Nizan (May 10, 2018) atang khan Missionary Retreat for Northeast Region chu Ramthar Veng Kohhran Biak Inah tan a ni ta. Retreat hian May 13, 2018 (Pathianni) zanah a tiak ang.
Retreat-ah hian thupuiah “Hlau suh la, zam hek suh (Josua 1:9)” tlawh chhanin hman a ni. Retreat-ah hian chhun lamah Paper zirho leh rawngbawl zelna tur atana thil pawimawh hrang hrangte zirpui an ni ang a, Paper hi Rev. Dr. Lawmsanga, ATC leh Rev. Dr. L.H Rawsea, ATC te ziah zirho a ni ang. Zan lamah Vantlang Pathian Biak inkhawm neih thin a ni ang a, May 13, 2018 (Pathianni) chawhma hian Synod Mission Board Secretary Rev. K. Lalrinmawia’n Pathian thuchah a sawi ang a, chawhnuah Rev. TC. Laltlanzova, BEC Member-in a sawi ang a, Missionary, Chatuan Ram pan ta te Sunna hun hman a ni bawk ang. Zanah Rev. B. Sangthanga, Executive Secretary-in Pathian thuchah a sawi ang. Inkhawm ban apiangin zaikhawm neih thin a ni bawk ang.
Tun dinhmunah hian Synod Mission Board hnuaiah thawktu nghet mi 634 an awm a, Contract 1202, Field Worker 864, an vaiin thawktu 2700 an awm mek a ni.