proramme Director, SMTC in a kaihruai a, inlawmna thu sawiin report a pe nghal a, Pi Lalruotmawi in Pathian fakna hla a sa a, chairman hian training hawnna neiin thuchah a sawi nghal a, Rev. Ralthansanga Ralte, Resource person in malsawmnain inkhawm a tin a ni. Hetiang hunah hian Kohhran Upate tan Kohhran enkawl dan leh inrelbawlna lam atana pawimawh chi hrang hrangte zirna hun tha tak buatsaih a ni thin a, Kohhran thlarau lam nun enkawl dan tha te zir ho thin a ni bawk. SMTC hi kum 1993 Synod-in din tura a rel angin January 12, 1996 khan din a ni a, a tira a hming chu Christian Multipurpose Training Centre tih niin kum 2001 Synod khan a hming hi Synod Multipurpose Training Centre tiin a thlak leh a ni. Kohhran Upate tana Lay Leadership Training hi kum 1996 atang khan neih tan niin vawi 200 lai neih a ni tawh a, Kohhran Upa 6448 zetin training hi an nei tawh a ni.