Mizoram Presbyterian Kohhran hnuaia Committee sang ber, Synod Executive Committee Vawi 273-na, ni thum chhung awh tur chu vawiin (June 5, 2018) chawhma dar 10:00 atang khan J.M. Lloyd Hall, Synod Office-ah an thu tan a, member 159 atangin 132 an kal thei a ni.
Committee Meeting hi Rev. F. Lalrinnunga, Synod Moderator-in a kaihhruai a, Synod Recretary report te, Finance Officer report te leh Audit Report te ngaihthlak a ni a. Annual Statement of Account thlirho a ni bawk. Hemi zawh hian Committee member ruat thar leh inthlakna hun hman a ni. Synod Secretary hnen atangin India ram khawpui hrang hranga Kohhran din chhan kohhran mite hnena chiang zawka hrilhfiahna thawn chhuah thu te, Synod hnuaia hun puma thawkte zuk leh hmuama inthiar fihlim tura ngenna pek an nih thu te, Rev. Lalramliana Pachuau chu kum 2018 - 2022 chhung Serampore Council Member atan ruat a nih thu te, Beihrual kum 100 tlin lawm huna chhiar tur Kohhran tina thawn a nih thu te, kum 2018 MLA Election pual leh kan rama zu leh ruihhlo hluar lutuk a lo reh theih nan ram pum huap tawngtai rualna neih thu te, Synod aiawha Inkhawmpui hrang hranga palai intirh thu te, Synod Service Board in a ngheta thawk tur leh Contract a thawk tur a lak thu te, Rev. C. Sangliana, Thuampui chu April 2018 atang khan Mizoram State Cancer Institute, Zemabawk-a Chaplain hna thawk tura lak thu te, Rev. R.L. Sawta chu 3rd IR Battalion, Mangaldai, Assam-a Chaplain atan rawih chhunzawm a nih thu te, Tripura Synod (Provisional) nena thawhhona thuthlung ziah fel thu te, PCI Assembly vawi 43-na Fiangpui Kohhran, Haflong, Biateram Synod a neih thu te, SEC 272 leh 273 inkarah Synod Relief fund atangin harsatna tuar mi hrang hrangte hnenah tanpuina Rs. 6,74,000/- pek a nih thu te, SEC 272 leh 273 inkarah RC 469 leh RL 404 pek a nih thu te ngaihthlak a ni.
Tuntum SEC a thurel tur chhawpchhuah langsar deuh te chu - Chhiat ni that ni kaihhruaina enthat rawtna te, Mizo Bible chang zawn awlsam zawka chhut chungchang te, Barak Area enkawl dan enthat chungchang te, MIMER (Falkawn) chheh vela ram/in hmun lei rawtna te, KJP Assembly nena thawh hona tihtawp thu leh Jowai Presbyterian Kohhran-in thawh ho an duh chungchang te, M.L.A. General Election thuchah chungchang te, Secular College din dan tur ruahmanna te, HIV/AIDS do kawnga hmalak dan te, Unique ID leh pan card neih dan Trust Deed siam te, Hyderabad-a Guest House sak chungchang te, Synod Mission Board Pastor-te Pay chungchang te, Doctor Specialist post zat chungchang te, Co-ordinator post ruak hnawhkhah chungchang te, Jail-a Sakramen theh chungchang te, Pay Anomaly Committee Report te, Synod Pay Commission Preliminary Report te, India ram Kristiante tihduhdahna hluar zel awareness neih chungchang te, Naupang nun kaihruai thei tur Cartoon siam chungchang te, Synod Social Front Inkaihhruaina enthat dilna te, Presbyterian English School Manual enthat chungchang te, Synod Mission Board Service Manual enthatna te, Synod Service Rules enthat thu te leh thil pawimawh chi hrang hrang te an ni.