Vawiin (Aug. 24, 2018) chawhma dar 10:00 khan Synod Press Gathering Machine thar chu Synod Senior Executive Secretary Rev. Lalramliana Pachuau-in Pathian hnenah a hlan. He khawl thar hi Synod thlakip chhuak chi hrang hrang, Kristian Tlangau leh Ramthar chanchinbu ang chi zawng zawng hi lakhawma remfelin a chilh a, a tan rual nghal zel thei a ni. He khawl thar neih hma chuan thlakip chhuakte hi a kawm vuah zawhah lehkha tanna khawl (paper cutting machine) ah tan rual leh phawt a ni a. Chumi hnuah a chilhna khawl (wire stitching machine) ah chilh leh a ngai a, a bu mal te te hi lak kawi lak kawi a ngai thin. He khawl tha neih hnu hi chuan a kawm nena phuah sa chu Gathering Machine-ah hian barhin, a chilhna zawnah a hruai phei a, a sirah ni lovin, a zângah hmun hnihah a lo chilh a, a chilh zawh apiang chu hruai hrang lehin a sir kil thumah a tan rual leh a. Chutia a zawh fel fai vek hnuah a rawn dah chhuak thin. He khawl thar an neih tak hnuah chuan thlakip chhuak chanchinbu hrang hrang kawpi nuai hnih dawn lai thlatina an khawih thin chu rang takin a zo zung zung thei tawh dawn a, a hun takah chhuah zel theih beisei a ni. Tuna khawl thar neih hma kha chuan chanchinbu chhuah thin te kha a sira chilh a nih avangin keu a nuam lo deuh a, he khawl thar hi chuan a zângah a thui avangin duhthusamin keu a nuam tawh a ni. He khawl hi Muller Martini Company, USA siam a ni a, an hmunpui chu Switzerland a ni a, senso dang zawng zawng nen Rs. 20,00,000/- vel sen a ni. India rama a used dealer Graphics Impex Services, New Delhi hnen atanga lei a ni. Hetiang khawl hi Mizoramah a la awm ngai lo va, Synod Press tan hmasawnna nasa tak a nih beisei a ni.