Rev. Lalawmpuia Hmar (40), Aizawl Civil Hospital Chaplain hna thawk mek chu August 19, 2018 tlai dar 3:30 khan Synod Hospital, Durtlang-ah a thi a, vawiin (Aug. 20, 2018) chawhnu dar 1:30 khan Electric Veng Kohhran Biak Inah Rev. Lalramliana Pachuau, Ex-Moderator in a vui.
REV. LALAWMPUIA HMAR CHANCHIN :
Rev. Lalawmpuia Hmar hi Pu J.L. Varparha (L) leh Pi Lalbiaktluangi te fa 4 zinga a naupang ber dawttu a ni a. April 6, 1978 khan Civil Hospital, Aizawlah a piang a. A pianpui unau te chu :-
1. Lalhmingliana h/o Lalhmangaihzuali, Bethlehem Vengthlang
2. Laldinpuii w/o Rualchhawna, Republic Veng
3. Rev. Lalawmpuia Hmar h/o Vanlalremruati, Electric Veng
4. H. Laltanpuia, Republic Veng
A mizia : Rev. Lalawmpuia Hmar (Ma-awmpuia) hi a naupan lai atangin mi tawng tlem leh mi pawi sawi lo mi a ni a, thiante zingah pawh nungchang zawi leh tawng tam lo tak a ni a, mahse amah hrechiangtu apiangin an ngaina viau zel a ni.
Zirna lam : Nursery leh K.G Modern English School-ah a zir a, Class-I chu Shillong-ah kalin Class-II a zir zawhin a tih that em avangin an zirtirtu ten Class- IV-ah an sawn hial a ni. Class-VII a zir zawh hian Class VIII leh IX zir lovin National Open-ah matric a bei ta a. Matric a pass hnu hian T.Romana College-ah P.U a zir a. P.U.- I year leh II year chu vawi khata exam kawp a dil a, college lamin an lo remti hlauhva, tichuan kum khatah PU chu a zo ta a ni. B.A zir chhunzawm lehin tha takin a zo leh a ni. Amah hi mi rilru chak leh thiam thei tak a ni a, a vawi khat chhiar chu a theihnghilh tawh ngai lo.
Rawngbawlna : B.A. a zirlai atangin Kohhranah theih ang tawka inhmangin chanvo pawimawh tak tak - Bial Zaipawl member, Kohhran Zaipawl Conductor, K.T.P Branch Comt. Member, K.T.P Group Leader, Primary Dept. Secretary, Kohhran Light & Sound Secretary leh Chawhnu Naupang Inkhawm Secretary nihna te a chelh chhova. Zai leh rimawi tum lamah hian a tui em em a, a thiante nen Eternal Lights Group dinin hmun hrang hrangah zaia rawngbawlna an nei thin a. K.T.P General Conference-ah pawh Bial aiawhin vawi thum lai chanvo neiin a tel tawh a ni. Khawtlang lamah pawh Y.M.A Section-ah kum hnih lai O.B dinhmun a chelh bawk. A tet lai atanga nu leh pa ten Pathian rawngbawl tura an hlan a ni a. A puitlin hnuah kawng dang zawh a tum reng reng pawhin a tluang thei lova. Pathian hnenah a kawng zawh tur zawtin a tawpah chuan Pathian thu zir duhna nasa tak a nei ta a. Tichuan kum 2002 - 2006 chhung khan Aizawl Theological College ah B.D. a zir a, B.D. 2nd year a zir kum hian a pa cancer avangin a zirna pawh duh angin a ti tha hlei thei lova, a pa JL Varparha chu November 2004-ah a thi ta nghe nghe a ni.
Pathian khawngaihna zarah B.D. zovin kum 2006 Synod Inkhawmpuiin Pro. Pastor-ah lain North Hlimen Bialah a dah a; hetah hian kum 2007- 2009 thleng a awm a ni. December 18, 2009 khan Vanlalremruati, Pu C Rothianga fanu, North Hlimen nen Rev. H. Lallungmuana, Bialtu Pastor-in North Hlimen Kohhran Biak Inah a inneihtir a, tunah hian fapa pakhat H. Rotluangpuia (kum 7-na kal mek) an nei a ni. Kum 2009 Synod Inkhawmpuiin Pastor atan nemnghetin kum 2010 - 2015 chhungin Unnao Pastor Bial, Lucknow Field-ah Pastor-in a awm a. Kum 2015-ah Phainuam Pastor Bialah a awm a, 2015 Synod Inkhawmpuiin Synod Office-ah awm turin a ruat a, Synod Officer’s Meeting hmasa ber chuan kum 2016 atangin Aizawl Civil Hospital Chaplain hmun ruak pakhat awmah thawk turin a dah veleh ta a; chu chu a thih ni thlengin a thawk a ni. Pastor hna a thawh chhungin Nupa tuak khat a inneihtir a, mi 113 Baptisma a chantir bawk.
A nat dan : Kum 2015 February thla khan Thin (Liver) natna a nei tan tih hriat chhuah a ni a, theih ang anga inenkawlin Christian Medical College & Hospital, Vellore-ah vawi 5, Synod Hospital Durtlangah vawi tam tak enkawl a ni a, natna dang Zunthlum, B.P. sang leh Lung natna te a neih belh zel a. A nat kar lakah hian Civil Hospital-a a rawngbawlna chu a theih ang angin a thawk chhunzawm ve hram hram zel a ni. Thla khat vel kalta atang khan khawihli te tak te te a nei tan a, harsatna erawh chu a tawh phah lutuk lova, a hnaah te pawh kalin Civil Hospital OPD-ah te a inekawl pah reng a, kar khat chhung vel hian inhnaih takin hmun li-ah khawihlipui kan tih ang chi a rawn awma, hei hi a chauh pui viau mai a, August 19, 2018 zing khan a thaw a rawn hah a, Synod Hospital-ah kalpui nghal a ni a, ICU-ah awm nghalin ventilator pek a ni a, tha leh mai tura kan beisei laiin August 19, 2018 tlai dar 3:30-ah a rawngbawlsak thin a Lalpa hnenah a chawl ta a ni.
VUINA PROGRAMME
A hun : Ni 20.08.2018, 1:30 PM (Thawhtanni)
A hmun : Electric Veng Kohhran Biak In
Vuitu : Rev. Lalramliana Pachuau, Ex- Moderator, Mizoram Synod
Hla sak ho : He dam chhûng buaithlâk takah hian (KHB No. 467)
Chanchin sawi : Upa R. Dengzikpuia, Secretary, Mizoram Synod
Zaipawl :Electric Veng Bial
Thlamuanna Thuchah : Vuitu
Zaipawl : Electric Veng Kohhran
Tawngtaisakna : Rev. R. Lalnuntluanga, Statistician, Mizoram Synod
Hla sak ho : Khawvêl hi bo mah se (KHB No. 150)
Malsawmna : Rev. R. Vanlalnghaka, Secretary (Jr.), Mizoram Synod
Thlanmual : Rev. Dr. Lalhmangaiha