Central KTP hruaitu tharte chuan an leader thar Rev. Dr. K. Lallawmzuala hovin April 11, 2018 (Nilaini) chawhnu dar 3 khan Falkland Veng, Aizawla Youth Recreation Centre-a hnathawh mek dan chu thlirin, hmalak zel dan tur an ngaihtuah.
YRC hmun tlawha kalte hi Rev. Dr. K. Lallawmzuala bakah, Upa Rosangliana, Asst. Leader, Pu Rochungnunga, General Secretary, T. Upa Ricky Lalrammawia Ralte, Asst. Secretary leh Dr. Lalrotluanga, Treasurer te an ni. Youth Recreation Centre sakna tur atana lei laih a nih tawh chinte enin, lei laih la hmabak te an thlirho a. Hmalak zelna atana thil pawimawh turte ngaihtuahin, chak zawka hmalak a nih theih dan turte ngaihtuahin an sawiho nghal a ni.
Youth Recreation Centre hi rampum huapa KTP member-te hmalakna lian tak a ni a. KTP General Conference vawi 57-na rorel inkhawmah pawh khan YRC kaihhnawih agenda chhawpchhuah hi 25 lai a awm. 57th General Conference hian YRC pual hian member tinten pawisa thawh nise tiin a rel a; Aizawl khawpui chhungah member pakhatah Rs. 50 zel, District Capital-ah member pakhatah Rs. 30 zel leh a bak zawngah member pakhatah Rs. 20 zel khawn tura rel a ni. Hei bakah hian KTP inkhawm zan khat thawhlawm chu YRC puala lakkhawm nise tiin a rel a, YRC hmalak mekna hi zângkhai leh chhawr hma a nih theih nan ruahmanna siam turin a rêl bawk. Tuna YRC awmna tur hmun, Falkland Veng, Aizawlah hian kum 2014 atang khan kut thlak tan a ni a. Aizawl khawpui chhunga Bial KTP ten a inchhawkin hnatlangin a hmun hi an sâm a. Kum 2015 October ni 13 khan khatihlaia Synod Moderator, Rev. H. Lalrinmawia chuan a lungphum a phum a ni.