India Hmarchhaka Kohhran hrang hrang inzawmkhawmna pawl, North East India Christian Council (NEICC) inkhawmpui vawi 78-na chu May 17-20, 2018 chhung hian New Nongstoin Presbyterian Church-ah KJP Sepngi-in an thleng dawn a. An thupui tur chu I Petera 1:3 tlawhchhanin “Christ – The Living Hope” (Krista – Beiseina Nung) tih a ni. May 17 hi palai thlen kim ni a ni a, a tuk May 18 chawhma lamah Standing Committee leh Executive Committee an thu ang a, chawhnu lamah rorel a ni ang a, tlai lamah Nomination Committee an thu ang a, zanah a hawnna inkhawm neih a ni ang.
May 19 (Inrinni) nilengin rorel chhunzawm a ni ang a, zan atangin Pathian biak inkhawm neih tan a ni ang. Mizoram Synod Moderator Rev. F. Lalrinnunga chu Pathianni zan Pathian biak inkhawm hruai tura ruat a ni. Kohhran pawl hrang hrang zaipawlte zai tura ruat an ni a, Mizoram Synod Choir chu tum 3 zai tura ruat an nih bakah Pathianni zanah KJP Synod Mihngi zaipawl te nen inkawpa zaiho tura ruat an ni bawk. Mizoram atangin BCM Choir, Territorial Staff Songsters leh The Leprosy Mission Choir te zai tura ruat an ni bawk. Mizoram Synod aiawha palai tura ruat mi 22 – Pastor/Minister 14, Kohhran Upa 6, Central Kohhran Hmeichhe Committee aiawh 1 leh Central KTP aiawh 1 te chuan vawiin (May 16) chawhma dar 11:00 khan Aizawl an chhuahsan. NEICC Inkhawmpui hi tun hma lam chuan kum tina neih thin a ni a, kum 2014 atang khan kum khat danah neih a ni ta a. Session vawi 78-na niin Biennial Session vawi 3-na a ni.