Vawiin (May 18, 2018) khan Synod Bookroom chuan kumtina an lo tih thin angin Synod Bookroom Distributors Meet 2018 chu Synod Office Devotion Room-ah an hmang a, Mizoram puma Synod Bookroom Distributor zawng zawng ten he hun hi hlawk takin an hmang.
Distributors Meet hi chawhma dar 10:00-ah Pu Lalhruaitluanga Ralte, General Manager, Prescom chuan hawngin inlawmna thu a sawi a. Inlawmna thu sawi zawhah Pi Rosy Lalhmingmawii, Prescom Department sum enkawltu chuan Bookroom pumpui sum dinhmun report a pe a. Report atanga a lan danin kum kalta khan Synod Bookroom hian nasa takin hma a sawn a. An Budget Rs. 9,49,50,000/- chu tha taka khumin Rs. 14,92,30,477/- zet thawhchhuah a ni a, Synod Bookroom 1911-a din a nih atangin kumkhata a thawhchhuah tam ber tum a la ni. Budget khumna ringawt hi Rs. 5,42,80,477/- zet niin Net Profit Rs. 2,17,74,447/- lai Synod Bookroom hian a nei bawk. Distributor bikah Financial Year kalta (2017-2018) chhunga Synod Bookroom hnuaia Distributors 32 te target belhkhawm hi Rs. 1,10,00,000/- a nih laiin an thawhchhuah zat hi Rs. 2,18,56,104/- a ni a, Distributor bikte’n an target an khumna hi Rs. 1,08,56,104/- lai a tling. Chawhnu lamah Pu Lalniliana, Bookroom Manager-in programme kaihruaiin Synod Bookroom Distributor hrang hrangte atangin report leh rawtna te ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni bawk. Hemi hnu hian kum kaltaa Synod Bookroom Distributor tha thlanna result puan a ni a, Branch titha te hnenah Pu Lalhruaitluanga Ralte, General Manager, Prescom chuan lawmman a sem a ni.
Kum 2017 chhunga Synod Bookroom Distributor Result chu hetiang a ni :
Pakhatna – Synod Bookroom Sihphir Distributor (Certificate + Rs. 1,000/-)
Pahnihna – Synod Bookroom Zemabawk Distributor (Certificate + Rs. 700/-)
Pathumna – Synod Bookroom Ngopa Distributor (Certificate + Rs. 500/-)
Tun dinhmunah Synod Bookroom hian Branch 14 neiin Distributor Centre 38 a nei mek a. Heng zinga 6 – Cherhlun, Zohmun, Sihphir Vengthar, Khawruhlian, Shillong leh Khawlailung te hi Financial Year kalta chhunga hawn thar an ni.