Vawiin (June 12, 2018) chhun dar 12:00 khan Synod Moderator Rev. F. Lalrinnunga’n Synod Bookroom Vaivakawn Branch thar a hawng.
Branch thar hawnna inkhawm hi Pu Lalhruaitluanga Ralte, PRESCOM General Manager-in kaihruaiin Pu Lalniliana, Synod Bookroom Manager hnen atangin report tawi ngaihthlak a ni a. Vaivakawn Kohhran aiawh atangin thusawi ngaihthlak a ni a, Vaivakawn Bial Zaipawlin Pathian chawimawina hla an sak hnuah Synod Moderator Rev. F. Lalrinnunga’n mitin dawr theih turin Synod Bookroom Vaivakawn Branch thar a hawng. Branch thar hawn ni bik atan hian Bookroom lehkhabu leh bungruate 10%-50% discount-in phochhuah nghal a ni a, Pu Lalruatkima, Bialtu MLA leh Nl. Zonunsangi, Bialtu AMC te’n lehkhabu lei hmasain a hnuah mipui a duh apiang ten an dawr zui a ni.
Tuna Branch thar hawn hi Aizawl West I Presbytery Inkhawmpui thurel bawhzuia PRESCOM Board-in Aizawl Area huam chhunga Synod Bookroom Branch thar hawn tura a rel a ni a. March thla tawp atang khan buatsaih hna thawh tan a ni a, ngawrh taka thla hnih chhung thawh a nih hnuah hawn theiha peih fel a ni ta a ni.
He Synod Bookroom Vaivakawn Branch thar hi Synod Bookroom Branch 15-na niin Vaivakawn Biak Inhnuai, kawngpui ân-ah hawn a ni a. A dung feet 48 a sei niin a vang lam hi feet 13 a zau a ni. Hei bakah hian stockroom feet 48 a sei feet 3 a zau a nei bawk. Synod Bookroom Vaivakawn Branch thar hawn a nih takah hian Synod Bookroom chuan Branch 15 leh Distributor 37 a nei mek a, Financial Year hnuhnung berah khan Rs. 15,01,80,477/- lai a thawk chhuak a ni.