Vawiin (June 13, 2018) khan Presbyterian Hindi Bible School (PHBS) te chuan an Chapel-ah an zirlai Batch 61-na te Graduation Day an hmang.
Inkhawm hi Rev. Zochhuanmawia, Principal, PHBS in kaihruaiin inlawmna leh inhmelhriattirna a nei nghal a, zirlai zing a mi Ashok Mishra in Bible chhiar leh tawngtaina hun a hmang. PHBS zirtirtu Pi Vanlalruati Sailo chuan result puangin report a pe a, Rev. B. Sangthanga, Executive Secretary in zirchhuak te certificate hlanin fuihna thuchah a sawi. Dawrpui Vengthar West Kohhran Masihi Sangati Zaipawl te, Synod Mission Choir te leh Zirlai te atangin Zaipawl ngaihthlak a ni bawk. Rev. Vanlalbela’n zirlai chhuak te tawngtaisakna hun a hmang a, PHBS zirtirtu Pu K. Vanthuama’n lawmthu sawina hun a hmang a, Rev. K. Lalthangmawia, BEC Member-in malsawmnain inkhawm a tin.
Presbyterian Hindi Bible School, Bawngkawn, Aizawl hi Mizoram Synod Mission Board chhunga hnamdang ringtharte rinna kawnga tihnghehna tura a din a ni a. August 24, 1990 khan hawn a ni a, September 15, 1990-ah zirlai mi 20 nen class tan a ni. Hun lo kal zelah Synod chuan India ram hmun hrang hrangah Mission Field a hawng ta zel a; chuvangin, State hrang hrang leh ram pawn - Nepal leh Bhutan atangte pawhin zirlai an lo kal thin. A din tan kum 1990 atanga thla thum course ni thin kha, 1998 atangin thla ruk course-a tihsei a ni a, kum khatah batch hnih neih a ni ta a ni.
Kum 2009 atangin Synod-in a rel angin Certificate of Theology (C.Th.) ah upgrade a ni a, a din tirh atanga 61st batch thleng hian zirlai 1577 (mipa 1249 leh hmeichhia 328) an awm tawh a, tun tumah hina zirlai 20 in tha takin an zirchhuak a ni.