Mizoram Synod, Family Guidance & Counselling Centre (FG&CC)-in Kohhran hruaitute puala August 1 - 15, 2018 chhunga Synod Conference Centre-a Church Leaders' Intensive Residential Pastoral Care & Counselling Training vawi 29-na a buatsaih chu August 14, 2018 (Thawhlehni) zan khan ‘Final Evaluation & Graduation Service’ neiin khar a ni.
Training kharna hun hi Rev. Lalsangbera, Director, FG&CC-in a kaihhruai a, Rev. R. Lalnuntluanga, Synod Statistician-in training chhuakte hnenah a sem a, Upa R. Lalmalsawma, Com. Member, FG&CC chuan fuihna thuchah a sawi. He Counselling Training-ah hian Pastor Bial 7 leh Phai Synod, Myanmar atangin Kohhran aiawh 23 an tel a ni. Training kharna inkhawmah hian Training chhuakte chuan training an hlawkpui dan a lema an ziak chu entirin an hrilhfiah a, Upa C.L. Thantluanga, Mamit chuan training chhuakte aiawhin thu a sawi a. Bungkawn Pastor Bial Zaipawl te tum 2 zaiin, Upa Lalhuapzauva, Com. Member, FG&CC chuan Training chhuakte a tawngtaisak a ni.
Thuchah sawitu, Upa R. Lalmalsawma chuan training chhuakte fuihna thu sawiin, training chhuakte chuan an thil zirte chu tangkai taka hmang turin a fuih a. "Keimahni châk vang leh thiam intih vang ni lovin Lal Isuan min thlan avanga rawngbawl hna thawk kan ni a. Midangte tana malsawmna ni tur chuan thuawih leh tlawmna nun neih a ngai a ni" a ti.
FG&CC hian Pastor-te pualin Pastoral Care & Counselling Training hi vawi 27 buatsaih tawhin, Pastor 461 training a neihpui tawh a. Church Leader-te puala kum 2002 atanga training a neihpui tawhah, tun tuma mite nen hian Kohhran hruaitu 599 Training pek an ni tawh bawk a ni. Synod hian Counselling Centre pasarih - Mission Veng, Bawngkawn, Vaivakawn, Champhai, Serchhip, Kolasib leh Lungleiah te a nei a, 2019 kum tir lamah hian Mamit-ah Centre hi hawn belh tura ruahman a ni bawk. Heng Counselling Centre pasarihah hian tun thlenga pantu (Client) an neih tawh zat chu mi 23,052 an ni.