August 31, 2018 (Zirtawpni) hi Ramthar Ni a ni a, Mizorama Presbyterian Kohhran rawn dintu Rev. David Evan Jones (Zosaphluia) Mizorama rawngbawl tura a lo thlen ni a nih vangin Mizoram Presbyterian Kohhran tan Ni pawimawh bik a ni. Kum 1972 Mizoram Synod Inkhawmpui chuan, Synod Ramthar Board-in, 'Aug. 31, Pu Zosaphluia Mizorama a lo thlen ni hi Synod Ramthar Ni atan hman ni se', tia a rawtna chu pawmin kum 1973 atang khan Aug. 31 chu Ramthar Ni atan hman tan a lo ni ta a ni.

Mizorama Chanchin tha rawn thlentu hmasa ber (Pioneer Missionary) Rev. William Williams chuan Khasi rama a thawh laiin Syhlet lama Mizo lung in tangte hnen atanga Mizote chanchin a lo hriatin Mizorama kal duhna a nei ta a. Kum 1891 March 20 khan Aizawlah a lo kal a, Mistiri leh kut hnathawka inhlawhfate hnenah Pathian thu hrilin tract te a sem a. Mizoram chanchin hi Welsh ramah a zu sawi a, Welsh Presbyterian Mission chuan kum 1892-ah Mizoram chu Missionary tirh luhna atan a thlang ta a. Rev. William Williams hi tirh an tum a, mahse vanduaithlak takin a thi ta mai si a. Mi thar an dap leh a; Theological College-a an zirtir chhungin hun a lo vei hman a. Hetih lai hian Arthington-a mi tirh Rev. F.W. Savidge (Sap Upa) leh Rev. J.H. Lorraine (Pu Buanga) te kha an lo chhuak a, kum 1894, January 11-ah Mizoram an lo thleng a; Welsh Presbyterian Mission tirhin Rev. D.E. Jones (Zosaphluia) hi kum 1897, Aug. 31-ah a lo thleng ve leh ta a ni. Mizoram Presbyterian Kohhran chuan kumin (2018) Ramthar Ni pual hian tum khat inkhawm atan programme a siam a, thupui inang tlang 'Pathian thu chu a darh a, a pung ta telh telh a' tih zirho a ni. Ramthar Ni pual hian Synod Mission Board-a thawktute Ramthar Campaing neiin hetiang hian an kal ang. 1. Vanbawng Kohhran - Pu C. Kapthanga leh Rev. P.B Zosapthara 2. Aizawl Kohhran - T. Upa Lalbiakenga Fanai, Asst. Coordinator leh Pi Malsawmtluangi, O/A 3. |huampui Kohhran - Pu Lallawmnakima Hmar, Circulation Manager, Ramthar Chanchinbu 4. Chite Kohhran - Pu K. Laldawngliana 5. Maubuang Kohhran - Rev. T.C Laltlanzova 6. Bukpui Bethel KH - Pu K. Zothlamuana, O/A leh Pu Lalbiaknunga 7. Kolasib Kohhran - Pu K. Ronghaka leh Pu Lalvenkima Ralte, Synod Office te an ni.