Kan zosap Pu Robert-a (Rev Dr. Alwyn Roberts), kum 84 chu cancer natna avangin August 1, 2018 zing dar 2 khan Bangor Hospital-ah a boral. Pu Robert-a vui inkhawm hi August 13, 2018 (Thawhtanni) 1 p.m. khian a lawina kohhran Berea Newydd Chapel, Bangor-ah neih a ni ang a, hemi zawh hian thlanmualah (private burial) vuiliam a ni ang.
Pu Robert-a hi Pastor fapa a ni a, Wales rama Llanrwst khua-ah August 26, 1933 a piang a ni. Lehkhathiam chhuanawm tak a ni a, Cambridge atanga M.A. zir chhuak ngat, chumi hnua LLB zo leh a ni a, a thil zirna reng rengah Honours hmu veka tling chho a ni. Kum 1960 November thla khan Zoramah a lo chhuak a. Kohhran enkawl hna bakah Pachhunga Memorial College-ah Principal hna kum 7 chhung zet a thawk a. A taimain a thawhpuite’n an fak kher mai. Lehkhabu tha tak tak Sap ram leh a thianteho hnen atangin a chah khawm a, Library changtlung tak, hmarchhaka hriat hlawh tham a din hman a ni.
Zoram buai tan tirh lai khan ani chauh hi Zosap mipa a ni a. Buai zual lai khan Aizawl khawlaiah te mitthi ruang phum loh tam tak a awm hman a, chung chu ama hovin an thian fai a. A tlawmngaihzia hrechiangtute chuan a chanchin hi hahipin an la sawi reng a ni. Danhremi a ni bawk a, a huaisen hle, sipai laka mipui thawvenna turin nasa takin a bei a, silaia an lo tin pawhin an salai hmawr a nawr kiang a, a tih tur a thulh duh chuang ngai lo. Tin, buai kum khan Synod Moderator a ni a, Biak In luahtu sipaite pawh a um darh hlawm a ni. May 20, 1967 khan an chhungkuain Zoram an chhuahsan a. Chumi hnuah pawh Pu Robert-a hian hna pawimawh tak tak a chelh kual a. Chanvo pawimawh eng emaw zat bakah BBC Board of Governors-ah member, BBC (Wales) Chairman leh Mental Health Commissioner nihna te a chelh kawp a ni. A thiannu Pi Robert-i (Mair Powlands Roberts) kha Sap ram lama zirtirtu hna thawk thin a ni a, Zorama an awm chhung khan Pi Teii Sikulah a thawk ve thin. Tin, an fapa neih chhun Zosanga (Hywel Glyn) pawh Dânhremi (Lawyer) a ni tawh bawk.