Nimin (Sept. 5, 2018) khan Synfo Praise On 2018 Organising Committee chu Synod Committee Room No.1-ah Chairman Upa Zonunmawia kaihhruaiin an thu khawm. Praise On 2018 atana hmalaknate thlir hovin ruahmanna hrang hrang an siam zui bawk. Organising Committee thutkhawm ni thleng hian Intihsiaknaa tel tur Branch hrang hrang atangin 40 velin hming an pe tawh a ni. Synfo Praise On 2018 Intihsiakna hi Mission Veng Kohhran Hall-ah neih a ni dawn a. September 18 -21 chhungin Round 1 neih a ni ang a, October 16 -19 chhungin Round 2, November 6 -9 chhungin Round 3 leh Final round neih a ni ang. Praise On 2018 Hlanna inkhawm hi September 14 (Zirtawpni) zan dar 8:45-ah Mission Veng Kohhran Hall-ah neih a ni dawn a, Synod Moderator Rev. F. Lalrinnungan a hlan ang a, Judge turte puan chhuahna leh inhmelhriattirna neih a ni ang a, Mizoram Synod Choir, Praise On 2017-a lawmman pathumna latu Dawrpui Vengthar Group leh Praise On 2016 House Band te an zai ang.