Pi Zosiami (Mair Edwards) chu July 1, 2018 zan dar 10:30 vel khan Wrexham (Wales)-ah pneumonia leh lung natna (heart problem) vangin a thi a, July 12, 2018 (Ningani) hian vui a ni dawn a, PCI Moderator (Mizoram Synod Senior ES ni bawk) Rev. Lalramliana Pachuau leh kan Synod Moderator Rev. F. Lalrinnunga te PC Wales Gen. Assembly (July 9-11, 2018) hmanpuia kal mekte chu Pi Zosiami vuinaah hian an tel ang.
Pi Zosiami hi Mizorama Welsh Missionary Rev. Samuel Davies-a (1937 -1951) fanu a ni a. Mizo ho inkoh dan ang thlapin amah Pu Samuela hi Zosiami Pa tia hriat a ni a. A nupui Pi Samueli pawh zirtirtu tha tak a ni a, lemchan (drama) thiam a ni bawk a. Drama lama Mizote tihhmuhtu leh kaihruaitu hmasa a ni. An fanu Zosiami hian Mizotawng a thiam em em a, Mizo naupang a kawm nasa a, an chhungkua hi mipuiin an nelin an ngaisang em em thin a ni. Pi Zosiami hi kan Missionary vek Rev. David Edwards-a (1933-1941) fapa Royce Edwards (Zorema) nen an innei a. Missionary fa ve ve innei hi thil vang tak a ni awm e.
Mizorama Welsh Missionary kan neih zingah mi dang an awm lo. Royce Edwards hi a Mizo hmingah Zorema tih phuahsak a ni a. A pa, Rev. David Edwards-a pawh Pi Zosiami pa an koh dan (Mizo style) bawkin Zorema Pa tia hriat lar a ni a. Rev. David Edwards hi Young Lushai Association (a hnuahYMA) dintute zinga mi niin Treasurer hmasa ber a ni nghe nghe. Pi Zosiami leh Pu Zorema te fapa te zawk Dr. Owain Edwards hi kum 1993-ah Mizoramah lo chhuakin kan Synod Hospital a rawn tanpui a. A U Rev. Hywel Edwards leh a nupui Julie ten 2016 November thlaah Mizoram an rawn tlawh bawk. Tin, kumin May thla khan Dr. Owain Edwards hi Rev. Anuerin (Zolawma) nen lo zin lehin Synod Hospital an rawn tlawh a, Synod Office Morning Dovotion te min hmanpui bawk a ni.