March 30, 2018 (Zirtawpni) hi Good Friday a ni a, April 1, 2018 hi Easter Sunday a ni bawk a. March 29, 2018 (Maundy Thursday) atangin Good Friday Programme hi hman tan a ni. Maundy Thursday hian Kohhran hrang hrangah Lalpa Zanriah Sakramen kilho a ni ang.
Presbyterian Kohhran chuan Good Friday leh Easter Sunday thupui in ang tlang an zirho dawn a, Easter Sunday chawhma, chawhnu leh zanah hetiang hian thupui an zir ang.
April 1, 2018 : Chawhma Inkhawm
Thupui : Hetah a awm tawh lo – a thawh leh tawh kha
Chhiar tur : Mat. 28 ; 1 - 7
Chawhnu Inkhawm
Thupui : Hmu lova ringtute an nihlawh
Chhiar tur : Johana 20 : 26 - 29
Zan Inkhawm
Thupui : Taksa thawhlehna ka ring
Chhiar tur : Johana 20 : 3 – 9, Philippi 3 : 21
Good Friday leh Easter Sunday hi Krismas te anga a Ni ngai hman a ni lo va, a chhan chu Lal Isua thih hun lai hi Judate Kalhlen Kut hman lai vel Nisan ni 14 vel a ni a, chu chu March thla chawhnu lam, March 20 hnu, April ni 25 hma lam si, thla fang bial lai a ni a. Chuvangin tun thleng hian Good Friday hun hi March ni 20 leh April ni 25 inkara thla fang bial lai, Zirtawpni hi a ni ta zel a. Good Friday hma Pathianni hi Tumkau ni -ah hman a ni a, Good Friday zawh Pathianni hmasa ber chu Isua Thawhlehni, Easter Sunday a ni ta zel a, Easter Sunday atanga chhuta ni 50-na chu Pentikos ni a lo ni ve leh bawk a ni. Thla fang bial lai chhuta a hun leh ni ruat thin a nih avangin heng ni pawimawh te hi a hun leh ni a danglam deuh hret hret thin a ni.