Synod Multipurpose Training Centre (SMTC) buatsaih Lay Leaders Training vawi 204-na chu SMTC Lecture Hall-ah nizan (July 10, 2018) khan Pathian hnena hlanin hawnna hun hman a ni.
Training hian July 16, 2018 thleng a awh ang. Tun tum training-ah hian Presbytery pali - Aizawl Chhimthlang, Aizawl Hmar, Kolasib leh Tlawng atangin Kohhran Upa 24 an tel thei a ni. Training hawnna inkhawmah hian Rev. Vansawma, Proramme Director, SMTC-in hawnna leh thuchah a sawi a, Nl. Lalthanmawii a zai a, Rev. C. Chawngliana, Resource person in malsawmnain inkhawm a tin a ni. Hetiang hunah hian Kohhran Upate tan Kohhran enkawl dan leh inrelbawlna lam atana pawimawh chi hrang hrangte zir thin a ni a, Kohhran thlarau lam nun enkawl dan tha te zir ho thin a ni bawk.
Tun tumah hian Rev. C. Chawngliana, Rev. Vanlalzuata leh Rev. Lalchungnunga te’n training hi an neihpui ang. Kohhran Upate tana Lay Leadership Training hi kum 1996 atang khan neih tan niin vawi 203 lai neih a ni tawh a, Kohhran Upa 6542 zetin training hi an nei tawh a ni. Training kharna inkhawm hi July 14, 2018 (Inrinni) zanah neih a ni dawn a, Rev. H. Remthanga, Synod Finance Officer-in Certificate semin thuchah a sawi ang.
Synod Multipurpose Training Centre (SMTC) hi kum 1993 Synod-in din tura a rel angin January 12, 1996 khan din a ni a, a tira a hming chu Christian Multipurpose Training Centre tih niin kum 2001 Synod khan a hming hi Synod Multipurpose Training Centre tiin a thlak leh a ni. Synod Multipurpose Training Centre (SMTC) hnuaiah hian thalaite’n mahni kuta eizawnna kawng an lo neih ve theihna tura training chi hrang hrang (Vocational Training) buatsaih thin a ni bawk a, tunah hian trade chi hrang 6 kalpui mek a ni a, zir chhuak tawh mi 1409 awmin tunah hian zirlai 81 an nei mek bawk.