Aug. 22, 2018 (Nilaini) nileng khan Kohhran Hmeichhe Rorel Inkhawmin a lo rel tawh ram pum huap awmni kham tawngtai rualna hun an hmang a, mahni kohhran theuhah a remchan dan anga hman a ni a, remchan zawkna avanga a hun sawn hma leh tlai hret pawh an awm bawk. Tawngtai thupui ruahmansa - Lawmthu sawina, Mahni inhlan tharna, Sual thupha chawina, Kum 2018 MLA General Election lo awm tur atan, Ram leh Hnam tan, Zirtirna diklo laka fimkhurna, Kohhran pum rawngbawlna atan, Kohhran Hmeichhe rawngbawlna atan, Ramthar rawngbawlna lam, Sual bawiha tangte tan leh rualban lo, fa hrah leh kum upa te tan tih thupui hrang hrang te hmangin tawngtaina rualna hi neih a ni. Tawngtai rual denchhen hian Aug. 21, 2018 (Thawhlehni) zan khan Presbyterian Women Fellowship (PWF) Day of Prayer pualin thupui inang tlang "Danglamna thlen turin huaisen rawh" tih an zir ho bawk a ni. Awmni khama Tawngtairual leh PWF Day of Prayer programme hmang kawp nghalte pawh an awm bawk. Mizoram chhung bakah Kolkata, Delhi leh Mumbai Kohhran Hmeichhiate chuan Awmni khama tawngtairual hun hi tha takin an hmang thei bawk a ni.