Synod Bookroom chuan vawiin (July 9, 2018) atanga July 14, 2018 (Inrinni) thleng awh tur Reduction Sale chu Mizoram puma Synod Bookroom Branch zawng zawng leh Churachanpur-a Synod Bookroomah te a tan leh ta.
Synod Bookroom Reduction Sale hi a rualin Mizoram pumah zing dar 9 khan tan a ni a. Tun tum Reduction Sale hi tum dang ang lo takin Synod Bookroom Branch mai bakah Distributor zawng zawngah neih a ni. Reduction Sale-ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni a. A tantirh ni atangin mipuiin an hlut hle. Synod Bookroom Reduction Sale hi mipuiin lehkhabu tha leina hun remchangah hmangin an hlut hle thin a. Sorkar Office leh Kohhran leh Mimal Library neite pawhin a hlawma lehkhabu leina hunah an lo hmang tawh thin.
Nikum 2017 Reduction Sale-a kar khat chhunga lei chhuah kha Rs. 83,38,479.00/- lai a tling a. Kumin hian kum hmasa lama sale zatte hi khum ngei an inbeisei thu Synod Bookroom lama hotute chuan an sawi. Tun dinhmunah Synod Bookroom hian Branch 15 leh Distribution Centre 37 a nei mek a, lehkhabu item hi 5500 chuang zet an nei tawh a ni.