August 31, 2018 zing dar 4:00 khan Pu Zorema (David Royce Edwards) kum 83 chu Emral House Nursing Home, Wrexham khuaah Vascular Dementia natna avangin a thi.
Pu Zorema hi Pi Zosiami (Dorothy Mair Edwards), 12 July-a vui liam tak pasal kha a ni. Presbyterian Church of Wales missionary Rev David Edwards (Pu Edward-a) fapa a ni a, Mizorama missionary fa piang hmasa ber a nih bakah a nupui Zosiami nen hian Mizorama Welsh missionary fate innei awm chhun an ni. A pa Rev. David Edwards kha “Zorema Pa” tia hriat a ni thin a, zirna school leh Bible lehlinnaa mi tangkai tak a ni a, Young Lushai Association (YLA/YMA) dintute zinga mi niin Treasurer hmasa ber a ni nghe nghe a. Pu Zorema hi September 13, 2018 (Ningani) zing karah chhungkaw bilin a vuina hun an hmang ang a, chumi hnu dar 10:30 (India rama tlai dar 3:00)-ah an lawina Kohhran Capel Y Groes, Wrexham-ah Thanksgiving service an nei zui ang.
A fapain Zorema a thlahna thu
Zirtawpni tuk a ni a, a fapa Hywel-a'n thlahlel taka a thlir laiin David Royce Edwards (Zorema), Mair Edwards-i (Zosiami) pasal, Reverend David-a leh Pi Muriel Edwards-i te fapa chu a lawmmante hmu turin ropuina ramah a lut ta. Na tuar lovin, hahdam takin a ni a kal ni.
October ni 30, 1934-a Durtlang Mission Hospital-a piang a ni a, he khawvela a hun hmasa kum li chhung Mission Vengah a nu leh pa leh a unaupa Edward (a ni hi 1936-a piang a ni a, Australia-ah retired minister a ni) te nen an cheng a, a pa hriselna a that loh avangin naupang tê a nih laiin Mizoram chhuahsanin UK-ah an kir a ni. Chuti chungin a hun tawp thleng khan Mizoram leh North East India chuan amahah hmun pawimawh an chang ta reng a. An ramah hian Rev. David Edwards hi PCF Mission Board-ah Secretary te a ni zui a, Mission Field lamah rawng a bawl zui a ni.
Missionary-te kha furlough-a an hawin Liverpool bula Runcorn-ah an chawl thin a. Chutah chuan a ni, Rev. Samuel-a leh Pi Glenys Davies te fanu nena an intawn ni! Chumi hnuah Teacher Training College-ah an kalho a, an inkawp ta chawt a. Mizoram chungchang sawiin hlim takin an inkawm a, kum 56 an inneih chhung pawhin hei hi an titi tui a ni zui ta. Keini an fate hi Geraint, Hywel, Bethan, Dafydd Samuel (a ni hming hi kan pu te pahnih hming chawia sak a ni a, mahse hlamzuihin a thi a) leh Owain te kan ni.
Ka pa kha hmangaihna ngah tak, mi duat thei tak a ni a, kan awmho chhung khan Lalpa khawngaihna min hrilhfiah thin a.
Ka pa kha eizawnna lamah zirtirtu a ni a, mahse thuhril hna kha a ngai pawimawh a, a remchan dan ang angin thu kha a hril thin a, 70s leh 80s vela Thlarau Thianghlim an chan kha ka nu leh paah khan a thar leh thin a. An khua Wrexham-ah in ram tawh tuai hnumin Sunday School an din a, hei hi Pathianin mal a sawm hle. Chhan hrang hrang avangin an kohhranin hei hi a chhawm zui thei lo a, a tawp ta rih a. Chumi hnuah an thian leh thawhpuite nen Oasis tia an vuah hmunah kohhran a din a, hei hi vawiin thlengin a la ding a ni.
An insawn a lo tul a. Bala-ah engemaw ti chhung an cheng a, chu chu tuna minister ka nihna, Pi Teii leh missionary dangte lo chen thinna a ni a, hlim taka an awmna Wrexham leh Capel y Groes lama an kir leh hma zawng chu hetah hian an awm ta a ni. An va kirnaah pawh chuan Gospel tan bawk an thawk leh a ni.
Ka nu leh pa ka hriatchhuah fo thinna chu Gospel Centenary lawmnaa tel tura Mizoram an chuang chhuak leh kha a ni. An nu leh pate lo hriaa Gospel tana an lo thawhna te lo ngaihlutute nen an inhmu a, thian hluite nena an intawn bakah thian thar an chhar bawk a. Kan in hi kan rama Mizo rawn zinte hian an rawn tlawh deuh zel bawk.
Ka pa hi kumin April vel khan a nuam lo a, damdawi inah a awm ta deuh reng a. Ka nu khan ni tin a tlawh a, mahse a ni pawh chu a dam lo ve ta a. July ni 1 khan rin loh takin a thi ta thut a. Ka nu vuina kha lungngaihna lam a nih rualin, PCI Moderator Rev. Lalramliana Pachuau leh Mizo Synod Moderator Rev. F Lalrinnunga te an rawn tel remchang hlauh te kha vannei kan in ti a, kan chhungkua min tithlamuang hle a ni. Mahse ka pa kha a that tawh loh avangin kha'ngah khan a tel thei ta lo a, pawi kan ti hle.
Khami hnu khan David Edwards chu a hriselna a tlahniam ta zel a, mahse thu leh hla leh tawngtaina hmangtein kan inpawlho thei tho a. A chak tawh loh viau hnu pawh khan a inti pachang hram hram thei a. Vawi khat chu, a rawn harh that deuh tumin Sam bu-ah hian a khawi lai hi nge a duh ber tih ka zawt a, ngaihtuah chawp pawh awm lovin Sam 18-na a nih thuin min chhang a. Chu chu amah vuina inkhawmah pawh chhiar atan ka hual a, a chang thenkhat chu ka'n tarlang ang e:
Kan chhungkua leh ram tana in tawngtainate avangin kan lawm a, Lalpa chu kan Pathian, kan lungpui, kan kulhpui leh chhandamtu a ni a, amahah kan himin chhandamna leh chakna kan hmu ang tih kan chiang a ni.
Ka nu, Zosiami khan bungalow-a awma Mizote nena inhmuh reng mai a duh a. Ka pa, Zorema pawh khan chu chu a duh thin. Anni tan chuan engmah hian Mission Veng Bungalow a tluk thei lo.
Ka pa khan a chak loh zual hnu thleng khan an naupan laia Mizorama an awmna in kha a ngai thin a, an in lem, lemziakthiamin a ziah an tar a, chu chu a thlir a thlir thin. Vanramah chutiang bungalow chuan a lo hmuak ang chu.
Hetia lu kan sûn a, hun harsa kan paltlang lai hian Isua thutiam, kan tan hmun siama a kal thu (Johana 14) khan min thlamuan thin.
Ka pa'n khawvel a chhuahsan dawn khan Thupuan bung tawp pahnih, van thar leh lei thar chungchang, chatuan khawpui tiamna kha ka chhiarsak a, chutih lai chuan vanin, "Lo kal rawh," tiin an lo ko a. Rei lo teah a Lalpa hnen a pan ta a ni.
Rev. Hywel Rhys Edwards “Capel Tegid, Bala” (Zorema fapa Rev. Hywel Rhys Edwards-a'n a pa a thlahna thu hi English-a ziah a ni a, rawngbawla Wales rama awm mek Rev H Sangkhuma hnen atanga dawn niin, Mizo tawnga lehlin a ni. Zorema hi August ni 31 khan kum 83 mi niin a thi a, September ni 13 khan vuiliam a ni.
Zorema hi Zosap ve bawk, Rev. Samuel Davies-a fanu Mair Edwards (Zosiami) nen an innei a, a ni hian tun hnaiah kum 78 mi niin khawvel a lo chhuahsan tawh bawk. Zosiami hi Mizorama drama inelna hmasa ber Zosiami Cup tih hming put chhan hi a ni.
An khua Wrexham-a an in hi 'Aizawl' tih hming an puttir a, a bangah 'Aizawl" tih an ziak nghe nghe.