Presbyterian Church of India Biennial General Assembly vawi 43-na, May 2-6, 2018 chhunga Fiangpui Presbyterian Church, Halflong (Biateram Synod)-a neih mekah Mizoram Synod atanga palai tura ruatte chuan nizan (Nilai zan) khan Fiangpui panin Aizawl an chhuahsan.
Mizoram Synod atanga palai turte hi Ministers/Pastors - 309, Pro. Pastors - 47, Kohhran Upa/Kohhran Hmeichhia & KTP aiawhte - 221 te bakah Mizoram Synod Choir - 26 te an ni a, an vaiin mi 603 vel kal tura ngaih an ni a, Mizoram Synod enkawl Barak Area leh Manipur Administrative Area atangin eng emaw zat an kal bawk ang. A kalna tur hian bus 20 hire a ni a, motor te 17 vel tirh a ni. PCI General Assembly hi kum khat dana neih a ni thin a. Kumina an thupui tur chu "Nunna Eng" (Light of Life) tih a ni. Rev. Lalramliana Pachuau (Mizoram Synod) chu Moderator Elect a ni a, Moderator tanglai mek Rev. Laldawngliana (Manipur Synod) hnen atangin Moderator mawhphurhna a la ang. Mizoram Synod atangin Rev. Dr. C. Lalhlira (ATC Principal) leh Rev. H. Remthanga (Ex Moderator, PCI) te thuchah sawi tura ruat an ni a, Rev. Dr. K. Lallawmzuala (ATC & CKTP Leader) chu Bible Study zirtirtu atan ruat a ni bawk.
Moderator thar Rev. Lalramliana Pachuau hian May 6 (Pathianni) zing dar 7:00 inkhawmah Lalpa Zanriah Sakmen a theh ang. Mizoram Synod Choir te hi Inkhawm tum 4-a zai tura ruat an ni. PCI Biennial General Assembly hi kum 2004-ah Dawrpui Kohhran (Aizawl)-ah leh kum 2012-ah Champhai Vengsang Kohhranah te nghah a lo ni tawh a ni.
Puipate: Moderator : Rev. Lalramliana Pachuau, Mizoram Synod
Secretary (Sr.) : Rev. B.B. Lamin, KJP Synod Mihngi
Secretary (Jr.) : Rev. H.L. Marsing, Ri Bhoi Synod
Treasurer : Rev. H.N. Wallang, KJP Synod Mihngi
Statistician : Rev. Lalsangloma, Biateram Synod
Administrative Secretary te :
1) Rev. V.L. Luaia Hranleh, Mizoram Synod,
2) Rev. G.S. Lyttan, KJP Synod Sepngi,
3) Rev. Rolianthanga Lalsim, Biateram Synod