Mizoram Synod buatsaihin nimin (Aug. 13, 2018) tlai dar 3:00 khan Pu Robert-a (Rev. Dr. Alwyn Roberts) sunna inkhawm Mission Veng Kohhran Biak Inah neih a ni.
Sunna Inkhawm hi Rev. Lalzuithanga, Ex-Moderator in kaihruaiin thuchah a sawi a. Rev. R. Vanlalnghaka, Secretary (Jr.), Mizoram Synod leh Upa Dr. Tawnenga, Principal, Pachhunga University College ten Pu Robert-a chanchian an sawi bawk. Mizoram Synod Choir te an zai a, Rev. H. Remthanga, Finance Officer-in Tawngtaisakna hun a hmang a, Rev. R. Lalnuntluanga, Synod Statistician-in malsawmnain inkhawm a tin a ni.
REV. DR. ALWYN ROBERTS CHANCHIN (August 26, 1933 - August 1, 2018)
Pu Robert-a hi Rev. Howel Robert leh Buddug Robert te fapa mal niin August 26, 1933 khan Gwynedd biala Llanrwst khua ah a lo piang a. A naupan lai chuan Penagroes Grammar School-ah a kal thin a, University of Wales Aberyswyth leh Bangor atanga B.A. leh LLB tha taka a zawh hnuin Cambridge University atangin M.A. a zir zo leh a ni. Lehkha zir mi leh thiam thei a nih avangin a degree lak reng reng hi Honour hmu veka zo a ni. Kum 1950 khan Westminster College, Cambridge-ah Tutor hna a thawk. Mizorama Missionary lo awm saten Aizawl-a College din thar atan thawk tura sawmin an chah a. Missionary ten hlawh nei mumal lova inpekna nena indaih lo chunga an thawk a hriat chuan a nupui hual a hrilh a, ani pawh chuan remtiin Kum 1960 June thlaah a nupui hual Rowlands William nen an innei a. A nupui (Mrs Mair Roberts) hi England-a zirtirtu hna thawk thin a ni a, Borneo Shell Oil Company-ah a thawk tawh bawk.
Kum 1960 November thla khan Mizoramah a lo chhuak a, an fapa Zosanga (Hywel Glyn) hi Zoram an lo chhuah hnuin June 7, 1962 khan Robert Hospital, Shillong-ah a piang a ni. Zosanga hi kum 5 a nih thlenga Aizawla awm a nih avangin Mizo tawng pawh a thiamin Mizo thian tha tak tak pawh a nei hman a ni. Mizorama a lo chhuah hian private-a College ding thar Aijal College-ah Principal hna a chelh nghal a. Pu Pachhunga a thih hnu khan a chhungte’n amah hriatreng nana thawhlawm Rs. 50,000/- an thawh avangin Pachhunga Memorial College tih a ni ta a. Assam sawrkar-in he College a lak hnu, Pachhunga Memorial Government College a nih thleng khan Principal hna hi a chelh a ni. College tan hian thahnem a ngai em em a, India rama hmuh mai theih loh lehkhabu tha Sap ram atangin a chah khawm a, a thian thaten an rawn pe khawm bawk a. College Library tha leh a hun laia hmingthang tak a lo ni ta a ni. Periodicals hlu tak tak, Geographical & Historical Map leh Chart tam tak a awm bakah lehkhabu pawh 23,000 lai a awm a ni. Heng a thil rochun hlu takte hi November, 1981 khan zan khat thil thuah a kang ral ta vek a, a uiawm hle mai. PMG College hi, a din tirha Children’s Park hmuna Night College a nih atangin, tuna a awmna hmuna sawn a nih hnu leh tun thlengin College tha leh chhuanawm tak a ni zel a ni. College Principal-a kum sarih a thawh chhungin a thawhpuiten a fak em em vek mai a, amah a taima bawk a, Pa nih a tling hle a ni. A hun lai hian kan ram tan mi tha leh chhuanawm tam tak a chherchhuak a ni.
Mizoram an awm tawp lamah ram buaiin a nang hlauh mai a. March 1, 1966-a Independence puan a nih khan Aizawl sipai hmun chu lak tuma silai nena beih a ni a, thlawhna leh lei lam sipai nena inbeih a nih avangin Aizawl khaw chhunga cheng ten tlanchhiatsan a tul ta a. Pu Robert-a te chhung pawh Zokhawsang lamah an tlanchhe ve a. Aizawl khaw nawta a chheh vela tlanchhia an nih avangin ei leh in, riahna thlengin an indaih lo hle mai a. Zokhawsang mipuiin Pu Roberta te tan a bika eitur leh khum an ngaihtuahsak te chu, Pu Robert-a chu a tlawmngai hle mai a, mite an chunga an thatna chu fakin a lawmzia a sawi chhuak hial a ni.
Ni reilote chinah Aizawl an lut leh a, in tam tak a kang chhia a, chutih karah sipaiin Mizo tawh phawt chu an ringhlel a, tam tak manin an sawisa a ni. Pu Robert-a chu Synod Moderator a ni a, Mizote a thlamuan a, a hnenah mi tam tak an tlan a, mi tam tak sipai lak ata a chhanchhuak a ni. Amah hi Danhremi a nih bawk avangin sipaiten tibuai thin mahse, an officer, hotute an thlen san poh leh an lo zah mai a, Mizote tan Pa a tling hle a ni. India sipai leh hnam sipai inkara awm mipui tan chuan hlauh tur leh thlabarna tur a tam hle mai a, Kohhran lam pawh a kal mumal thei lo a ni. Kohhranhote chu thlabara awm mai lova, kan rin Lalpa Pathian lam ena nghet taka ding turin a fuih thin a ni. Mizo mipui leh Kohhran hnena thuchah siamin Synod Secretary pahnih Upa Chalhnuna leh Rev. Lalsawma te nen lehkha siamin an sem darh a.Thihna leh chhiatna rapthlak thlen thei chi hi Kohhranin a duh loh thu te, Inremna lam zawng ngaihtuah turin Kohhran mi tin an ngen a; Sawrkar lam pawh ram a awp danah mipui himnna ngaihtuah tura ngenin, Kohhran mipuite chu Pathian kuta hlanin Pathian hnenah an tawngtaisak reng thu an chhuah a ni. Hei bakah hian buai denchhena mahni ta ni lo lo lak te leh sawrkar thil pawh mahni tana lak chu thil sual a nih thu leh mahni hna leh eizawnna theuh taima taka thawka harsa leh chanhaite tana malsawmna ni-a, Krista rilru pu turin Kohhran tinte hnenah thuchhuah an siam bawk a ni.
An fapa Zosanga’n natna khirh deuh, Mizoram lama enkawl mai theih loh chi a neih avangin Kum 1967 May thla khan Sap ram lamah min hawsan ta a ni. Sap ramah pawh nasa takin a inhmang zui a. Kum thum chhung chu Swansea University College-ah Lecturer hna a thawk a, kum 1970-79 chhung Social University College of North Wales, Bangor-ah Sr. Lecturer hna a thawk leh a ni. A hna chelh dangte chu (1) 1973-80 – Gwynedd Area Health Authority member (2) 1974-79 – Broadcasting Council for Wales member (3) 1976-79 – Royal Commission for Legal Services member (4) 1977-81 – Social Service Committee Chairman (5) 1979 –ah Bangor University College, Extra Mural Studies-ah Director hna leh College Vice-Principal hna a chelh. Kum 1979 vekah British Broadcasting Corporation (BBC) Board of Governors member a ni a, Wales ram huap BBC Chairman a ni bawk. 1979 atang vek hian Council of Royal National Eisteddfod of Wales member a ni a, 1981 atangin Welsh Fourth Channel Authority (S4C Board ) member a ni a. Chairman of the Broadcasting Council & the North Wales Arts Association nihna a chelh bakah Vice Chairman of the Arts Council of Wales leh Gwynedd Council and the Parole Board member nihnate a chelh reng bawk thin.
Pu Robert-a te nupa hi kum 1994 Gospel Centenary lawm lai khan Mizoramah an lo chhuak a, kum 2000-ah ATC Day (Nov. 17) hmanpuiin an nupa bawkin an lo chhuak leh a. Hemi tum hian Mission Veng leh Dawrpui Kohhranah te thu a sawi. Hei hi Mizorama an lo chhuah hnuhnung ber a ni ta. Mission Veng Kohhranin Biak Inpui an sak that khan Biak In thar (tuna a sunna inkhawm kan neih mekna) hawng turin Rev. Alwyn Roberts hi an sawm a. Nimahsela, an nupa hriselna tlak hniam lai a nih avangin doctor-in thlawhtheihnaa hla tak zin a remti lo va. Lawmpuina thu mawi tak Email-in a rawn thawn a. A thu rawn ziak ang ngai ngai chu hei hi a ni:- Thiante u, On behalf of my wife and I, I would like to wish you every blessing on the opening of the new Church building. Mission Veng occupies a very warm place in our hearts since for the seven years that we spent in Mizoram it was our spiritual home. We remember our many friends who were fellow members of the Church and the benefit which we received from their fellowship. It is also a special place in that it was in the Church there that our only son Zosanga was baptised. We remember in particular the role that the Church played in the dark days of discord and war. The morning prayer meetings held during those days were a source of great strength in troubled times. Apart from our personal memories, Mission Veng has always been a symbol of the relationship between the Presbyterian Church of Wales and the Church in Mizoram. It is always the parents’ delight that a child should grow stronger and better than they themselves and it is a cause of great joy that the witness of a small Church in Wales should be continued in so splendit a way in India and beyond through your efforts. Please accept our congratulations and good wishes on the opending of this splendid building and may you be richly blessed in your continuing witness. Yours most sincerely Alwyn and Mair Roberts Date Sun. Apr. 3, 2011, 2:11 Am.
Kum 2009-a Synod Inkhawmpui Mission Vengthlang Kohhrana nghah a nih tum khan chibai bukna thu a rawn thawn a, kum 2011 Synod Inkhawmpui vawi 88-na, Khatla Kohhrana neihah chibai bukna thu heti hian a rawn ziak bawk a:- To the Mizo Presbyterian Church Synod. It gives me great pleasure to send my greetings to the Moderator and the Delegates of the Synod. I read of the work in the bulletins which you send me and I am full of admiration for the witness of the Church in so many fields of activity. My wife and I hope that the Synod will be blessed in all its deliberations and that it will continue to lead the Church with wisdom and grace. May God bless you all and at the time of Advent and Christmas may you know anew the great gift of God’s love in Jesus Christ Alwyn Roberts Date:Thu, Dec 8, 2011, 10:56 PM Kum 2014 July thlaa Synod Moderator Rev. Lalhmuchhuaka leh Mizoram Synod Choir-te Wales a an zu zin tum khan Zosap la damte leh an tu leh fate nen hun hlimawm tak an zu hmang a. Kum 2017 khan, Synod Officers’ Meeting (OM) remtihnain Mission Veng Kohhran chuan Pu Zosaphluia (Rev. David Evan Jones) thlan, Abergele (Wales) Biak In thlanmuala mi chu an chei tha a. May 27, 2017-a a hlanna inkhawm (Re-dedication) buatsaihah Rev. Alwyn Roberts pawh tel vein Abergele Biak Inah hian thu a sawi nghe nghe a ni. Mission Veng Kohhran aiawha kal Kohhran Secretary Upa Prof. Laltluangliana Khiangte chu Mizorama Kohhran rawngbawltute zingah Pu Robert-a dam lai hmu hnuhnung ber leh kawmtu hnuhnung ber a ni ta awm e.
Hun eng emaw lai atang khan Pu Robert-a hi cancer natnain a tlakbuak a. Bangor hospital-ah an inenkawl mek laiin August 1, 2018 zing dar 2:00 (India ramah zing dar 6:30)-ah a rawngbawlsak thin a Lalpa hnenah a chawl ta a ni. August 13, 2018 dar 1:00 (India ramah tlai dar 5:30) khan a lawina Kohhran, Berea Newydd Capel, Bangor-ah Pu Robert-a puala Lawmthu sawina inkhawm (Thanks Giving Service) buatsaih a ni a, hemi hnu hian thlanmual lamah vui liam a ni. Pu Robert-a fapa Zosanga (Hywel Glyn) chuan an chhungkaw aiawhin, Mizorama Pu Robert-a suntu zawng zawng leh a pa thihna tuarpuitu zawng zawngte chungah lawmthu a sawi a ni.
Mizoram Presbyterian Kohhranin Pu Robert-a te ang mi thiam leh mi inpe Missionary kan lo nei kha kan vannei hle a. A chanchin hi hun rei lo te chhunga han sawi zawh mai rual a ni lo va, hetiang mi bik Pathianin min lo pe hi a thara lawmthu sawina tham a ni. Rev. Alwyn Roberts-a thihna hi Presbyterian Church of Wales leh Mizoram Presbyterian Kohhran te tan channa nasa tak a nih rualin Lalpa tan chuan hlu tak a ni ngei ang.
A sunnaah hian Condolence Book dah a ni a, mi tam takin Pu Robert-a an ui thu an ziak a. Condolence Book hi Synod Archives-ah dah a ni ang a, a duh apiangin la ziah chhunzawm zel theih a ni ang. Nimin vek dar 1:00 (India ramah tlai dar 5:30) khan a lawina Kohhran, Berea Newydd Capel, Bangor-ah Pu Robert-a puala Lawmthu sawina inkhawm (Thanks Giving Service) buatsaih a ni a, hemi hnu hian thlanmual lamah vui liam a ni. Vuina inkhawmah hian Rev. Dr. H. Sangkhuma te leh Pi Rebecca Lalbiaksangi te bakah Wales leh UK-a Mizo awmte thahnem tawk tak a vuina inkhawmah hian an tel a ni.
A tribute to the late Rev. Dr. Alwyn Roberts by Aneurin Owen