Presbyterian Bible School chuan vawiin (April 25, 2018) chawhnu dar 1:00 khan 42th Batch Farewell and Dedication Programme Pi Zaii Hall, Synod Conference Centre-ah an hmang.
Programme hi Rev. Lalramliana Pachuau, Senior Executive Secretary in a kaihruai a, Bible chhiar leh tawngtaina te a hman zawhin Rev. H. Lalrinmawia, Zirtirtu-in inlawmna leh inhmelhriattirna hun a hmang a. PBS Principal Rev. Lalneihvura’n reports a pe. Synod Secretary Upa Dengzikpuia’n zirchhuakte hnenah certificate a hlan a, Nl. R. Lalrinmawii, Leitan hnen atangin Pathian fakna hla ngaihthlak a ni bawk. Rev. Lalramliana Pachuau-in zirlaite hlanna neiin thuchah a sawi a, zirlai titha te leh Class kal kimte hnenah Rev. Vanlalrawna, PBS Committee Member-in lawmman a hlan a, Pu C. Awithanga Award pawh Pu C. Awithanga chhungten hlanna an nei bawk. Upa C. Lalzawnga, PBS Committee Member-in zirlaite tana tawngtaisakna a nei a. Zirlai aiawhin H. Lalhminglianan thu a sawi a, Rev. K. Lalhmuchhuaka, Zirtirtuin lawmthu sawina hun a hmang a, Rev. Vanlalrova Khiangte, Missionary Training College Principal-in malsawmnain programme a khar a ni.
PBS-ah hian a din tirh atangin tun thleng hian zirlai 2044 an awm tawh a, chung zinga 1723 ten tha takin an passed a ni. Tuna batch 42-naah hian zirlai 38 an awm a, 31 passed-in fail an awm lova, exam lo 7 an awm. Exam-a titha zual pathumna thlengin lawmman Rs.1000/-, Rs.700/-, Rs.500/- hlan an ni a, chungte chu:-
First - Vanlalmuanpuia s/o H. Laldawngliana, Khawhai South Kohhran
Second - Hruaitluangpuii d/o C. Lalramhluna, Chhipphir Kohhran
Third - H. Lalfakzuala s/o H. Chhanliana, Church of God (Seventh Day)
Batch 42-na zirlai zingah hian class kal kim mi 10 lai an awm a, an hnenah lawmman Rs.500/- theuh hlan a ni. Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni.
Tun tumah hian Vanlalmuanpuia s/o H. Laldawngliana, Khawhai South Kohhran chuan Christian Theology-ah 85% leh Church Administration & PCI Constitution-ah 95% hmuin titha ber nihna a hauh ve ve a ni.
Presbyterian Bible School atanga zir chhuak tam berte hi rawngbawlna tangkai takah an in hmang zui thin a. Sunday School zirtirtu, Missionary, Social Worker hna thawkte an awm nual a. B.D. leh B.Miss. zawm pawh engemaw zat an awm tawh a ni. Synod Revival Speaker leh Team member tam zawkte hi Bible School atanga zir chhuak an ni bawk. Zir tluan chhuak thei lo te erawh hi chu Aizawla awmna tur mumal nei lo te, sawrkar hna an hmuh vangte leh hrisellohna avanga zir tluan thei ta lo te an ni.