Nimin (May 23, 2018) khan Central KTP hruaitute chuan Youth Recreation Centre, Falkland-a mi chu Architect, Pu Malsawmtluanga hoin an tlawh.
Youth Recreation Centre tlawh hi CKTP leader, Rev. Dr. K. Lallawmzualan a ho a, CKTP hnuaia Youth Recreation Centre Sub Committee hruaitute leh CKTP committee member eng emaw zat an tel.
YRC hmun laih mekah hmabak la awm leh, eng thil nge hmanhmawhthlak tihte thlirin. KTP General Conference vawi 58-na, West Phailenga neih taka thurel, 'YRC Project kalpui mek hi tuna zangkhai leh chhawr hma a nih theih nan tihdanglam ni rawh se' tih bawhzuiin YRC hmun hi Architect-te nena tlawh a ni.
Falkland-a Youth Recreation Centre tur hi kum 2015 atang khan thâ thawh tan a ni a. Tunah hian a hmun laih hna la thawh mek niin, a hmun hi zaa 90 vel lai laih zawh a nih tawh thu architect hian a sawi. Kum thum chhung chauha hmalakna ringawt pawh chak a tih thu sawi bawk. Youth Recreation Centre tur hian tunhma atangin KTP ten sum thawhin hma lo lak tawh thin a ni a. Hlimen hmun atanga Falkland-a insawn a nih hnu hian a thar hlaka hma lak ngai ang a ni a, a hautak hle. Chutihrual chuan CKTP hruaitu kal tawhte leh hruaitu mekte hmalakna beihna azarah kum thum chhunga thâ thawh tawh ringawt pawh hi a tam tham tawh hle.