Vawiin (June 14, 2018) khan Synod Bookroom chuan kumtina an lo tih thin angin Synod Bookroom Conference 2018 chu J.M. Lloyd Hall, Synod Office-ah an hmang a, hemi avang hian Mizoram puma Synod Bookroom zawng zawng khar a ni.
Conference hi zing dar 9:30-ah Pu Lalhruaitluanga Ralte, General Manager, Prescom chuan hawngin inlawmna thu a sawi a. Chawhma hun hi Upa Lalzarmawia, Sales Promoter, Synod Bookroom-in kaihruaiin Pi Rosy Lalhmingmawii, Accountant chuan Bookroom sum dinhmun report a pe a. Report atanga a lan danin kum kalta khan Synod Bookroom hian nasa takin hma a sawn a. An Budget Rs. 9,49,50,000/- chu tha taka khumin Rs. 15,01,80,477/- zet thawhchhuah a ni a, Synod Bookroom 1911-a din a nih atangin kumkhata a thawhchhuah tam ber tum a la ni. Budget khumna ringawt hi Rs. 5,52,30,477/- zet a ni bawk. Kum kalta chhung khan Net Profit Rs. 2,17,74,447/- lai Synod Bookroom hian a nei bawk. Pathian awmpuina leh Kohhran mipuite thahnemngaihna azara hetiang dinhmun an thleng thei hi Synod Bookroom chuan lawmthu a sawi a ni. Chawhma hunah hian Pu Lalniliana, Synod Bookroom Manager chuan kum hmasa Bookroom Conference-a thurelte bawhzui a nih dan leh tihhlawhtlin a nih dan chi hrang hrang report a pe a. Hei bakah hian Financial Year thara Synod Bookroom budget Rs. 10,55,50,000/- chu a pharh nghal bawk.
Chawhnu lamah Pu Lalhruaitluanga Ralte, General Manager-in programme kaihruaiin Mizoram puma Branch hrang hrangte atangin report leh rawtnate ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni bawk. Rawngbawlna hrang hrang thlirletna leh sawizauna hun hman zawh hian Pu Lalniliana, Synod Bookroom Manager-in Monthly Operation Review khaikhawmna a nei a. Operation review-a a lan danin 2017 kha Synod Bookroom Branch tam ber tan Sale tam ber kum a nih thu leh nikumah Synod Bookroom Branch-ten an budget an khum that thu tarlan a ni.
Conference hmasa leh kumin Conference chhungin Branch thar 3; Khatla, Siaha leh Vaivakawn Branch hawn a nih thu leh Distributor thar paruk; Cherhlun, Zohmun, Sihphir Vengthar, Khawruhlian, Shillong leh Khawlailung-ah te hawn thar a nih thu tarlan a ni bawk. Hemi hnu hian kum kaltaa Synod Bookroom Branch tha thlanna result puan a ni a, Rev. P.C. Pachhunga, Executive Secretary chuan Branch tithate hnenah lawmman a sem a ni. Tehna ki hrang hrang palia inteh a nih hnuah hetiang hi kum 2017 chhunga Synod Bookroom intehna result chu a ni:-
Pakhatna : Synod Bookroom Bawngkawn Branch
Pahnihna : Synod Bookroom Chanmari Branch
Pathumna : Synod Bookroom Hqrs. Showroom, Aizawl
Tun dinhmunah Synod Bookroom hian Branch 15 zet neiin Distribution Centre 37 a nei mek a. Nuai 852 zet senna tur Headquarters Office, Mission Veng ami chu sak mek a ni bawk.